Thursday , February 21 2019
Home / Sosial & Politika / Bankada Fretilin Sauda no Respeita PR nia Desizaun Promulga OJE 2019
Bankada Fretilin halo konferensia imprensa ho jornalista sira iha parlamentu nasional. [Foto: Media bankada Fretilin | 30.11.2018]

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, ho razaun tanba sei benefisia ferik no katuas sira, maluk sira ne’ebe simu bolsa da Mae. Bankada Fretilin liu hosi komunikadu imprensa deklara katak simu no respeita desizaun Prezidente da Republika nian no fiar mos katak hafoin hare no tetu opsaun hotu, Prezidente Repúblika hola desizaun ida ne’ebé mak diak liu ba Nasaun no ba Povu nia diak.

Bankada Parlamentár Fretilin mós konkorda no iha preokupasaun ne’ebé hanesan ho Prezidente Repúblika kona ba Orsamentu Jerál Estadu tinan-2019. Bankada Parlamentár Fretilin husu ba Parlamentu Nasionál no Governu atu fo atensaun maka’as ba seitór sira ne’ebé bele garante dezenvolvimentu ekonomia no dezenvolvimentu sosiál ne’ebé sustentável iha Orsamentu Jerál ba tinan sira tuir mai.

“Bankada FRETILIN garante sei kontinua hala’o ninia funsaun tuir kompetensia ne’ebé nia iha hodi fiskaliza ezekusaun OJE ne’ebé VIII Governu hala’o, ho forma ne’ebé atu kontribui hodi maximiza benefisiu ba ita nia povu no ita nia rain doben”, esplika iha komunikadu imprensa, 12/02.

Iha loron 11/02 Prezidente da Republika Francisco Guterres Lú-Olo hato’o mensajen ba Nasaun hodi esplika ninia razaun ba promulga proposta Lei Orsamental ba tinan-2019 ne’ebé Parlamentu Nasionál altera no aprova iha loron31/01.

“Sei benefisia ferik katuas sira, maluk sira ne’ebé simu bolsa-da-Mãe, ita-nia labarik sira-nia merenda eskolár, veteranus no sidadaun sira seluk ne’ebé sei simu transferénsia públika” no mós tambá Prezidente Repúblika “hakarak fo dalan ba Governu selu lalais tusan Estadu nian ba sektór privadu hodi nune’e, Governu onra kompromisus Estadu nian ho sektór ne’ebé ajuda haburas ekonomia no moris-di’ak Povu nian”, hateten Lú Olo liu hosi deklarasaun oficial ba povu.

Maske nune’e, Prezidente Repúblika hato’o mós ninia laran susar tambá orsamentu ne’ebé Parlamentu Nasionál aprova kontinua fo alokasaun ne’ebé ki’ik ba seitór importante sira hanesan edukasaun, saúde, agricultura, turizmu, bee-mós no saneamentu báziku.

Parlamentu Nasionál halo reapresiasaun ba Orsamentu Jerál Estadu 2019 hafoin veto husi Prezidente Repúblika. Iha reapresiasaun Orsamentu Jerál Estadu, Parlamentu Nasionál hasai montante miloens $ 650 ba sosa asoens partisipasaun husi kompania ConocoPhillips no Shell, tanba kontempla tiha ona iha Lei Atividade Petrolíferu ne’ebé Prezidente Repúblika promulga. Reapresiasaun Orsamentu Jerál Estadu ho montante biloens $ 1,482 aprovadu ho votus 40 no 25 kontra. * [Zevonia Vieira | TAFARA.TL | 12.02.2019]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

KI Husu Jornalista Sira Tenke Fo Solidariedade Ba Malu, Problema Liberdade Imprensa Ita Hotu nian

“Problema liberdade imprensa ne’e ita hotu nia problema, ne’ebe se deit mak infrenta problema ita …

Leave a Reply

Your email address will not be published. Required fields are marked *