Home Sosial & Politika Komunidade Iha Kamedar Natarbora Halerik Ba Bee Moos no Eletrisidade

Komunidade Iha Kamedar Natarbora Halerik Ba Bee Moos no Eletrisidade

118
0
SHARE
 Komunidade Iha Kamedar  Natarbora Halerik Ba Bee Moos no Eletrisidade

Caption: komunidade iha Aldeia Uebani [Kamedar], Suku Barique, Posto Adminisrativo Barique/Natarbora, Municipio Manatuto. [Foto: Martinho Moniz | 22.10.2019]

“Ami la ezije atu governu fó ami osan hanesan funsionariu públiku, ami presiza deit bee moos ne’ebé sufisiente, eletrisidade nomós estrada diak, nune’e bele fasilita ami”. Francisco

Halerik hosi povu sira iha area rural laiha rohan, tama ona tinan 20 referendum povu sai ukun kolonialismu maibe moris mukit la ses hosi sira nia moris.

Nesesidade importante no fundamental nudar umanu sai ezijensia ne’ebe mak to’o ohin loron povu ezije. Situasaun komunidade iha Aldeia Uebani [Kamedar], Suku Barique, Posto Adminisrativo Barique/Natarbora, Municipio Manatuto, mais menus komunidae 200 resin halerik ba susar ne’ebe sira hasoru, tanba to’o ohin loron sedauk bele asesu bee moos no laiha eletrisidade.

Membru komunidade Uebani (Kamedar), Manuela Alves hateten ba www.tafara.tl, aleinde bee moos sira mós susar tebes atu asesu ba merkadu, tanbá estrada ladiak, nune’e susar atu transporta sira nia produtu agrikola nomós animal sira ne’ebé sira hakiak, “dala ruma sira tutur sira nia produtu husi Kamedar mai iha Kribas hodi fa’an”.

Entretantu, Catequista Uebani, Barique, Franscisco M. dos Santos, tenik katak sira la ezije governu atu osan maibe bele responde ba nesesidade komunidade nian ne’ebe urgente.

“Ami la ezije atu governu fó ami osan hanesan funsionariu públiku, ami presiza deit bee moos ne’ebé sufisiente, eletrisidade nomós estrada diak, nune’e bele fasilita ami”, ho esperansa boot Francisco hatoo ba TAFARA.TL

Dala barak ona autoriedade aldeia no suku refere hato’o proposta ba parte kompetente relasiona ho difikuldades ne’ebé komunidade enfrenta, maibé to’o oras ne’e ladauk iha resposta. Iha tempu mak hanesan, www.tafara.tl hakat ba Ensinu Baziku Filial 01 Camedar, observa katak, fasildiadedes eskola hanesan meza no kadeira barak mak avaria.

Entretantu Isabel Freitas afirma, produtu agrikola ne’ebé sira kuda barak liu mak sira konsumu iha uma laran no fó han ba animal, la lori ba merkadu tanba estrada ladiak.

Tuir peskiza hosi HAK nian hatudu katak postu Saude sira ne’ebe hetan problema konaba bee moos no sintina iha suku sira, hosi municipiu neen.

Bazea ba analiza grafiku hatudu iha okos, ami amostra kondisaun konaba postu saúde hira mak iha no laiha bee moos no postu saúde hira mak iha bee moos no laiha sintina entre suku sira ne’ebe mak HAK monitoriza ba.

Bazea ba monitorizasaun HAK nian iha hosi municipiu neen, kuaze município neen, kuaze município hotu iha ona postu saúde iha kada suku, mesmu hanesan ne’e iha postu saúde balun maka sei lamenta konaba asesu ba bee moos no seidauk iha sintina.

Postu saúde 39 asesu ba bee moos no 11 maka seidauk asesu ba bee moos, nune’e mos iha postu saúde 42 maka iha sintina no 7 mak seidau iha sintina. Presiza asesibilidade katak servisu mediku no kauza determinante sira saúde nian hanesan bee moos no facilidade sanitária adekuadu, hela iha fatin ne’ebe ema bele hakbesik an bah o segurnasa, inklui iha área rural sira, bee moos sai nafatin preokupasaun populasaun.

Bee moos no saneamentu sai rekursu importante hodi assegura comunidade sira bele moris saudável no sustentável.  Tuir peskiza Saude no Demografiku 2016, comunidade iha área rural 42% mak seidauk asesu bee moos besik uma, iha aldeia balu fonte bee iha, maibe laiha kanalizasaun, tanba ne’e obriga comunidade sira, liu-liu feto no labarik sira, tenke ba kuru bee iha mota kuak, hodi utiliza ba necessidade loron-loron. Situasaun ida ne’e la seguru ba sira, particularmente feto no ema ho defisiensia ne’ebe vulnerável liu atu asesu bee iha mota kuak hodi kuru bee.

Timor-Leste nia Planu Estratejiku Dezenvolvimentu Nasional [PEDN] 2011-2030, descreve objetivu sira ba faze da uluk [2011-2015], defini katak 75% husi populasaun rurál iha asesu seguru no sustentável ba bee moos [potável]; realidade faze ida ne’e seidauk atinje, tuir DHS 2016, só 58% husi populasaun rurál iha asesu ne’e

Konstituisaun RDTL, artigu 6 Objetivu Estadu nian hateten katak, “Harii sosiedade ida-ne’ebé hatuur iha justisa sosiál, hodi hakiak sidadaun sira-nia moris di’ak ba isin no ba klamar”.

Estadu nia responsabilidade mak atu garante povu nia moris di’ak liu husi nia fornesimentu servisu báziku sira ba ninia sidadaun. Aleinde ne’e iha Dekretu-Lei No. 4/2004 ne’ebé regula kona ba rejime distribuisaun bee ba konsumu públiku ho nia objetivu mak atu fornese bee moos ba povu tomak iha Timor-Leste nune’e bele garante saúde públiku. *  [Martinho Moniz | Editor: Zevonia Vieira | TAFARA.TL | 22.10.2019].