Wednesday , January 17 2018
Home / Sosial & Politika / CI Kontinua Kampanna Kontra Nutisia Falsu Ba Media Online PolitikaTimor
prezidente CI virgilio Guterres no membru konsellor CI halo konferensia imprensa hodi publika rezultadu monitorizaun no analize kobertura media ba elpar.[Foto: Zevonia Vieira | TAFARA.TL | 08.08.2017].

CI Kontinua Kampanna Kontra Nutisia Falsu Ba Media Online PolitikaTimor

Conselho Imprensa kontinua preokupa ho informasaun falsu (Hoax news, red) ne’ebe mak media online Politikatimor.blogspot.com, nafatin publika informasaun sira ne’ebe mak bele estraga unidade no establidade iha nasaun ida ne’e.

Ba jornalista sira liu hosi konferensia imprensa iha Kintal boot, dili loron 8/08, Prezidente CI, Virgilio Guterres informa ba jornalista sira katak, CI identifika ona media online politikatimor.blogspot.com hosi inisiu fo sai ona nutisia falsu, ne’ebe iha tendensia soran entre lider politiku sira.

“Iha loron 4 to loron 6, media online politikatimor laiha news foun mosu mai, hein katak se nudar Timor oan mak halo hahalok ida ne’e, diak liu hapara. Uza kapasidade professional hodi halo servisu ne’ebe lolos no la halo nutisia falsu ka hoax, tanba ida ne’e laos parte hosi liberdade imprensa tanba informasaun sira ne’e mesak mai hosi imajinasaun”, esplika Virgilio Guterres.

Bainhira TAFARA.TL husu on aba karik deskonfia ona ema ka grupu balun ne’ebe mak publika nutisia falsu?

Prezidente Virgilio Guterres esplika katak, hosi analiza pesoal bele identifika ema balun ka simpatizantes balun hosi partidu ida, hodi halo propaganda politika durane kampanna eleitoral.

“CI kontinua halo kampanna kontra hoax. Imposivel nutisia falsu ne’e la mosu se ema ruma iha kotuk. CI laiha kompetensia atu buka tuir, maibe hanesan Prezidente CI hateten katak rai Timor ne’e kiik demais, fasil atu detekta”, tenik Virgilio Guterres.

Prezidente CI rekomenda ba media nasional sira atu kontribui hodi kontra nutisia falsu (Hoax news, red) tanba media hotu iha responsabilidade atu identifika no halo kampanna hodi kontra hoax.

Iha parte seluk TAFARA.TL mos intervista ho Prezidente Asosiasaun Jornalista Timor-Leste  (AJTL), David Hugo da Silva kona ba nutisia falsu ne’ebe mak sai preokupasaun CI no orgaun komunikasaun professional sira.

David Hugo hateten katak, AJTL apoiu nafatin CI nian servisu, liu-liu liga ho asumtu hoax ka news falsu, tanba ida ne’e la diak, sei bele estraga estabilidade no paz iha rai Timor.

“AJTL apoiu hodi kontra hoax liu hosi kampanna, husu ba jornalista sira atu labele hetan influensia hosi ema ga grupu balun ne’ebe mak hakarak kria hoax. Jornalista sira tenke klarifika didiak informasaun sira antes hatun. Jornalista tenke matan moris no kritika makaas liutan, atu bele evita nutisia falsu, tenke ho dadus kompletu hodi nune nutisia ne’ebe publika mos la kontra kodigu etika”, hateten David Hugo.

Prezidente AJTL mos informa katak AJTL kontinua esforsu an hodi fo hanoin ba jornalista sira atu mantein profisaun hanesan jornalista professional.* [Zevonia Vieira | TAFARA.TL | 08.08.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Luis: PPN Blokea Ajenda Hosi AMP, Branco: AMP Husu Ajenda Ba Sira nian Interese

“Akontese maka ajenda deit, ba interese grupu ninian, atu hadau poder, entaun ami hare katak …

One comment

  1. (1) Ah… naran.blogspot.com, naran.wordpress.com mos CI preokupa, entaun serbisu barak los mak hein hela, numeru sitiu uza domain 2 ne laos ituan, tanba la presiza konhesimentu as hodi kria sitiu gratuitu hosi “sampah” rua ne. (2) Ida tan, iha mos blogspot seluk mak ninia konteudo ne la merese atu publika, hahu hosi asuntu politika ate pornografia (buka deit iha google), CI bele hare mos hirak ne’e…?

Leave a Reply

Your email address will not be published. Required fields are marked *