CNE Lansa Bulletin de Votus, Prosesu Imprimisaun Seguransa Sei La Fo Espasu Ema Tama Sai

“Tenke tau atensaun makaas no seguransa hodi akompanha, evita atu nu’une labele akontese tan kondisoes hanesan tinan kotuk, imprimisaun bulletin tenke tuir numeru eleitores sira”. Alcino Barris

Prosesu imprimisaun bulletin de votus hahu ona, ne’ebe eleitor sira sei uza iha loron votasaun. Prezidente Comisaun Nasional Eleisaun [CNE], Alcino Barris hateten prosesu imprimisaun hetan seguransa masimu hosi PNTL, tanba esperiensia iha tinan kotuk, akontese tinta fakar iha bulletin de votus nia leten no kuak, no hamosu deskonfia ba malu, katak ema balun halo foer no hakuak ona bulletin de votus antes lori ba iha sentru votasaun.

“Tenke tau atensaun makaas no seguransa hodi akompanha, evita atu nu’une labele akontese tan kondisoes hanesan tinan kotuk, imprimisaun bulletin tenke tuir numeru eleitores sira”, hateten Alcino Barris

Alcino hatutan katak iha loron 10/04 ema hotu sai testamunha ba hahu imprimisaun bulletin de votus, eespera buat hotu lao ho justu no la iha intervensaun husi parte parte seluk.

Iha fatin hanesan Prezidente Grafic Nasional Imprensa Nasional Timor-Leste (INTL), Jaime Correia hateten produsaun ba bulletin de votus ba eleisaun antisipada total 800 e besik 900 mil no material ne’ebe uza ba imprisaun bulletin de votus mak surataha HVS 80gram, tuir lei eleisaun nian.

“Serviso ne’ebe ita halo mak iha prossesu imprimisaun ba bulletin votus, rezultadu sai sei fo hatudu ba Prezidente CNE no mos ba partidus sira. Durasaun finaliza bulletin de votus ne’e mak loron 21, signifika to 30 de Abril ami tenke remata imprimisaun bulletin de votus ne’e. Iha loron tolu, ami sei haree hamutuk ho CNE no STAE hodi verifika fila fali, karik iha balun mak foer ka la mos ami tenke troka fila fali tanba bulletin de votus ne’e tenke ba ho kondisaun ne’ebe diak no mos ho seguransa ne’ebe laiha espasu”, hateten Jaime Coreia

Ba TAFARA.TL Jaime hateten imprimisaun bulletin de votus sei garante katak, sei finalize tuir tempu STAE determina, hare ba kondisaun makina operasional, tanba konselho ministro aprova katak Imprensa Nasional mak sei sai hanesan fatin imprimi bulletin de votus.

Hosi parte seguransa, Antini da Luz hatoo ba fiskais sira no Staff Grafic Nasional katak durante halao imprimisaun bulletin de votus sei hela metin iha fatin imprimisaun, sei la iha komunikasaun husi ema liur no mos sei la uza telephone durante halo prossesu imprimisaun. Fiskais sira mos bainhira mai halo monitorizasaun ba prossesu imprimisaun bulletin, sei halao rezistu iha parte seguransan hodi asegura situasaun, fiskais mos tenke uza kartau ne’ebe rekonhese nia identidade, nune mos ba observador nasionais no internasionais sei la autoria hodi telephone no mos sasan ne’ebe koat sei akomanha ho seguransa PNTL durante mai halo monitorizasaun ba pakote bulletin

Antonio hateten ofisial Llgasaun PNTL, CNE no STAE iha esperansa ho serviso hamutuk bele asegura prossesu imprisaun ne’e lao ho justu no la iha interpretasaun, tanba buat kontroladu ho seguransa ne’ebe la fo espasu ema tama arbiru.

Orsamentu ba impresaun bulletin de votus ne’e total $3.6 mil, staff husi Graffic Nasional hamutu 36, kompostu husi operador 15, IT nain 5no restu serviso ba finishing. *[Zelia Ximenes | Editor: Zevonia Vieira | TAFARA.TL | 11.04.2018]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.