Monday , December 10 2018
Home / Opini / “Constitucional Patriotism”: Tetu hikas no sukat to’ok eleição antecipada
Pe.Martinho G. da Silva Gusmão Docente Filosofia Politica [Foto: Documentu Pe.Martinho G. da Silva]

“Constitucional Patriotism”: Tetu hikas no sukat to’ok eleição antecipada

Artigo ida ne’e mai ho ideia singular: labele monu lalais ba eleição antecipada! Partido Fretilin nahouk ona. Dom Basilio do Nascimento no Padre Dr. Júlio Crispim explica claro tiha ona – katak, dalan único atu resolve impasse politico ohin loron mak eleição antecipada. CNRT, PLP, KHUNTO ne’ebe forma AMP mos “hein de’it decisão” PR Lu-Olo nian, “hein buat di’ak, maibe pronto hasoru buat at”. PD mesak mak la concorda ho eleição antecipada, maibe se maioria (Fretilin, CNRT, PLP ho KHUNTO) houk ona, PD hakruk. Há’u nia posição katak – eleição antecipada ne’e péssima ideia (ide sangat buruk). Ho respeito tomak ba partido sira no belun clero, há’u hare husi filosofia – eleição antecipada ne’e “contra-senso”, “absurdo”.

Há’u sai comissario iha CNE, 2007-2013 – hakerek livro 4 no artigo/ paper 40 resin ba de’it assunto eleição. Buat ne’ebe há’u hatene katak eleição halo de’it ba PR no PN. Ne’e duni, wainhira Governo monu, katak, “demissão” ba Governo. La normal wainhira dehan kedas eleição! Maibe, wainhira PN “dissolve” mak bele halo eleição duni. Hau sei explica tuir buat ne’ebe há’u estuda no hatene durante tinan 6 nia laran ne’eba.

Hermenêutica legal …

Ohin loron ema hotu-hotu hare lisuk de’it mak ba artigo 106o KRDTL. Hau mos lakohi lakon. Hau le fila ba fila mai to’o dekor tiha. Maibe, explicação ne’ebe hau bele rona husi Bispo Baucau nian ho Padre Julio Crispim, hanesan possibilidade ida. Nune’e mos wainhira jurista, Dr. Manuel Tilman hato’o … ohin ida, aban seluk. La hatene tan sa mak, iha fulan 3-4 nia laran ema mata-manas de’it ho artigo ida ne’e, no liu-liu patina iha liafuan “ou” de’it.

Hau la’os jurista, maibe kleur ona hanorin filosofia politica ho especialidade ida: Hermenêutica legal! Ne’e katak, hanorin estudante sira atu hare no tetu lei ka constituição husi artigo ida hodi nakdaet ba artigo seluk.

Wainhira ita hare didi’ak, afinal artigo 106o ba deit “Nomeação” primeiro ministro. Ninia hanoin ida de’it: PM. Hau la hare didi’ak, tan sa mak ema barak halo ulun moras to’o kedas “governo minoria” no “oposição maioria”, depois mosu to’o “aliança maioria parlamentar 2”. Foti tiha nia, Primeiro Ministro halo proposta ba Presidente da Republica atu nomea Ministro sira. Hotu ona iha ne’e.

Importante atu ita hatene, PR hili ema ida atu sai PM hare ba ninia governabilidade – katak, nia bele kaer governo ne’e ho diak no ho qualidade. Iha ne’e factor ne’ebe determinante mak PR “ouvidos os partidos políticos representados no Parlamento Nacional” – “rona hotu partido politico sira ne’ebe iha ninia representante iha PN” (hau nia tradução). Iha caso agora, PR rona partido-Fretilin, depois CNRT no PLP, PD ho KHUNTO. Tuir logica constitucional, Dr. Mari Alkatiri sai PM tan partido 5 nahouk hotu. Pelo menos, partido 4: Fretilin, PLP, PD no KHUNTO. Partido CNRT hili uluk ona dalan atu sai oposição. Ne’e duni, fou-foun há’u hanoin katak nomeação ba Dr. Mari Alkatiri tuir ona dalan constitucional.

Maibe, hau surpresa tebes ho declaração PM Alkatiri nian, katak, nia simu knar ne’e tan Bispo Basilio do Nascimento mak husu ka “fo apoio”, no liu-liu ninia “compadre” Xanana Gusmão mos simu hotu! Ikus mai, “compadre” 2 monu tama iha conflito nia laran tan “comadre” sira tama klaran. Kama mos tohar! Kala nune’e mak wainhira Dr. Manuel Tilman no Dr. Julio Crispim koko atu hadi’ak kama ain-tohar ne’e, sira 2 haluha tiha atu suku mos lipa nakles.

Nune’e, ita hare problema la’os ona iha artigo 106o: governo maioria ka minoria. Hun no abut mak “compadre” ho “comadre”! Filosofo politico husi Harvard, John Rawls dehan, “… justice as fairness … constitucional democracy …. so far as possible, independent of controversial philosophical and religious doctrines”. Atu bele hatur justisa lolos tuir nia fatin, democracia constitucional, bele karik, hases tiha husi controvérsia filosófica no doutrina religião nian: Bispo, padre, compadre no comadre.

Wainhira mosu conflito, hau nia maluk balun husi Comunidade Islâmica Timor-Leste hakerek iha facebook, katak, di’ak liu Alkatiri lalika sai PM wainhira ema la considera nia, hatun ema Islam nia honra ka dignidade. Fila mai, tan “umat Islam” tane metin nafatin nia. Liu tiha horas balun, posting ne’e lakon tiha ona. Kala ita nia maun-alin sira hanoin katak Mari Alkatiri sai PM atu tane sae Islam. Sira mos hanoin katak sai PM ne’e depende ba doutrina religião Islam nian (ne’e mentalidade Indonesia nian).

Situação sai complicado wainhira “oan sarani” sira (Fretilin, CNRT, PLP, PD no KHUNTO) iha PN la hatene saída mak “padrinho” ho “madrinha” cumbina malu ho bispo, padre no ustad ho pastor sira. Kasian, “oan sarani” sira la hetan orientação didi’ak mak ninia resultado sai rungu-ranga hotu, liu-liu “ampao” la iha ba festa Natal nian.

Ba há’u, saída mak Dr. Mari Alkatiri explica iha televisão, hatudu ona katak nomeação ba PM ne’e complicado husi inicio kedas! Há’u nia pergunta: se “compadre” José Alexandre Gusmão nahouk atu “compadre” Mari Alkatiri sai PM, tan sa mak Presidente partido CNRT Kay Rala Xanana Gusmão la suporta? Ho “compadre” na’in 2 ne’e ninia problema, tan sa mak CNRT no Fretilin tenki fera ulun hamutuk ho bispo no padre Julio Crispim atu justifica eleição antecipada?

Hau la hetan resposta husi artigo 106o KRDTL. Iha livro Tractatus Logico-Philosophicus nia laran, Ludwig Wittgenstein (filosofo) dehan “§ 7: Wovon man nicht sprechen kann, darüber muss man schweigen” (wainhira ema la iha liafuan atu ko’alia, iha biban ne’e nia nonok tiha). Atu dehan, wainhira artigo 106o la dehan buat ida konaba ba eleição antecipada, ema labele rakalele tun sae atu rakatiki tiha PM. Artigo 106o ne’e bele hakawe ho artigo 85o alínea d); ka 86o alinea h).

Maibe, se governo compadre Alkatiri nian monu duni karik? Ne’e fohin mak to’o iha Demissão do Governo (artigo 112o n. 1, 2). Sasukat la to’o atu halo eleição antecipada. Ita ba halo to’ok leitura critica hermenêutica legal ba artigo ide ne’e:

