Home Sosial & Politika HAK Lansa Lian Agrikultura, Manuel: Ai-Han Mak Direitus Fundamentu Sidadaun nian

HAK Lansa Lian Agrikultura, Manuel: Ai-Han Mak Direitus Fundamentu Sidadaun nian

559
0
SHARE
HAK Lansa Lian Agrikultura, Manuel: Ai-Han Mak Direitus Fundamentu Sidadaun nian

Caption: Diretor Asosiasaun HAK, Manuel Monteiro halo aprezentasaun konaba rezultadu peskiza konaba Tranzisaun Agroekolojia ba Soberenia Ai-Han [TAPSA]. [Foto: Copyright HAK | 03.08.2019]

Asosiasaun Hak lansa Buletin Lian Agrikultura  ho titlu Tranzisaun Agroekolójia Ba Soberania Ai-Han [TAPSA]. Liu hosi lansamentu Buletin TAPSA, Direitor Asosiasaun HAK Manuel Monteiro hateten objetivu hosi lansamentu livru ne’e, hodi fahe rezultadu monitorizasuan situasaun direitus umanus tuir deskobrimentu HAK nian durente periudi 2018 iha Munisipiu Ainaro, Aileu, Baucau, Dili, Ermera n Viqueqeu, ba komunidade en jeral no Instituisaun relevante sira.

Objetivu seluk katak atu halo kampanye no advokasia ba Instituisaun Estadu relevante sira ho nia finalidade hodi hadiak diak liutan, situasaun direitus umanus iha Timor-Leste.

“Direitu Ekonomia Sosial kultural mak ami foti agrikultura, edukasaun, saude, asumtu bee moos no asumtu rai. Ita hare katak ita nia problema ai-han ne’e problema boot ba ita nia nasaun. Ai-han sai hanesan direitus fundamentu sidadaun nian, tanba ne’e estadu iha obrigasaun atu responde sidadaun sira nia direitu. Oinsa mak ita bele hatene katak estadu kumpri sira nia obrigasaun, premeiru hare hosi politik ministeriu relevante sira ne’e politika iha ka lae, atu garante sidadaun sira nia direitu fundamentu sira, iha ka lae alokasaun fundu orsamentu jeral estadu nian, ne’e garante ka lae politika ne’e”, hateten Manuel Monteir, iha salaun HAK 02/08.

Tuir relatoriu ne’ebe HAK aprezenta esplika katak, Ai-han nudar komponenti ida ne’ebe labele hasai ka hadook hosi ema na moris, tanba ne’e ai-han nudar dirietu fundamentu, ne’ebe Estadu parte sira Konvensaun Internasional Direitu Ekonomia, Sosial no Kultura, iha obrigasaun hodi kria kondisaun, atu nune’e ninia sidadaun sira iha vontade hodi halao vida agrikola, hodi nune bele produs ai-han neebe sufisiente ba sira ninia nesesidade konsumu no distribuisaun ba merkadu lokal, hodi hakonu sira nia nesesidades baziku sira.

HAK ne’ebe ho ninia visaun no misaun hodi defende vitima violasaun direitus umanus, hakbiit kapasidade komunidade, liu hosi transferensia matenek, dezenvolve povu nia kualidade moris, dezenvolve konnesementu lokal no partisipa iha dezenvolvimentu n kontrola sosial, deklara katak agrikultura sai hanesan fator kulminante, hodi determina povu Timor-Leste nia moris em jeral.

Produsaun Ai-Han

Tuir dadus estatiska agrikultura nian hosi governu Timor-Leste nia situasaun produsaun ai-han, sei nafatin laiha progresu boot hafoin liu tiha tinan 16, maske governu no ajensia dezenvolvimentu sira gasta ona osan barak ba seitor agrikultura, maibe nafatin hatudu katak produsaun agrikultura kontinua tun.

Alokasaun Orsamentu Jeral Estadu [OJE] ba seitor agrikultura no peska iha tina 2015 tokon $34.457, iha 2016 tun ba tokon $24.862, iha 2017 tun ba tokon $21.962 no iha 2018, tun ba $14.679.

Liga ho alokasaun orsamentu ba agrikultura no peska, Yayasan HAK hateten katak ne’e sai preokupasaun boot ho tendensia ida ne’ebe refleta prioridade sira haktuir ona iha Planu Estratejiku Dezenvolvimentu Nasional [PEDN] 2011-2030.

“Ita nia merkadu sira nafatin domina hosi ai-han importau, no mal-nutrisaun kontinua sai problema boot. Situasaun ne’e ita bele hare hosi dadus ne’ebe hetan durante peskiza, hatudu katak numeru konsumu boot liu numeru produsaun”, rezultadu peskiza hosi HAK

Tinan 2007 Timor-Leste nia produsaun hare hamutuk 60.424 ton, iha tinan 2015 produsaun foos hamutuk 60.361 ton, iha tinan 2017, produsaun tun makaas ba 37.000 ton, no iha previzaun katak sei tun ba 30.000, iha tinan 2018 tuir dokumentu MAP nian konaba seguransa ai-han no nutrisional 2017 hatudu katak Timor importa mais ou menis 40% hosi sereais [foos no batar] ne’ebe komunidade kunsume.

Iha relatoriu peskiza alende mensiona konaba produsaun ai-han, sita mos konaba produsaun Fini, kondisaun Tratores no kondisaun irigasaun.

Lansamentu Buletin TAPSA hosi HAK realiza tanba hetan apoiu hosi Terre Solidaire, AFD no Unidade Apoia Sociedade Civil, Gabinete do Primeiro Ministro. Lansamentu ne’e halao iha salaun Y-HAK, iha loron 2 Agustu 2019, ne’ebe hetan partisipasaun hosi PDHJ, membrus HASITIL, governu no academia hosi Universidade Timor Lorosa’e. * [Zevonia Vieira | TAFARA.TL | 03.08.2019]