Saturday , April 20 2019
Home / Eleisaun Parlamentar / Belun Fasilita Treinamentu Peskiza Elisaun Parlamentar Iha TL
NGO Belun ho Universidade Australia fasilita treinamentu kona ba peskiza ba elpar.[Foto: Zevonia Vieira | TAFARA.TL | 08.07.2017].

Belun Fasilita Treinamentu Peskiza Elisaun Parlamentar Iha TL

Elisaun parlamentar hanesan programa ne’ebe importante ba povu hodi desidi se mak serve atu ukun nasaun ne’e. Nudar nasuan demokratiku, konstituisaun fo direitu ba ema hotu hodi partisipa.

Total partidu hamutuk 20 no Bloku Unidade Popular, ne’ebe hamutuk 21 kontestan mak komesa faan sira nian programa iha terenu, hodi nune’e bele hetan fiar hosi povu.

Sosiadade sivil sira tau atensaun maka’as ba prosesu kampanna, loron votasaun prosesu sura votus, atu hare lalaok elisaun ne’e lao tuir duni Lei no regulamentu haruka ka lae.

NGO Belun liu hosi programa AtRes, fasilita treinamentu kona ba oinsa halo peskiza ba elisaun iha Timor-Leste.

Direitor NGO Belun, Luis Ximenes ba TAFARA.TL esplika katak, treinamentu ne’e parseria entre Belun ho Univerisdade Australia, hodi ajuda kolega monitorizador sira ne’ebe mak sei tau matan iha nivel posto administrative, hodi hare lalaok elisaun parlamentar, hodi hare liu kona ba saida mak partidu politiku sira halao, karik mosu iregularidade ka kontra Lei elisaun, hodi nune’e bele hato’o rekomendasaun xave sira, hodi hadia ba iha futuru.

Tuir Direitor Luis Ximenes katak, peskiza ne’ebe mak partisipantes aprende foka liu ba peskiza akademika nian. Ekipa sira ne’ebe tuir sei tau matan liu ba insidente jeral no insidente ba violensia eleitoral.

Hatan ba perguntas hosi TAFARA.TL, kona ba dadus iregularidade ne’ebe mak Belun detekta, Direitor Luis Ximenes, esplika katak liu hosi esperiensia ba elisaun prezidensial, kazu violensia eleitoral akontese iha tempu votasaun.

“Ema lanu pois tama ho motor ba sentru votasaun, balun ameasa, balun iha prosesu sura votus hakarak ba halo influensia, balun detekta bulletin de votus antes uza maibe komesa nakles no foer, balun insulta malu iha loron votasaun”, esplika Luis Ximenes.

Direitor Belun, Luis Ximenes, rekomenda ba instituisaun hanesan CNE, STAE no governu rasik hodi kontinua halo edukasaun sivika liga ho elisaun no votantes, hodi konyesementu povu nian ne’ebe bele aumenta, labele hein besik elisaun mak foin halo edukasuan sivika.

Iha tempu hanesan, Program Manager Atensaun no Responde Sedu (AtRes), Marilia Oliveira da Costa, ba TAFARA.ORG hateten, treinamentu ohin loron ne’e liga ba liu militante sira nebe tuir kampanna, kampanna nia lalaok lao oinsa. karik iha durante kampanna uza lingua balun ne’ebe insulta ema. Iha loron votasaun ekipa mos sei koalia ho komunidade sira katak vota ho lolos ka lae? Vota ho konsensia ka laiha obrigatoriu, vota laos tanba familia ou laos tanba rasaun seluk. Ida ne’e hanesan peskiza klean oituan. Sira hare mos iha votasaun ne’e buat hotu tuir prosesu ka regulamentu ka lae? Oinsa servisu fiskais sira nian, polling staff, CNE no STAE sira nian apoiu no mos iha prosesu apuramentu atu bele monitoring klean liutan.

Tuir observasaun durante kampanna katak, ireguladade ne’ebe akontese liga ho kampanna katak partidu sira la halo tuir orariu.

“Ami sei kumpila no labele fo sai lai. Iha parte positive mak partidu politika sira komesa la lori sira nian masa hosi Dili mak ba municipio, sira halo rapidu maske tarde. Iha semana kotuk liu ba, Belun mos hetan informasaun katak akontese insidente iha Viqueque ne’ebe destroy komunidade nian uma. Dadus sira ne’e mak ami sei tau hamutuk depois sei aprezenta ba governu, CNE, STAE no PDHJ”, Esplika Marilia da Costa.

Partisipante hosi Municipio Viqueque, Eujenio Pinto. Iha esperansa boot liu hosi treinamentu ida ne’e, bele aumenta konyesementu ne’ebe klean liutan, hodi bele halo monitorizasaun ne’ebe bele fo benefisiu ba povu.

“Nudar ema sosiadade sivil, sai hanesan ema netral, la hare ba koor. Ami nia prinsipiu importante liu mak oinsa ami bele observa elisaun ne’e bele lao diak no fo benefisiu ba povu tomak”, konfesa Eujenio.

Monitorizador hosi Municipio Bobonaru, Maria Verdial, ba TAFARA.TL hateten katak liu hosi treinamentu ne’e bele sai hanesan mata dalan, ho nune’e bele observa elisaun tuir duni sistema.

“Ami bele observa elisaun ne lao ho susesu no laiha violensia, laiha obrigasaun hosi ema seluk hodi ba vota”, Tenik Maria Verdial.

Hosi treinamentu ne’e, organizasaun sosiadade sivil, Belun hakarak atinji oinsa komunidade sira bele hato’o direitamente informasaun no iregularidade no sai hanesan rekomendasaun ba governu, atu nune’e tinan lima oin mai, bele halo mudansa ba politika ruma, hodi nune’e nasaun bele forte liutan no dezenvolvidu liutan.

Treinamentu ne’ebe hala’o iha loron 7/07, iha Tower Fatuhada, hetan apoiu finanseiru hosi Universidade Australia. Partisipantes hamutuk 86, feto 25 no mane 61, no sei halo monitorizasaun iha posto administrative 43, iha suku 275.* [Zevonia Vieira | TAFARA.TL | 08.07.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *