Thursday , February 21 2019
Home / Sosial & Politika / Aula Iha Eskolah Ensino Baziku Sentral Aimerlu La Favoravel, Difikulta Prosesu Aprendizajen
Estudantes Escolah Ensinu Baziku, Sentral Aimerleu [EBC] 4 Unidade Aimerlu Hatu-udo Ainaro. [Foto: Bebiana Soares | 20.01.2018]

Aula Iha Eskolah Ensino Baziku Sentral Aimerlu La Favoravel, Difikulta Prosesu Aprendizajen

Escolah Ensinu Baziku, Sentral Aimerleu [EBC] 4 Unidade Aimerlu Hatu-udo Ainaro, hetan difikuldade iha eskolah refere, tanba fatin ladun favoravel, aula la too hodi estudante sira bele prense hodi estuda.

Diretora Ensino Basico Central, Filomena Carvalho de Araujo Alves, informa ba TAFARA.TL, 20/01, iha knaar fatin EBC, Hatu-udu esplika katak difikuldade durante ne’e hasoru mak hanesan fatin ladun favoravel tanba iha EBC ne’e komesa husi 10 ano to 90 ano.

“Agora ami mos iha ona Pre-Escolar ne’ebe fatin mak la sufisiente liu, aula mak la to’o, foin daudaun ne’e hau haruka sala ida babain estudante sira sai ba halimar, fatin ne’e sosa material para taka tia atu nune’e uja ba pre-escolar nian, maibe klase ne’e mak iha AB ne’e sei tama hamutuk deit tanba fatin la too”, konfesa Filomena.

Diretora ne’e mos hatutan katak, moru ka lutu ne’ebe hadulas eskola laiha, problema ba estudante sira tanba iha tempu udan no kalan animal mak hela fali iha eskola, tanba ne’e loron-loron sira sempre raut foer husi animal sira nian

“Dader ami mai ne’e, ami tenki halo limpeza uluk ba bibi ten, karau ten hamos tiha foin maka tama eskola, ida ne’e mos prejudika ba iha ami nia prosesu aprendizazen, tanba halo limpeza presija han tempu oitoan,” dehan Filomena.

Diretora mos lamenta no triste tanba eskolah refere laiha kampu desportu, hodi realiza atividade extra kurikular tanba ne’e kada loron Sabadu sira so halo deit genastiku. Liga ho merenda escolar kontinua lao nafatin

Diretora ne’e rekomenda ba governu atu hadia eskolah ne’e, tanba sala ba professor laiha fatin, tau komputadores sira mos laiha, tenki foti fali sala balun para hodi uja ba professores sira.

Iha fatin hanesan, Diretor Edukasaun Municipiu Ainaro, Celestino Magno Pereira ba Jornalista TAFARA.TL hatete haree ba eskola ne’ebe mak laiha lutu, kuandu tempu udan ne’e familiar ho animal sira. Hanesan edukasaun munisipiu ne’ebe mak reprezenta hela edukasaun Nasional iha munisipiu, hanoin katak programa ne’ebe mak iha, haree liu ba iha area infrastutura kona ba moru ne’ebe mak atu hadulas eskola ne’e seidauk iha prioridade, tanba prioridade uluk mak tenki iha edifisiu ida-diak, labarik sira atu halo aprendizazen ne’e mos tenki iha mahon, labele iha loron laran no labele iha udan.

Director Minicipiu ne’e mos afirma katak, Mestre hira ne’ebe mak hamahan a’an iha Ministeriu Edukasaun, sai hanesan edukador ba estudante sira, tenke iha inisiativu, atu nune’e asegura eskola fatin husi animal sira ne’ebe mak hela besik, tanba fatin ne’ebe mak sira servisu ba, sira raik mak tenke zere.

La signifika buat hotu ne’e ita dependente ba Governu, ita iha buat ruma ne’ebe mak ita bele haree atu fasilita buat sira ne’,e atu nune’e animal labele tama iha eskola,” dehan Ceslestino

Eskolah nudar nesesidade fundamental ne’ebe ema hotu presiza tau matan, liu-liu governu. Bainhira estudante sira tuir prosesu aprendizajen presija ho kondisaun ne’ebe adekuadu, atu nun’e estudante sira bele konsentra ho diak, no bele hatudu rezultadu diak liu hosi sira estudu. Estudante sira iha mehi katak, sira bele iha direitu hanesan hodi bele asesu eskolah no edukasaun ne’ebe kualidade, no laiha diskriminasaun entre eskolah iha sidade no area rural. Total professor permanente iha EBC hamutuk 13 no kontraktadu 11, Professores EBC ho EFB hamutuk 54. Total estudante ne’ebe mak iha 423, prosesu aprendizazen lao normal hanesan babain. *[Bebiana Soares | Editor: Zevonia Vieira | TAFARA.TL | 21.01.2018]

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *