Thursday , February 21 2019
Home / Eleisaun Parlamentar / Asanami: PD Prontu Apoiu ba Estabilidade Governativa Ne’ebe Bele Duru to 2022
Prezidente Partidu Demokratiu, Mariano Asanami Sabino halo entervista ho jornalista sira hafoin remata enkontru ho Prezidente Republika, Dr.Francisco Guterres Lú Olo iha palacio Prezidente.[Foto: Zevonia Vieira | TAFARA.TL | 29.08.2017].

Asanami: PD Prontu Apoiu ba Estabilidade Governativa Ne’ebe Bele Duru to 2022

“Hau hanoin iha tempu badak prosesu sei lao diak, depois de parlamentu forma no governu mos sei forma, atu bele asegura estabilidade no prosesu dezenvolvimentu ne’ebe diak liu ba ita nia rai”, Asanami

Ho Preokupasaun hosi Prezidente Republika, Dr.Francisco Guterres Lù Olo, ba prosesu negosiasaun hodi forma VII governu, Dr.Francisco Guterres Lú Olo konvida mos partidu PD ne’ebe mak hetan asentu parlamentar, atu bele rona hanoin ne’ebe mak mai hosi PD.

Hafoin remata enkontru ho Prezidente Lú Olo, Prezidente Partidu Demokratiku, Mariano Asanami Sabino ba jornalista sira hateten, PD desde inisiu sempre dehan katak PD ba estadu no kuadrus PD nudar maubere oan, prontu atu serbi ba kualker pozisaun.

“Ohin mai hasoru Prezidente, atu hatoo deit progresu ba dialogu ne’ebe ba dala tolu ona PD hasoru malu ho partidu Fretilin ,no mos karta ne’ebe mak hosi Fretilin ba PD, no PD nian karta mos ba Fretilin. Hau hanoin iha tempu badak prosesu sei lao diak, depois de parlamentu forma no governu mos sei forma, atu bele asegura estabilidade no prosesu dezenvolvimentu ne’ebe diak liu ba ita nia rai”, esplika Asanami.

Hatan ba perguntas hosi TAFARA.TL kona ba asina akordu ho Fretilin hodi apoiu ba governu inkluzaun. Prezidente Asanami esplika katak  asina akordu ho Fretilin, ne’e hanesan politika partidu nian.

“Ohin dader ami halo dialogu ona, iha tempu badak ami sei publika ba povu kona ba akordu entre PD ho Fretilin, antes 5 Septembru. Resposta hosi karta ne’e dehan katak PD prontu veabiliza, no PD laiha kondisaun atu serbi ita nia rain, tanba ida ne’e PD nia motto no prinsipiu katak ba povu Timor ne’e, prontu atu serbi no la ho kondisaun”, esplika Asanami.

Tuir Partidu Demokratiku katak karakteristiku governu inkluzaun, ne’e katak governu ida ne’ebe nakloke, ne’ebe mak laos deit partidu politiku, maibe ema independente mos bele hola parte.

“Koligasaun ne’e rekezitus konstituisional, ne’ebe mak fo dalan ba ida ne’e. Insidensial parlamentar bele pontual ho apoiu ba programa ne’ebe diak. Buat sira ne’e hotu hanesan inovasaun ida ba sosiadade tomak. Importante ita iha governu ida ne’ebe forte, saudavel no estabilidade governativa ida ne’ebe bele duru to 2022. PD prontu koopera no lao hamutuk”, tenik Asanami.

Iha tempu hanesan Xefe Casa Sivil, Francisco Maria de Vasconselos afirma ba jornalista iha loron 29/08, iha palacio Prezidente hafoin asiste enkontru entre PD ho Fretilin, hateten Prezidente Republika preokupa ho situasaun agora, liga ho prosesu negosiasaun ba formasaun governu. Prezidente husu ba partidu mais votadus hodi organiza prosesu ne’e atu bele lao diak. Hodi bele responde preokupasaun povu nian liu hosi elisaun jeral. Espera lider partidu sira bele ejerse duni sira nian funsaun no kapasidade hodi bele lori nasaun ne’e ba  oin.* [Zevonia Vieira | TAFARA.TL | 29.08.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *