Sunday , June 24 2018
Home / Sosial & Politika / Bela: Igualdade Jeneru Parte Hosi LGBT, Rui: Komunidade LGBT Mos Kontribui Ba Dezenvolvimentu Nasaun
Bela Galhos koalia iha loron mundial feto iha Timor Plaza. [Foto: Zevonia Vieira | 10.03.2018]

Bela: Igualdade Jeneru Parte Hosi LGBT, Rui: Komunidade LGBT Mos Kontribui Ba Dezenvolvimentu Nasaun

“Hau koalia tanba hau tenke koalia, ita koalia mudansa barak ba igualdade jeneru, ita koalia konaba direitus humanus, mak ita koalia inklusivu, ema hotu nia direitu hanesan, laos direitu selektivu”. Bela Galhos

Iha era globalizasuan grupu ativista sira kontinua luta igualdade jeneru, laos deit luta ba direitu feto no mane maibe bainhira koalia konaba igualdade jeneru, inklui mos grupu inklusivu mak hanesan Lesbian, gay, Biseksual no Transgender [LGBT].

Iha loron mundial feto, ne’ebe organiza hosi embasada Australua iha Timor-Leste, hodi akumula organizasaun feto, movimentu feto no estudante sira hosi universidade, hodi bele halo refleksaun np fahe esperiensia saida mak bele halo ba iha promove igualdade jeneru.

Iha programa refere panelista no nudar ativista ne’ebe kontribui nia an hahu kedas hosi okupasaun Indonesia, Bela Galhos iha intervensaun hatete katak, koalia konaba igualdade jeneru, maibe ema nungka hakarak koalia konaba LGBT.

“Igualdade jeneru parte hosi LGBT ka lae? Ema barak sedauk komprende ida ne’e. Hau koalia ida ne’e tanba hau familia hosi LGBT iha Timor-Leste, hau lakohi atu taka an no komunidade sei kontinua ignorante. Hau koalia tanba hau tenke koalia, ita koalia mudansa barak ba igualdade jeneru, ita koalia konaba direitus humanus, mak ita koalia inklusivu, ema hotu nia direitu hanesan, laos direitu selektivu”, hateten Bela Galhos.

Bela Galhos fo hanoin ba partisipante sira katak, feto veterana sira ne’ebe uluk fo an ba nasaun ne’e mak nia xavi, “ita valorize feto, hahu kedas hosi uma laran no tama mos b aiha komunidade. Feto ne’e bele demais maibe ita hili malu ne’e mak sai problema, ita diskrimina malu, ita allergy malu fali ba diferente”.

Iha tempu VI Governu Konstituisional, ne’ebe lidera hosi Primeiru Ministru, Dr. Rui Araújo hatoo mesajen konaba familia simu joven LGBT iha Timor-Leste. Iha mesajen ne’e esplika ema hotu iha potensiál atu kontribui ba dezenvolvimentu nasaun ne’e, inklui membrus husi komunidade LGBT.

“Diskrimina, disrespeita no halo a’at ba ema balun tamba deit sira nia orientasaun seksual no identidade jéneru, sei la fo benifísiu ba ita hotu no ba nasaun. Timor-Leste koñesidu iha rejiaun no iha mundu internasional hanesan nasaun ne’ebe mak promove no proteje direitus umanus. Maski nune’e, iha ema barak mak sei hetan diskriminasaun. Foinsa’e balun sei moris iha violénsia nia laran. Dala ruma hahalok hirak ne’e mai husi uma laran rasik”, hateten Rui Araújo

Mesajen ne’ebe hatoo hosi Dr. Rui Araújo iha governu anterior ho lian forte katak violénsia ne’e krime, diskriminasaun ne’e krime. Timor-Leste nia riku soin lolo’os mak nia ema, liu-liu labarik no foinsa’e sira. Violénsia no diskriminasaun bele afeta futuru nasaun ne’e nia saúde fíziku no mentál. Nasaun ida atu dezenvolve ho diak, labarik hotu presiza moris iha ambiente ne’ebe fo protesaun, domin, no oportunidade ba sira atu dezenvolve sira nia an, la hare’e ba sira nia diferensa. Inan-aman presiza simu oan sira, eskola presiza kria kondisaun ne’ebe bele proteje estudante hotu, “hau husu ba ita hotu atu simu malu, atu hare’e malu ho diak no respeita malu. Ukun Timor nian hanorin ita atu respeita malu. Maromak mos hanorin ita atu hadomi malu. Prinsípiu husi nasaun demokrátiku mak ema hotu moris livre ho dignidade no respeita ba malu. Liu husi ne’e, ita bele harii nasaun ida ne’ebe inkluzivu, atu ema hotu bele partisipa iha prosesu dezenvolvimentu no aproveita ho diak independénsia ida ne’ebe ita hotu uluk luta ba”. * [ Zevonia Vieira | TAFARA.TL | 10.03.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Sistema Online Iha Klinika Becora, Fasilita Inan Isin Rua Sira

Saude nudar seitor importante iha ema ida nian moris, ho saúde ne’ebe diak sei salva …

Leave a Reply

Your email address will not be published. Required fields are marked *