Sunday , June 24 2018
Home / Eleisaun Parlamentar / Aurea: Promesa PARPOL Labele Hanesan Propaganda Politika De’it
Ema ho Difisiensia. [Foto: UNDP Timor-Leste]

Aurea: Promesa PARPOL Labele Hanesan Propaganda Politika De’it

Iha kampania partidu politika sira iha promesa oi-oin ne’ebe hato’o iha sira nia komprimisu politika, tanba ne’e povu rekomenda parpol tenke realiza promesa hirak ne’e wainhira kaer ukun.

Hatan ba preukupasaun ne’e Aurea moniz do Rego (38) iha nia intervensaun hateten, hanesan povu aseita se deit mak atu kaer governu, importante mak labele halo povu sai vitima no realiza promesa ne’ebe hato’o labele hanesan propaganda politika deit.

“Ami povu kiik hakarak se deit mak atu tuur ami aseita, maibe ami lakohi sai tan vitima, boot sira tenke haree malu. Partidu barak tama ona iha ami nia aldeia ne’eba, saida mak sira promote dalaruma sira la realiza, kuandu partidu ne’e seidauk manan sira promote buat barak, maibe to ikus tuur tiha dalaruma haluha ita. promesas ne’ebe partidu politika hato’o tenke realiza labele hanesan propaganda politika deit”, hateten Aurea iha nia servisu fatin Sentru Joventude Bekora (13/07)

Komunidade Suku Bekora ne’e mos salienta katak, partidu politika ne’ebe mak kaer ukun ba periodu tinan lima mai, tenke hadia buat ne’ebe mak la’o seidauk lolos, ne’ebe akontese iha povu nia leet.

Entertantu populasaun Munisipiu Bobonaru Postu Administrativu Maliana, Antonio Soares (30), bainhira entervista ho jornalista TAFARA.TL via media sosial WhatsApp fo nia komentariu katak, bainhira parpol sira hetan fiar husi povu hodi ukun, tenke realiza sira-nia komprimisiu politika

“kuaze maioria partidu politiku hotu iha rai ida ne’e iha komprimisu ne’ebe mesak diak no furak, maibe realidade ita restaura ita-nia independensia tinan 15 ona, maibe kiak no mukit seidauk ses husi povu Timor, ne’e duni husu ba partidu politika hotu, tenke realiza sira nia komprimisu katak atu hasai tiha povu ida ne’e husi kiak no mukit. Ba kualker partidu ne’ebe lidera governu Timor-Leste”dehan Antonio ne’ebe durante ne’e haknaar-an hanesan juventude agrikultor iha nia munisipiu.

Nune’e mos Juventude Suku Bekora Gil Pereira ba jornalista TAFARA.TL afirma katak wainhira partidu ne’ebe kaer ukun tenke kria fatin servisu ba juventude, atu nune’e labele kria konflitu.

“Husu ba ida ne’ebe mak atu ukun, kria fatin servisu ruma, iha suku no aldeia, tenke tau netik servisu ruma ba joven sira, atu nune’e joven labele kria problema. Joven barak mak seidauk tuur hakmate iha nia fatin, tanba kampu servisu menus liu. Rekomenda ba governu foun mai ne’ebe sei lidera, husi kualker partidu tenke tau prioridade ba juventude iha Timor laran tomak, atu nune’e evita joven labele kria konflitu”, Gill ho nia esperansa boot

Iha parte seluk maluk ho difisiensia, Paulina Soares (30) ba TAFARA.TL esplika katak partidu politiku ne’ebe hetan fiar husi governu ba tinan lima mai, sira tenke hanoin ona saida mak sira promete ba povu iha tempu kampanna.

“Hau iha problema ho matan, partidu politiku sira ne’ebe sei hetan fiar, tenke tau importansia ne’ebe espesifiku ba ema ho defisiensia matan no sira seluk”,Paulina nakonu ho esperansa ba parpol sira.

Povu nian esperansa iha partidu politiku sira nian liman, lia fuan ne’ebe sira promete ema hotu iha esperansa boot atu bele realiza, siknifika katak laos koalia iha ibun tutun deit. Maluk ho difiensia sira mos halerik hela sira nian direitu, atu bele moris ne’ebe adekuadu nudar sidadaun Timor.*[Gil Soares | TAFARA.TL | Editor: Zevonia Vieira | 13.07.2017].

About Gilberto Soares

Gilberto Soares, Jornalista TAFARA.TL desde tinan 2015 ate a data.

Check Also

Marí: Sai Opozisaun Forte Laos Hatun Governu, Maibe Atu Governu Bele Iha Sentidu Responsabilidade

“Hanesan sasuit ida hasai kutu nian, sasuit la serve deit para sui hau nia fuk …

Leave a Reply

Your email address will not be published. Required fields are marked *