  • Implicam a demissão do Governo – kona-da’et ba governo ida atu hakotu ninia knar:
  1. O inicio da nova legislatura. Hahu legislatura foun. Ida ne’e normal, wainhira eleição 2017 hili ona deputado foun, VI Governo hotu ona. Labele ona assina tan projecto! Erro ne’ebe VI Governo halo mak, dehan hela semana 2 de’it ona, sistema taka hotu ona mos nakdedar fahe lalais projecto, nune’e VII Governo mak ulun moras. Hanesan los iha 2007, Governo no PN (Fretilin) nakdedar hakarak aprova lalais Lei Pensão Vitalicia (LPV), maibe AMP (CNRT, PD, ASDT/PSD) la ulun moras tan hotu-hotu “turut menikmati”.
  2. A aceitação pelo Presidente da Republica do pedido de demissão apresentado pelo Primeiro Ministro. Hanesan iha 2014, Kay Rala Xanana Gusmão husu atu PR hakotu PM ninia knaar no fo hikas fali ba Rui Maria Araújo. Tuir lolos PD no FM halo boikot ba decisao ne’e, tan CNRT la hili husi ninia coligação maibe ba hili fali oposição (partido Fretilin). Ida ne’e exemplo ida, katak, Fretilin suporta governabilidade “minoria” ho voto coitado! La iha eleição antecipada. PM Gusmão mak kala isin baruk ona be entrega fali ba PM foun. Ida seluk, iha 2006 wainhira PR Xanana husu PM Alkatiri atu resigna husi ninia knar. La iha eleição antecipada! Tan Fretilin sei bele assegura “single majority” ida.
  3. A morte ou impossibilidade física permanente do Primeiro Ministro. Wainhira PM mate ka hetan desastre ruma nebe halo nia labele ona bok-an tun sae. PM mate ka tun, governo mos hotu. La iha eleição antecipada.
  4. A rejeição do programa do Governo pela segunda vez consecutiva. Katak, wainhira programa ne’ebe PM hatoo ba PN hasoru ona “rejeição” ka “penolakan” dala rua tui-tuir malu (hare mos artigo 108o; 109o KRDTL). Dehan de’it “segunda vez consecutiva”, maibe la dehan liu tiha loron 1 ka 2, 30 ka 60. Hanesan Dr. Mari Alkatiri dehan, tuir lolos oposição fo tiha moção dahuluk, fo tan kedas ba daruak iha loron ne’e kedas. Hau la’os jurista, maibe “prazo legal” bai-bain fo ida be máximo.
  5. A não aprovação de um voto de confiança. Wainhira PN halo ona “rejeição”, PM Alkatiri bele husu “voto de confiança” (artigo 110o). Ne’e katak, Governo bele halo negociação didi’ak hodi husu hikas PN (liu-liu oposição) atu fo voto foun hodi bele hala’o ninia programa ne’ebe monu ona. Wainhira la hetan tan confiança, nune’e Governo demite. PM Alkatiri la husu, maibe ba kedas dehan “hau sei la mai dala rua tan iha PN”. Significa, Dr. Mari Alkatiri lakohi usa ninia direto constitucional nu’udar Chefe do Governo atu husu “voto de confiança”. Maibe, hau hare liu ida ne’e hanesan problema psicológico (bele mos metafisica; bele mos meta-ética), la’os politico. Hau hanoin, PM Alkatiri “de propósito” (sengaja) husik ninia governo chumba duni!
  6. A aprovação de uma moção de censura por uma maioria absoluta dos Deputados em efetividade de funções. Katak, PN halo “moção de censura” (artigo 111o), wainhira hare katak Governo la halo tuir ninia knar ona no programa la’o la los ona. Hau la compreende, matenek nain sira iha oposição AMP, governo sei hatoo hela programa no ladauk tan executa ninia governação, oinsa mak hato’o tiha “moção de rejeição” ba tuir kedas “moção de censura”? Kala, AMP hakarak duni halo PN naksobu tan sira hanoin uluk ona eleição antecipada, antecipadamente! Maibe atu fo exemplo di’ak liu mak wainhira V Governo fo ZEESM ba Mari Alkatiri, tuir lolos CNRT, PD no FM halo “moção de censura”. Basá, ZEESM la tama iha programa Governo nian. “Compadre” Xanana mak hakarak fo ba “compadre” Alkatiri. “Comadre” sira iha Dili mak lori ba monta iha Oe-Cusse. La hatene, tan sa mak CNRT, PD no FM la halo? Agora, wainhira Governo sedauk halo buat ida, CNRT mak iha ulun atu halo “moção de censura” ba Fretilin ho PD. Kabun makili, maibe laran mak sae fali! Ka hanesan uluk, PM Alkatiri no MNEC Ramos Horta assina Taci-Timor ba tinan 50, PN la halao “moção de censura”. Agora, deputado sira husi oposição AMP atu halo hasoru PPN, ne’e hanesan ema kaer tudik la’os atu ba ku’a na’an ka modo, maibe ba tesi ninia kakorok rasik. Ba hau, oposição AMP halo kanek-an de’it. Tuir lolos ne’e, PLP mak matenek liu, tan Taur Matan Ruak wainhira kaer knar nu’udar PR nia tahek Fretilin no CNRT ba caso sira ne’e.
  • O Presidente da Republica só pode demitir o Primeiro-Ministro nos casos previstos no numero anterior e quando se mostre necessário para assegurar o normal funcionamento das instituições democráticas, ouvido o Conselho de Estado”. Katak, PR atu hatun PM, rona mos husi Conselho de Estado (artigo 91o). PR laos nahi tur nahi mehi ba hatun ona PM. Lae! Iha ninia dalan rasik. Dalan ne’e mos la badak, hanesan ita nia hanoin badak.

To’o iha artigo hirak ne’e hotu, ita hare de’it mak DEMISSÃO ba PM no Governo. Se Governo monu, la iha eleição antecipada. Tan, PM no Governo la’os POVO mak hili, maibe PR mak foti. Partido sira mak hili PM! Ne’e duni, tuir regra ka logica constitucional, PR rona hikas “Conselho de Estado” no foti processo foun. Katak, bolu hikas partido-Fretilin, CNRT, PLP, PD no KHUNTO atu tur hamutuk hodi hili PM foun. Githu aja kok repot?!

Keta haluha, Lei-Inan dehan PR “ouvido” (rona netik) partido sira no Conselho de Estado. Maibe, PR mak iha knar exclusivo atu hakotu lia. AMP lalika ona dehan sei lori PR ba processo “impeachment”. There is no way to go!

Maibe, eleição antecipada bele mosu, wainhira Parlamento Nacional monu! Buat ne’ebe há’u hare, AMP hamonu tiha ona PN molok hamonu Governo! Governo hamrik ona tan “compadre” 2 no bispo hamutuk ho PR hakotu ona lia, katak: bele! – “green light”. To’o iha PN laran mak “oan sarani” sira rungu-ranga dehan “minoria” ho “maioria”, alias, “padrinho-madrinha” mak fo “ampao” poder la hanesan! Nune’e mosu “red light” hela de’it iha PN.

Iha artigo 100o mak ko’alia konaba “Dissolução” ba PN. KRDTL hatur “O Parlamento Nacional não pode ser dissolvido nos seis meses posteriores à sua eleição…”; dehan katak liu tiha eleição foun ida, labele hamosu tan eleição seluk iha fulan 6 nia laran. Eleicao ida uluk monu iha Julho 2017. Labele halo eleição foun iha fulan 6 nia laran, katak, to’o Janeiro 2018 de’it mak ninia “prazo legal” moris! Nune’e mos wainhira iha PR nia mandato hela fulan 6 de’it ona, ka “Estado de sítio” ka “estado de emergência”, labele iha “dissolução”. Ne’e duni, wainhira PR haruka atu halo “dissolução” ba PN mak KRDTL 100o dehan “subsequentes eleições”. Ida ne’e mak ita ba hamutuk ho PM Alkatiri no Partido Fretilin kokotek no kokorek iha medsos konaba eleição antecipada. Liafuan “eleição antecipada” rasik la hakerek iha KRDTL, maibe “subsequentes eleições”. Iha sistema eleitoral mundo rai-klaran, “eleição antecipada” (early election; primary election) ne’e ba de’it nação sira ne’ebe tenki troka senadores ka deputados atu hakotu sira nia mandato no hili foun fali.

Pergunta boot: ho razão saída mak PR halo “dissolução” no haruka halo “subsequentes eleições” (= eleição antecipada)? Artigo 100o la dehan buat ida. Ita ba took artigo 86o alínea f); dehan knaar PR nian atu “Dissolver o Parlamento Nacional, em caso de grave (1) crise institucional que não permita a formação de governo ou (2) a aprovação do Orçamento Geral do Estado por um período superior a sessenta dias, com (3) audição prévia dos partidos políticos que nele tenham assento e (4) ouvido o Conselho de Estado, (5) sob pena de inexistência jurídica do ato de dissolução, tendo em conta o disposto no artigo 100o; (numero 1-5, hau mak tau atu fasilita leitura) …. dalan naruk no halo kolen. PR Lu-Olo la tur heneba, teki-teki ida rua tama ba ho “compadre” no “comadre” ba husu eleição antecipada! La iha!

KRDTL artigo 86o alínea f) ne’e todan oituan

  • “… crise institucional que não permita a formação de governoPR tetu uluk lai crise institucional ne’ebe halo katak labele forma governo. PR lalika hare ba asneiras “compadre” sira, “oan sarani” ho “padrinho” sira. Na verdade, ko’alia momos karik ohin loron ita hasoru crise psicológico husi Xanana no Alkatiri, ne’ebe halo “instituição estado” sai tiha “U boot” husi “compadre” sira nian. Ne’e duni Taur Matan Ruak ko’alia loos, Xanana ho Alkatiri ne’e halo Estado sai tiha “família” nia custa. Partido Fretilin no CNRT ne’e sai tiha ona oligarquia Alkatiri no Xanana. PLP mak “comadre” karik. Depois KHUNTO sai “comadre” nia maluk? Hau sente, maun sarani no alin sarani sira iha CNRT, PLP no KHUNTO mak hakarak hadau lalais “ampao” (poder no projeto)! Ne’e duni, governo forma ona maibe asneiras no manhosa sira iha AMP mak halo natal ho ano novo ne’e sai rungu ranga tiha. Crise institucional ne’e mosu la’os KRDTL, maibe psicológico ka metafisica. Fou-foun, Fretilin hametin uluk tiha ona “alianca maioria parlamentar” (AMP): Fretilin, PLP, KHUNTO. Maibe, to’o dalan klaran, AMP mosu fali ho Fretilin, PD, KHUNTO. To’o hili PPN mak hela de’it ona Fretilin no PD. Iha sistema semi-presidencial, Fretilin no PD bele kaer nafatin Governo. Los duni, Governação Fretilin/PD nian hamosu problema governabilidade, tan suporta minoria iha PN.

Maibe, buat ne’ebe há’u hare oposição AMP halo “suicídio politico” (bunuh diri politik) tan husi sira nia “crise metapsicológica” (ansi, liman ain nakdedar, hamlaha ne’ebe transforma ba ‘sede do poder’; filosofo Nietzsche dehan “der Wille zur Macht” – the Will toward Might; la’os de’it “power”, maibe “might”) mak hamosu “crise institucional”: boikot buat barak iha PN; obviamente vota contra programa, lakohi participa iha reuniões comissões PN nian, lakohi halo programa atu visita eleitores, lakohi tama serviço (deputado senior sira falta hela de’it) to’o ikus mai husu destituição PPN, deputado balun CNRT nian koko atu “hadau lalais meja” PPN, too OGE no OR (“emergência”) mos chumba hotu. Agora, AMP rasik mak hanoin atu aprova lalais OR (“agonizante”); koko atu tama bebeik plenária, buka atu halo lei anticorrupção. Maibe kala Fretin no PD hanoin la biban ona, tan tempo atu executa mohu tiha ona! Ne’e duni, AMP hamout duni Koligasaun Fretilin-PD iha “crise institucional” nia laran atu bele atingi sira nia hanoin halakon “governabilidade”, maibe mos sei labele hamosu “formação do governo”.

PR bele foti decisão atu halo eleição antecipada. Maibe, há’u surpresa tan AMP mak lakohi fali halo eleição antecipada. Wainhira Deputado Fidelis Magalhães (PLP), Arão Noe (CNRT) no Luís Ribeiro (KHUNTO) halo declaração hamutuk no hato’o razão oi-oin, hau sente “estranho” (aneh). “Santíssima trindade” oposição AMP nian ne’e hanesan los “flu burung”, la’os ona manu-falur ne’ebe ne’ebe laran kmaus, maibe makerek! Sira hanoin de’it atu oinsa mak Governo monu lalais, maibe la sukat katak sira hotu namtate.

  • “…. a aprovação do Orçamento Geral do Estado por um período superior a sessenta dias”! Kala ida ne’e mak problema ne’ebe rasta malu la hotu rai. OR la liu. OGE mos intupido. PM Alkatiri la lori hikas OGE mai lalais. Nia hakarak atu halo iha 31 de Janeiro! Ne’e dok liu ona prazo “60 dias”. Agora oposição AMP koko atu halo manobra oinsa mak bele halo debate hikas ba OR (tan osan atu bele sustena makina estado nian mohu duni ona); ka, koko atu hatudu katak sira mak badinas liu iha PN laran. Loro-loron ita le facebook, ita mak sente moe fali. Ba há’u, iha aspecto ida ne’e AMP la sukat politica, maibe halo metafisica – “hakarak salva povo” maibe hare katak Fretilin-PD nia programa politico ho liafuan “irracional”, “inconsistência”, “la realista” no “ambicioso”. Maibe, aban-bainrua sira manan eleição antecipada, oinsa mak sira apresenta fali “irracional” ho “inconsistência” ne’e nu’udar “racional” no “consistente”?
  • Maibe, keta haluha katak PR mos sei iha “… audição prévia dos partidos políticos que nele tenham assento ”! Ne’e duni, liu tiha fulan 6 mak OGE la aprova nafatin, hafoin PR bolu partido hotu-hotu: Fretilin, CNRT, PLP, PD no KHUNTO atu rona sira nia hanoin lai. Be partido sira seluk ne’ebe la iha “assento” iha PN, oina? Ita hein de’it iha liur atu rona gosip! PR halo “audição previa”, la’os halo “decisão”.
  • Ikus liu, PR sei “…ouvido o Conselho de Estado” (hanesan artigo 91o). PR “rona” de’it, hotu ona. La dehan katak PR tenki halo tuir. Ne’e problema boot tan fali ona, tan iha Conselho de Estado nia laran “compadre” ho “comadre” mak tur iha laran. Sira ko’alia saída de’it mos ita labele hafuhu husi janela kuak atu rona. Tan KRDTL dehan “As reuniões do Conselho de Estado não são publicas” (no 2). Ne’e?!
  • Wainhira PR la hakat tuir 1-4, mak sei mosu “sob pena de inexistência jurídica do ato de dissolução, tendo em conta o disposto no artigo 100o”. PR labele dissolve PN, wainhira la la’o tuir dalan hirak ne’e. Maibe, AMP sei labele kokorek no kokotek husu “impeachment”, wainhira PR foti decisão ba eleição antecipada. Nune’e mos, Fretilin-PD labele mangame wainhira PR dehan la iha “subsequente eleições”.

Conclusão, katak, “normalmente” eleição antecipada ida mosu la’os tan Demissão do Governo, maibe Dissolução do Parlamento Nacional. Governo monu, ne’e “salah satu alasan”, la’os “satu-satunya alasan”. PN mak “bubar”, dalan único mak eleição antecipada. Githu lho, mas!!! Hau sai comissário tinan 6, no participa iha evento lubuk ida nacional ho internacional, hakerek livro no artigo … hau seidauk hare processo eleição ba membro Governo nian, sa tan referendo ba programa governo. Referendo ba LPV bele; ba ZEESM bele; ba mega projecto Taci-Mane bele!

Constitucional patriotism”: Proposta ba Impasse!

 Ba há’u, eleição antecipada sai hanesan vírus cancro ida ne’ebe estraga no halo “CULTURA DEMOCRATICA” iha Timor-Leste sei mate kotu kedas. Iha Lian-Makloken KRDTL nian dehan, “Plenamente conscientes da necessidade de se erigir uma cultura democrática e institucional própria de um Estado de Direito onde o respeito pela Constituição, pelas leis e pelas instituições democraticamente eleitas sejam a sua base inquestionável; …”. Hanoin konaba “cultura democrática” ne’e ita labele haketak ho “representatividade democrática” no “oposição democrática” (artigo 70o).

Tan sa mak ita adopta tiha filosofia democracia nian ne’ebe furak tebes, maibe ita sobu hodi halimar de’it? Wainhira Xanana Gusmão kaer knar nu’udar Chefe do Governo, mosu bebeik liafuan “estado frágil” no “estado falhado”. Timor-Leste nia naran sai bo’ot iha estado frágil sira ne’e nia let, la’os tan ita mak di’ak liu maibe tan ita mak osan barak atu hami’ak rai seluk. Ita rasik fraco ida be fraco nian kedas. Exemplo mak agora mosu dada’uk, issue “eleição antecipada”.

Timor-Leste nia “cultura democrática” (la’os “regime democrático”) hatur lolos duni doutrina “patriotismo constitucional”. Há’u gosta saída mak Jürgen Habermas dehan, “… democratic citizenship need not be rooted in the national identity of a people. However, regardless of the diversity of different cultural forms of life, it does require that every citizen be socialized into a common political culture” (JH, Facts and Norms, 1996: 500). Atu ita bele sai cidadão democrático, ita nia hun no abut mak “… profundo sentimento, as aspirações e a fé em Deus do povo Timor-Leste” (preambulo KRDTL); “normas e os usos costumeiros” (art 2o n. 4); “Igreja católica” (art 11o n. 2); “confissões religiosas” (art 12o). Ita nia identidade nacional mos hatudu iha diversidade – husi Lorosa’e too Loromonu; taci-feto ba taci-mane; firaku-kaladi-baikenu. Rikusoi hirak ne’e mak halo Habermas hatudu katak ema ida-idak hatene hare Constituição nu’udar fatin ba “common political culture”.

Crise constitucional ne’ebe mosu agora, tan ita hakerek tiha buat furak iha surat tahan leten, maibe sai burado iha “common political culture”. Alias, iha tinan 22 nia laran ita restaura tiha independencia, ita la kaer KRDTL nu’udar solução ba problema “national identity” no “common political cultural”, maibe sai tiha fali problema nia hun no abut. Todan liu tan, ita nia camada intelectual lakohi ona ko’alia tuir sira nia matenek, maibe tuir sira nia politica no bisnis!

Proposta husi Habermas nian konaba “constitucional patriotism” bele ajuda ita atu labele sobu “cultura democrática” no halo rahun “oposição democrática”, liu husi eleição antecipada. Hamutuk ho Habermas, há’u identifica problema 3 iha “Estado frágil” (ne’ebe g7+ la mai Timor-Leste atu ajuda resolve), no ho kedas sugestão atu LABELE lalais tama ba ELEIÇÃO ANTECIPADA.

Problema dahuluk (1): iha Estado Frágil nia laran, lei ho ordem mak namlele! Ne’e duni “instituições eleitas” [tuir dalan democracia nian] lakon ninia monopólio atu usa força legitima atu protege Povo rasik, maibe hanesan atu halo Povo moris la hakmatek fali. Deputado/a sira ne’ebe ko’alia konaba “oposição constructivo” ka “oposição educativo” la foti programa Governo nian atu tetak no tempra didi’ak ho argumento intelectual, maibe kaer uluk ona “cartão mean” atu vota contra. Husi hahu kedas ita hatudu ona katak “oposição democratica” ninia serviço mak atu “hatun governo”, no la’os tetak ho tempra programa governo.

Todan liu tan, ita nia matenek na’in sira fera ulun ba de’it artigo 106o (nomeação PM) no lakohi hateke ba artigo sira seluk atu ajuda malu. Ida ne’e dehan halakon tiha “justice as fairness” (John Rawls) no hamohu tiha “justeza politica” (Norberto Bobbio). Iha situação ida ne’e PN paralisado! Há’u hanoin oposição AMP husi hahu kedas hakarak hamonu duni PN – “dissolução antecipada”! Nune’e, PM Alkatiri (no, Fretilin) ko’alia bebeik hodi PR nia naran atu halo eleição antecipada. Iha biban seluk, Oposição AMP halo PN la funciona maibe sira tuda rai rahun ba Fretilin no PD, depois sira “fase liman” tiha hanesan Pilatos hasoru injustiça politica ne’ebe mosu dadaun. Ikus mai, há’u hare katak Oposição AMP agora tauk liu atu ba eleição antecipada. Nune’e iha facebook hahu “promosi” katak sira sibuk liu ba visita povo; sibuk ba visita instituição estado nian; sibuk atu hahu plenária; sibuk atu ba comissão parlamentar; … sibuk iha fatin hotu wainhira sira hatene los ona ona katak PN paralisado.

Albert O. Hirschman hakerek artigo ida “Social Conflicts as Pillars of Democratic Market Society” (cf., Political Theory 22 [2], 1994) hodi hatudu situação ne’ebe nia hanaran “either-or” ka “non-divisible” nu’udar oposição ba situação “divisible” ka “more-or-less”. Há’u hanoin, ba Fretilin, CNRT, PLP, PD no KHUNTO bele tetu ida ne’e. Partido sira ne’e tuir lolos lalika sukat malu ho “divisible” (fahe malu fera malu) de’it, maibe koko halo compromisso politico. Husi comentário hirak ne’ebe Partido sira halo, ema bele hare momos no borus kedas katak Partido sira hatudu de’it “absolute unwillingness” (lakohi duni atu hatudu oin midar ba malu) atu halo compromisso.

Compromisso ba saída nian? Ema hotu hatene, to’o labarik sira iha escola primaria mos dehan, PPN no PM. KRDTL hatudu dalan momos hela “ouvidos os partidos políticos representados no Parlamento Nacional” (art. 106o; art. 85 alinea d]). Bispo Dom Basilio do Nascimento no “compadre” José Alexandre Gusmão bele fo hanoin ba “compadre” Dr. Mari Alkatiri. Maibe, ida ne’e la’os constitucional. Importante mak Presidente da República rona Partido sira iha PN nia laran – Fretilin, CNRT, PLP, PD ho KHUNTO. So Partido Politico sira de’it mak bele lori malu to’o iha “more-or-less” – mais ou menos – se mak sai PPN no PM.

Tan Alkatiri la’os mai husi partido hotu nia hakarak, liu-liu “comadre” sira iha CNRT ka PLP nia laran, nune’e mosu situação “either-or” – oposição lakohi Fretilin atu kaer ukun, ka, oposição lakohi Alkatiri atu sai PM? Buat ne’ebe ita bele hare husi liur, oposição halo “either-or”. Iha ne’e ita brani atu hili “the basic value of constitucional democracy” atu respeita “partido mais votado” (Fretilin) hamutuk ho PD hodi kaer Governo (la’os “minoria”, tan Ministro sira barak los), ka, “the normative aspects of the state” katak husik PN (iha ne’e mak ko’alia konaba “maioria parlamentar” art 106o) mak halo “decisão politica” (art 92o).

Halai hikas lalais mai atu husu eleição antecipada ne’e hatudu de’it katak ita nia “representatividade democratica” (art 70o) lakon ninia gosto! Alias, sira la hatene halo politica nu’udar “o arte do pensar e agir” (Aristoteles), ka “the art of expedience” (Isaias Berlin) maibe sobu tiha atu halo de’it politica sai “manutenção do poder” (Machiavelli; Thomas Hobbes). Ne’ebe, se Deputado/a no Partido 5 ne’e la iha capacidade no abilidade “literária” atu halo “decisão politica” (art 92o) iha PN nia laran, tan sa mak POVO tenki ba hili hikas fali sira?

Uluk iha FORUM MAUBISSE, líder sira hanesan Xanana, Alkatiri, Taur Matan Ruak, Ramos Horta, Lu-Olo, no José Luis Guterres ko’alia konaba transformação ba geração foun. Liu-liu na’in 5 oan ne’e: Xanana, Alkatiri no Ramos Horta hamutuk ho Lu-Olo no Taur Matan Ruak labele kedas resolve “oan sarani” sira iha PN (no, “comadre” sira), tan sa mak ita tenki gasta osan atu hili nafatin “OB” sira ne’e? Há’u concorda, se eleição antecipada ne’e atu ba hili “roupa foun”, la’os “roupa foer” ka roupa ne’ebe serve de’it iha “obralan”.

Tan sa? Problema daruak (2): capacidade ne’ebe fraco ka desintegrado hodi hatan ba Povo ninia necessidade ka Povo nia hakrak/ mehi, serviço publico ne’ebe parado, Povo ida-idak buka moris rasik no hein de’it bainhira mak Partido politico sira han bosu ka moris hakmatek.

Hau sente “desgraça” (ngeri), wainhira líder balun dehan ko’alia iha “campanha eleitoral” ita bele ko’alia saída de’it atu bele dada povo nia atenção no hetan poder, maibe tama ona iha poder mak partido sira halo “gestão” ba interesse. Barrata! Dehan, iha politica la iha amigo la iha inimigo maibe iha de’it interesse. Ba há’u, liafuan hirak ne’e rona ba “brutal” no “barbar”. Lae! Politica ne’e husi hun no abut kedas Aristoteles dehan “o arte do pensar e agir”. Ita nia KRDTL usa liafuan furak tebes “CULTURA DEMOCRATICA” ne’ebe sai ona “common political culture” (Habermas, Rawls, Bobbio), iha mundo rai-klaran ne’e.

Iha Estado frágil ida nia laran, liu-liu ninia “boss g7+” Timor-Leste, ita hasoru paradoxo boot ida “On the one hand, we look to constitucion in order to underpin the legitimacy of the new government by providing the popularly agreed-upon structure and values by which it governs. On the other hand, by importing identity question into the constitucional arena, we risk escalating the conflict rather than alleviating it” (cf., Aliza Belman & Hanna Lerner in D.W. Brinkerhoff, Governance in Post-Conflict Societies, 2007: 49). Hare husi ne’e, ita bele sukat katak eleição antecipada ne’e hanesan kokir tun sae KRDTL atu bele hetan ai-rin ba legitimidade ba Governo liu husi suporta popular. Ne’e los hela. Maibe, ita la hare “risk escalating the conflict”: la’os física (violência) maibe metafisica (pensamento intelectual)! Katak, ita taka matan ba “raison d’état” (razão do Estado), no buka haksesuk malu liu atu programa hirak ne’e bele “beneficia” empresário Partido nian. Ita hare momos katak iha PN, Deputado/a sira liu-liu AMP ko’alia bebeik konaba “sentido do Estado”, maibe la iha “sentimento do Povo”.

Há’u mak hanesan Fretilin no PD karik, husik ba Governo monu depois entrega hikas ba PR, depois PR forma VIII Governo. Fretilin no PD fila ba “oposição democratica”! Hare to’ok, AMP2 bele ukun tuir “cultura democratica” ka lae! Ba há’u, wainhira CNRT, PLP no KHUNTO mak ukun ne’e sei sai hanesan saída mak Taur Matan Ruak dehan, lori istilo GOLKAR. Tinan 10 (2007-2017) nia laran, GOLKAR mak ukun iha Timor-Leste. So what githu lho?! Hanesan ne’e Fretilin no PD bele sai “oposição educativo” ka “oposição constructivo”. Ho ida ne’e, ba eleição 2022, Fretilin ho PD bele ba ku’u kafe iha Ermera no kulu iha Baucau, ba fa’an iha território tomak … “tula dikur ba malu, se book oli”!

Dala ida tan, ba há’u eleição antecipada ne’e husik hela kanek ida iha “cultura democratica” nia laran. Liu-liu tan KRDTL ita tesi-tun tesi-sae halo roupa aat ida hodi hatais ba festa democracia nian! Fretilin no PD, imi mesak mak bele SAVE THIS NATION …!

Problema datoluk (3): Entidade sira ne’ebe representa Estado lu’ut metin de’it iha sira nia knuuk laran no la iha coragem atu ba hasoru Povo. Hodi liafuan seluk, ita nia “Sua Excelência” sira lakon sira nia credibilidade rasik; la fiar-an no patina iha fatin!

Favor ida hapara tiha “pencitraan” iha facebook, katak imi sae motor ba PN, ba visita eleitor no sibuk iha plenária atu foti lei anti-corrupcao.

Se há’u mak AMP karik, há’u sei ba hasoru hikas Fretilin no PD atu loke hikas negociação politica – “o arte do pensar e agir”; “the art of expedience”. Nicolau Lobato ninia liafuan furak tebes, “Muita dor de cabeça tem havido por causa de não se fazerem as devidas distinções. Neste assunto impõe-se ter um fino sentido de compreensão e discernimento político”. Partido 5 ne’e tama iha situação ne’ebe Nicolau Lobato dehan la hatene halo “devidas distinções”: ida ne’ebe mak los, ida ne’ebe mak sala; ida ne’ebe mak furak, ida ne’ebe mak feuk; ida ne’ebe mak di’ak ida ne’ebe mak at. Ba há’u, saída mak CNRT, PLP no KHUNTO halo hodi boikot ba buat hotu maibe la’os ho argumento racional, “fact and state of affair”, ne’e la’os “cultura democratica”. Oposição iha “direito”, no liu-liu “dever sagrado” atu foti “cartão mean” … maibe, foti ho oin foti ho néon. La’os foti husi ain-tur. Governo Fretilin no PD bele monu, no monu duni ona. Maibe, AMP iha responsabilidade atu labele halo rahun PN.

Ba há’u, dala ida tan, AMP “dissolve” tiha ona PN (hahu ona husi eleição ba PPN, tuir mai foti hosi comissão maibe depois lakohi halo reunião; vota contra PPN) molok obriga Governo atu halo “demissão” (vota contra Programa no OR, nune’e labele ona halo OGE). PR iha tiha ona razão tomak atu foti decisão ba eleição antecipada.

Maibe, dala ida tan Nicolau Lobato nia liafuan, “Muita dor de cabeça tem havido por causa de não se fazerem as devidas distinções. Neste assunto impõe-se ter um fino sentido de compreensão e discernimento político”.*[Martinho G. da Silva Gusmão | Hanorin filosofia politica, ética filosófica | TAFARA.TL | 16.01.2018]

 

About Other Source

Check Also

Kontra Visita PR ba Vatikan, Aktu Ida La-Stratejiku

Bainhira Parlementu Nasional (PN) vota kontra vizita Presidente da Republika, Fransisco Guterres Lu Ólo nian …

One comment

  1. Artigu krítiku tebes

Leave a Reply

Your email address will not be published. Required fields are marked *