Thursday , May 23 2019
Home / Sosial & Politika / Asanami: Partidu sira Sei Halo Tuir Desizaun PR, PD Prontu Simu Desizaun.
Prezidente Partidu Demokratiku, Mariano Sabino 'Asanami' halo entrevista ho jornalista sira iha palacio prezidensia. [Foto: Zevonia Vieira | 23.01.2018]

Asanami: Partidu sira Sei Halo Tuir Desizaun PR, PD Prontu Simu Desizaun.

Partidu Demokratiu hasoru malu ho Prezidente da Republika, hodi hodi bele halo dialogu no fo hanoin ba Prezidente da Republika, liga ho situasaun politika ne’ebe to agora sedauk hetan nia solusaun.

Hafoin remata enkontru, iha palacio prezidensia, 23/01, Prezidente PD, Mariano Sabino ‘Asanami’ informa katak enkontru ida ne’e Prezidente da Republika mak inisia, ho prosesu ne’ebe mak lao, aban sei kontinua enkontru ho Konselho Estadu.

“PD nia pozisaun maka buat ne’ebe diak ba povu, ba rai ida ne’e, ami sempre prontu para halao. Ohin partidu politiku hotu bele koalia, ema hotu bele fo opiniaun, mais to ona iha Prezidente nia liman para atu desidi, partidu sira sei halo tuir, saida mak Prezidente desidi. PD prontu simu desizaun Prezidente nian”, hateten Asanami.

Hatan ba TAFARA.TL kona ba opsaun saida mak PD rasik hatoo ba Prezidente da Republika, hodi bele tetu?

Asanami responde katak, povu ida ne’e matenek, fo ona ninia votus ba partidu lima no laiha maioria absoluta. Ne’e hatudu povu nia konsensia ba multipartidaria, “se lideransa sira la konsege, ita fo fila fali ba povu tanba ukun ne’e povu nian, ukun laos partidu politiku sira nian, ukun laos lider sira nian. Ukun ne’e transforma mai partidu politiku atu servi povu, maibe se ita la konsege kumpri prinsipiu ba konstrusaun estadu no nasaun, dalan ikus liu mak fo fila ba povu. Desizaun tuir Konstituisan, ne’e desizaun Prezidente da Republika nian”. *[Zevonia Vieira | TAFARA.TL | 23.01.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *