Wednesday , April 24 2019
Home / Sosial & Politika / Debate OJE 2019, PM Taur: Governu Liberta Povu Hosi Kiak, Promove Agrikola Hodi Garante Seguransa Ai-Han
Primeiru Ministru Taur Matan Ruak. [Foto: Copyright media Gabinete PM | 06.12.2018]

Debate OJE 2019, PM Taur: Governu Liberta Povu Hosi Kiak, Promove Agrikola Hodi Garante Seguransa Ai-Han

“Kondisaun moris nian ne’ebé di’ak liu no ba ida ne’e sei fornese servisu edukasaun no saúde nian ne’ebé di’ak liu, no asesu ne’ebé boot liu tán ba uma ne’ebé dignu, eletrisidade, bee no saneamentu, no meiu-ambiente”. Taur Matan Ruak

VIII Governu Konstituisional aprezenta Orsamentu Jeral Estadu 2019 iha uma fukun Parlamentu Nasional. Ba loron dahuluk liu hosi dekursu Primeiru Ministru, Taur Matan Ruak ba membru parlamentu no publiku hatoo katak

Projetu kona-ba Proposta Lei Orsamentu Jerál Estadu nian (OJE) ba tinan fiskál 2019 nian, nu’udar instrumentu prinsipál ba implementasaun medida no polítika públika hirak ne’ebé sei determina governasaun iha tinan oin mai, ne’ebe hakarak atu konretiza vizaun atu halo Timor-Leste to’o tinan 2030 sai pais ida ne’ebe riku, forte no seguru, pais ida ne’ebe prosperu, modern no dezenvolve liutan.

Primeiru Ministru esplika katak orsamentu refere tuir VIII Governu Konstituisional nia hanoin katak ho kontributivu boot tolu ba kreximentu ekonomiku no sosial, ne’ebe mak hakarak tebes ba nasaun Timor-Leste liu-liu kontributu ida ba mudansa tanba marka fim husi períodu inserteza nian ida, ho esperansa no konfiansa foun hodi hahú siklu foun ida ho estabilidade polítika, finanseira no ekonómika, kontributu atu fila-fali ba normalidade ne’ebé kompleta loloos, liu-liu hodi rekupera nivel kreximentu sira ne’ebé rejista ona to’o tinan 2016.

“Ami iha previzaun ida ba 5,9% husi kreximentu anuál ne’ebé akompanha ho kondisaun moris nian ne’ebé sai di’ak liu, ho rekuperasaun konsumu família sira nian no kontributu ida atu fó impulsu ba investimentu privadu nian, ne’ebé mak ami hein iha eskala ne’ebé boot, liu husi hahú implementasaun projetu boot sira husi parseria públiku privada”, hateten Taur Matan Ruak 06/12.

Xefe Governu ne’e mos esplika katak objetivu hirak ne’ebe mai hosi Planu Estratejiku Dezenvolvimentu Nasional [PEDN 2011-2030], iha alinhamentu ho roteiru ba implementasaun hosi objetivu sira Dezenvolvimentu Sustentavel nian to tinan 2030, ne’ebe mak tradus no artikula ona iha programa VIII Governu Konstituisional hanesan liberta Povu husi moris-kiak no hamlaha, sei promove produsaun agríkola, hodi garante seguransa ai-han no hamenus mál-nutrisaun iha país laran tomak, liu husi aproveita didi’ak momentu baixa inflasaun ai-han nian ne’ebé oras ne’e akontese. Transforma Timor-Leste hodi sai país ida ho rendimentu mediu-aas, liu husi promosaun ba kreximentu ekonómiku la’ós-petrolíferu ida ne’ebé sólidu no ho kualidade. Hadi’a índise sira kona-ba dezenvolvimentu Umanu – liu husi fó forsa ba edukasaun no formasaun ida ne’ebé iha kualidade ba rekursu umanu sira, ne’ebé inkluziva no sensivel liu ba igualdade jéneru, no ne’ebé orienta ba nesesidade merkadu, emprezáriu no investidór sira nian. Proporsiona kondisaun moris nian ne’ebé di’ak liu no ba ida ne’e sei fornese servisu edukasaun no saúde nian ne’ebé di’ak liu, no asesu ne’ebé boot liu tán ba uma ne’ebé dignu, eletrisidade, bee no saneamentu, no meiu-ambient. Fasilita kriasaun no asesu ba empregu, Atu populasaun, ne’ebé barak liu maka foin-sa’e, sei bele dezenvolve sira nia poténsial akadémiku, profisionál ka sientífiku, ho moris ne’ebé mak util no produtivu.

Tuir Lei Fundu Mina-Rai nian, osan ne’ebé foti husi fundu ne’e sei orienta husi Rendimentu Sustentavel Estimadu [RSE] ne’ebé bainhira korresponde ba 3% husi totál rikeza nian, kalkula ona iha $ 529,0 ba tinan oin-mai.

Tuir proposta orsamentu 2019, VIII Governu Konstituisional justifika nesesidade, hodi foti osan ho valor ne’ebe boot, liu hosi valor RSE ne’ebé maka koresponde ba $ 1,012.4 tanba governu fiar katak proposta ida ne’e kumpre regra konaba kuidadu no transparénsia ne’ebé ezije iha jestaun konaba fundu ne’e, dirije ba jerasaun sira oras ne’e nian no jerasaun sira oin-mai, hodi promove kreximentu sustentavel ida ba país ne’e no hodi kontribui maka’as tebes ba hamenus moris-kiak rabat-rai iha ninia dimensaun hotu-hotu. * [ Zevonia Vieira | TAFARA.TL | 06.12.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *