Thursday , February 21 2019
Home / Eleisaun Parlamentar / Assanami: Hakarak Nakfilak Muncipio Ermera Nu’udar Sidade Kafé
Prezidente Partidu Demokratiku, Mariano Sabino Asanami.[Foto: Timor Agora].

Assanami: Hakarak Nakfilak Muncipio Ermera Nu’udar Sidade Kafé

Prezidente Partido Democrático (PD) hateten sei muda munisipiu Ermera sai munisipiu kafé no promove ba povu Ermera katak sei hadia infrastrutura liu-liu be’e mos no estrada.

Prezidente PD, Mariano Sabino Asanami, bainhira halo kampanha iha municipio Ermera, ba militantes no simpatizantes hateten katak Ermera nu’udar sidade kafé, sidade turístiku ida ne’ebé kapas no furak. Tanbane’e PD ho nian komprimiu politiku atu dezenvolve Ermera ne’ebe diak liutan.

“Oinsá mak ita dezenvolve  Ermera ne’ebé mak furak, fó anin ne’ebé mak di’ak, fó loron matan ne’ebé nato’on de’it ba nia oan sira. Ita hakarak nakfilak Ermera nu’udar sidade kafé, munisipiu kafé iha Ermera. Wainhira iha ita nia ukun, ita sei bolu Ermera munisipiu kafé,” tenik Assanami.

Eis Ministru Agrikultura ne’e informa liutan katak Partidu Demokratiku hakarak rehabilitasaun kafé, hakarak viveiros kafé, no  kontinua orgullu ho kafé iha Fatubesi ne’ebé mak tama iha potanic internasionál. Industria kafé, industria ki’ik, industria boot tau iha Ermera. Para nune’e bele halo prosesamentu ba kafé.

Kampanna ne’ebe halo iha loron 7/7/17, iha kampu foot ball Gleno, Partidu Demokratiku mos, esplika programa liga ho bee mos, ne’ebe maka dala barak sai problema boot iha area rurais. Tuir Prezidente PD katak sei jere bee mos iha Ermera.

Komunidade Eliza Soares, ne’ebe partisipa iha kampanna politika PD iha Gleno, bainhira dada lia ho jornalista TAFARA.TL hateten katak, ezizi ba partidu politiku sira ne’ebe sei ukun, bele tau matan ba povu kbiit laek sira, ajuda labarik sira nia eskolah, maske inan aman servisu nuda to’os nain, maibe oan sira nian future tenke nabilan.

Hanesan mos Komunidade Mariano de Deus Martins, nu’udar povu babain husu ba governu atu hadia folin kafé ne’ebé mak seidauk los, tanba ida ne’e bele halo ema Ermera oan sira, ne’ebé ema hanaran kafé hun maibé sira mak sai fali devedor.

“Ami kafé hun toos nain folin laiha, to’o fali ema business sira mak iha fali folin. Ami Ermera terus, susar kalan loron. Kafé folin laiha, kafé dulas mutin kilo ida $ 1, kulit mean ne’e $ 0,25. Ami husu ba Governu atu hasa’e folin kafé, kulit mean  kilo ida $ 0,50 no kulit mutin kilo ida $ 2. Tanba ami nia kafé seidauk kirim ba luar mos, iha Dili mos circa ida $ 2.50, nusa mak ami Ermera kafé hun, kulit mutin $ 1, kulit mean $ 0,25 ne’e ami la puas”, deklara Mariano.

Iha parte seluk, hafoin fila husi kampaña eleitorál ne’ebé realiza iha kampo Gleno. Jornalista Tafara.Org, konsege dadalia ho estudante, Jaime da Costa Salsinha Monteiro, eskola Sekundaria Nino Conis Santana, senti la satifas tebes ho kampaña eleitorál ne’ebé  mak halo besik tebes sira nia eskola.

“hanesan estudante stress oituan tanba ho prezensa partidu polítiku sira tanba sira halo kampaña ne’e besik liu ho ami nia eskola. Ho ida ne’e ami senti hanesan estraga liu ami estudante sira tanba dalabarak liu, sira tenki husik sira aula hodi fila ba uma tanba sira labele tuir aprendijajem tanba gaguan husi partidu politiku sira,” hateten Jaime.

Nune’e Jaime da Costa rekomenda ba autoridade local, STAE no CNE atu nune’e ba futuru labele akontese tan hanesan ne’e, presija tau fatin kampaña eleitorál ne’ebé distansia dook husi eskola.

Hanesan estudante, Jaime hato’o nia esperensa ba governu foun ne’ebé mak sei ka’er ukun, atu bele kumpri promesa polítiku ne’ebé mak sira hato’o ona iha kampaña eleitorál no hadia sistema edukasaun.

Kampaña eleitorál Partido Democráticohetan seguransa husi PNTL no hetan observasaun husi CNE, Media no PDHJ.* [Maria do Ceu | TAFARA.TL | Editor: Zevonia Vieira | 08.07.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *