Monday , December 10 2018
Home / Sosial & Politika / Desigualdade iha TL Sei Akontese, ONG Sira Ezije Ema Hotu Tenke Hetan Tratamentu Igual No Moris Diak
Kondisaun komunidade moris ne'ebe la igual, fase ropa no kuru bee iha mota foer. [Foto: Copyright Sapo.TL | 11.10.2018]

Desigualdade iha TL Sei Akontese, ONG Sira Ezije Ema Hotu Tenke Hetan Tratamentu Igual No Moris Diak

Relatório CRI Timor Leste nia gastu sosial tama iha klasifikasaun 148, husi nasaun 157. Gastu sosial ne’e haree ba Orsamentu Geral Estadu [OJE] nian aloka ba edukasaun iha deit 7.7%, saude 4.8% no protesaun sosial nian 10.5%. Alokasaun sira ne’e kiik liu kompara ho nasaun sira seluk nian, tantu iha Asia no Intenasional.

Relasiona ho relatório hosi The Commitment to Reducing Inequality [CRI] 2018 ka Komitmentu ba Reduz Disigualdade, Governu Timor-Leste hatudu komitmentu, oinsa reduz desigualdade ne’ebe tama iha klasifikasaun 132 hosi nasaun 157.

Hosi dadus refere hatudu katak Timor-Leste sei menus tebes, kompara ho nasaun sira ne’ebe halo ona esforsu, hodi hasa’e despeza estadu nian iha protesaun sosial, mellora politika taxa progresiva nune’e mos politika traballador sira nian.

Liu hosi konferensia imprensa, Oxfam no Core Group Transparency [CGT] informa ba jornalista sira, iha salaun Hak Farol, hafoin lansa relatório CRI 2018, katak kada nasaun nia komitmentu atu implementa politika no sistema sira hodi bele reduz desigualdade, liu-liu husi despeza estadu nian iha protesaun sosial, politika taxa, direitu traballador no salariu minimu.

Maski Governu Timor-Leste iha 2016 fo komitmentu atu prioritiza ba investimentu edukasaun no saude, maibé komitmentu ne’e la sustentavel iha OGE 2017, iha ne’ebe hatudu gastu ba mega projetu sira boot liu dala rua kompara ho gastu sosial ne’ebe tun ba bebeik, no la iha sustentabelidade ba uza fundu petroliferu, sai parte ida iha asuntu transparansia ne’ebe foka liu ba mega projetu no ne’e so benefisia ba ema oituan deit.

Liu hosi konferensia imprensa ne’e mos, organizasaun sosiadade sivil sira ne’e mos afirma katak, sosiadade sivil sira hotu hakarak ema iha nasaun ne’e hetan tratamentu ne’ebe igual, hodi asesu ba oportunidade ne’ebe hanesan no moris diak. Maibé desigualdade entre ema iha rural no urbana hodi asesu ba rekursu estadu nian ne’ebe la hanesan, hafraku dezenvolvimentu ekonómia no sosial iha Timor Leste. Atu reduz desigualdade presiza halo distribuisaun no prioritiza ba despeza estadu nian iha protesaun sosial, agrikultura no promove industria eskalaun kiik.

Maske ho problema desigualdade ne’ebe sei mosu, ONG sira apresia governu Timor-Leste nia esforsu tomak ne’ebe durante ne’e iha progresu politika no sistema hodi eleva protesaun sosial liu husi [bolsa da mae, idozo no veteranu], aplika salariu minimu, prosesu ba reforma fiskal, iha espasu ba sosiedade sivil hodi engana Governu ba mellora povu nia moris liu-liu ba bem estar nian.

Haree ba dadus sensus Timor-Leste no analiza balu hatudu katak, ema iha area rural kiak liu no la iha oportunidade ne’ebe hanesan ho ema ne’ebe hela iha sidade. Populasaun Timor-Leste maioria hela iha area rural no 70% moris nu’udar agrikultor. Nune’e, parseiru internasional no nasional preokupa kona-ba Governu Timor-Leste nia despeza ne’ebe seidauk sufisiente ba setor agrikultura no sei menus ba promove industria ki’ik sira no area turismu. Tuir Sosiedade Sivil hirak ne’e, bainhira governu aumenta investimentu iha setor agrikultura, turismu no industria eskalaun kiik ne’e sei asegura no haforsa rendimentu familiar no sei lori dezenvolvimentu sustantevel iha Timor-Leste ba agora no futuru.

Nune’e sosiedade sivil hirak ne’e husu governu Timor-Leste atu aumenta gastus ba protesaun sosial iha Orsamentu Jeral Estadu 2019, halo diversifikasaun ba ekonimia liu husu aumenta Orsamentu Jeral Estadu 2019 ba agrikultura.* [Martinho Moniz | Editor: Zevonia Vieira | TAFARA.TL| 11.10.2018].

 

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Komemora Loron Invasaun, PR Lú Olo Sauda CNC nia Inisiativa Hodi Hametin Memoria Kolektiva

Prezidente da Republika, Dr. Francisco Guterres Lú Olo sauda Centro Nasional Chega! no ekipa toma …

Leave a Reply

Your email address will not be published. Required fields are marked *