Thursday , February 21 2019
Home / Sosial & Politika / Clinica Bairo Pite Afeta Krize Orsamentu, Mana Lú Husu Timor Oan Iha Solidariu Tulun Clinica Ne’ebe Serbi Ona Povu
Clinica Bairo Pite ne'ebe serbi ona povu kbiit laek sira liu-liu ba moras TBC. [Foto: Martinho Moniz | 27.03.2018]

Clinica Bairo Pite Afeta Krize Orsamentu, Mana Lú Husu Timor Oan Iha Solidariu Tulun Clinica Ne’ebe Serbi Ona Povu

Kada fulan Clinika nee baibain gasta osan Dolares Americano rihun 48, ba selu funsionariu, eletrisidade, bee no ba ekipamentu, hetan apoiu husi Organizasaun Internasional no Governu, mosu problema internal, asosiasaun haketak malu, krize politika iha Timor-Leste, Clinica refere la asesu ba apoiu husi Governu no enfrenta krize orsamentu iha fatin refere.

Relasiona ho asuntu ne’e, iha 27/03, Organizasaun Sosiedade Sivil halibur malu iha edifisiu Asosiasaun HAK, hodi deskute kona-ba problema ne’ebe clinika Bairo Pite enfrenta no nia estratejia intervensaun ba oin.

Hafoin sorumutuk ne’e, Diretor AJAR Jose Luis de Oliveira ba TAFARA.TL informa katak clinica Bairo Pite durante nee servisu halo atendementu publiku ba maluk sira nebe kbiit laek mai konsulta iha ne’eba, dala barak kbiit laek sira nee laos deit husi Dili maibe husi foho. Agora daudaun Clinica infreta hela krizi tamba konsekuensia husi problema internal balu.

“Uluk clinica nee Mana Lu ho Doutor Dani mak funda klinika iha 1999, iha tempu Indonesia nian, sira funda clinica nee hodi fo atendementu ba ita nia maluk Timor-oan sira, iha mos ita nia maluk reristensia sira. Depois mai iha ukun aan ita nia maluk Timor-oan mos balu husi liur mai, malae sira balu mos mai, sira hotu tau matan ba clinika nee depois sira legaliza organizasaun nee ho estatutu asosiasaun”, haktuir Diretor AJAR Jose Luis de Oliveira ba TAFARA.TL hafoin sorumutu refere.

Intensaun husi baze legal ne’e mak oinsa formaliza organizasaun ida hodi bele simu ka asesu ba ajudus husi liur no mos governu. Baze legal ka legal identity nudar kriteria principal ba hetan apoiu husi parte seluk. Ikus ne’e mosu desentendimentu interna asosiasaun nian, ikus mai haketak malu, nune’e apoiu ba Clinica refere husi fundu solidariedade Australia mos para no apoia husi Governu mos diminu. Nune’e hahu kedas husi setembru 2017 Clinica refere redus nia fundu operasional ba Dolares Americano rihun 20 resin. Diminutivu ida ne’e afeta maka’as ba salariu doutor sira nian ne’ebe la tuir padraun (standard) normal.

Ba situasaun ne’ebe akontese parte sosiedade sivil koko atu mobiliza apoiu solidariedade husi parte hotu iha Timor, oinsa bele fo apoiu ba Clinica refere, nune’e bele kontinua funsiona hodi atende moras sira, liu-liu ba sira hirak ne’ebe labele asesu ba farmasia privada.

“Clinica Bairo Pite ne’e Clinica ida nebe ke diferente ho Clinica ne’ebe agora buras iha Timor, Clinica ida ne’ebe ita nia maluk sira ne’ebe kbiit laiha, kbiit laek sira mak asesu iha ne’eba, ami apela maluk sira nia solidariedade, ema barak presiza asistensia saude maibe sira osan laiha karik, ita bele ajuda soe netik osan balu, bele ajuda netik Clinika ne’e hodi bele asegura katak Clinica ne’e tetap loke, tulun ema kiak sira,” tenik Jose Luis de Oliveira.

Esforsu seluk ne’ebe sosiedade sivil sei halo maka, ajuda finaliza legalidade Clinica refere nian, hodi bele asesu ba fundu global (Global Fund), fundos internasional ida ne’ebe ke fo ba programa HIV SIDA, programa TBC, ne’ebe uluk Clinica refere asesu atraves husi Governu, maibe agora paradu.

Iha fatin hanesan Fundadora Institusu Sekular no Maun Alin iha Kristu [ISMAIK], Maria Lourdes Martins ‘Mana Lu’ nudar mos fundador ba Clinica Bairo Pite hateten, desentendimentu ne’e mosu tanba interese barak husi partes diferentes. Iha tinan 2003 bainhira Timor AID fo tulun ba Clinica refere, sira mos husu atu foti clinica refere nudar sira nia propriedade.

Mana Lu mos hare katak mosu diskriminasaun bo’ot entre Malae no Timor-Oan liu-liu iha parte pagamentu salarial ba doutor no mediku sira. Problema seluk mak relasiona ho krize politika ne’ebe Timor-Leste infrenta, nune’e apoiu husi Governu mos paradu.

Mana Lu ne’ebe durante fo nia kontribusaun voluntariamente ba komunidade kbiit laek sira iha nia moris, iha esperansa boot no husu ba Timor oan sira atu lolo liman ba malu ,tane as dignidade independensia Timor nian, solidariu tuir lisan Timor, lolo liman ba malu nu’udar maun alin. Clinic Bairo Pite tinan barak servi ba povu, ema barak hetan ajuda gratuita, la selu buat ida, agora krizi ida ne’e Clinic Bairo Pite uma ba moras sira, keta soe hela Dr. Daniel mesak.

Madre Lu presiza voluntariu, joven ne’ebe hakarak hatene halo aimoruk, oinsa kuidadu malu iha moras, “ita hanoin katak ema mak folin liu osan, mai ba hamutuk ho ami ita tama ba Bairo Pite nia problema lori ita atu hametin ita nia unidade fraternu lolos. Hau laran metin ba maluk hotu, fo liman ba malu ho hau iha luta foun ida”. * [Martinho Moniz | TAFARA.TL | Editor: Zevonia Vieira | 28.03.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *