Thursday , November 23 2017
Home / Divertimentu / Caravana Ba Dala-5 Atu Promove Arte, Kultura No Turismu
Kategoria Grupu Municipiu Bobonaro, Inan Feton sira dere hela babadok iha Caravana Artistika Dala -5.[Foto: Zinho MD | TAFARA.TL | 02.06.2017].

Caravana Ba Dala-5 Atu Promove Arte, Kultura No Turismu

UNTL sai vencedor Kategoria Kultura Original, CSMA ho Bobonaro sai nudar grupo favouritu no munisipiu Viqueque sai nudar vencedor kategoria kultura munisipiu nian iha kompetisaun Caravana.

Carvana hanesan atividade importante ida ne’ebé sempre realiza husi Ministeiru Turismo Arte no Cultura iha kada tinan iha Dili. Ho nune’e iha fatin ne’ebe hanesan, iha tinan ida ne’e, Ministeiru Turismu Arte e Cultura loke tan oportunidade ba publiku hodi tuir kompetisaun caravana ida ne’e. Grupu ne’ebé regista hodi tuir kompetisaun caravana ba tinan ida ne’e hamutuk grupu 60, kompostu husi kategoria tolu, mak hanesan grupu sosiedade civil kultura original, grupo sosiedade civil kultura modernu, ho grupu municipio cultura. Partisipante hirak ne’ebe partesipa iha atividade refere kompostu husi katuas, ferik joven no labarik.

Ministru Turismu Arte e Kultura ne’ebe representa husi Secretaria De Estado Das Artes e Cultura, Maria Isabel de Jesus Ximenes, iha nia diskursu badak hatete ho laran ksolok hodi asiste obra artistiku ne’ebe nakonu ho formas oioin ne’ebe hatudu husi Timor oan sira, no caravana hanesan atividade artistika, turistika no kultural.

“Ho laran ksolok tebes iha kalan ida ne’e, tanba bele mai hamutuk fali ho imi iha ne’e atu ita hotu hamutuk asiste obra artistika ne’ebe nakonu ho cores, formas, tema, hatais no movimentu oioin husi timor oan sira. Caravana artistika sai hanesan atividade turistika artistika no kultural ne’ebe mak fo oportunidade ba inividu ou grupu sira hodi bele hatudu sira nia ideia artistika, no transforma ideias hirak ne’e ba produtu arte nian, atu publiku sira apresia no ikus mai bele senti animadu”. Dehan SEAC iha Largo de Lecidere.

Hare ba potensialidade no kreatividade ne’ebe mak Timor oan sira iha mak Ministeiru Turismu Arte Cultura (MTAC) oferese oportunidade caravana artistiku atu sira bele dezenvolve sira nia kreatividade no haburas liu tan iha area Turismu nian. Maria Isabel mos hatutan dehan, “Ministeiru Turismu Arte no Kultura hare ba potensialidade turistiku no kreatividade ne’ebe mak Timor oan iha, liu-liu joven sira oferese oportunidade liu husi atividade caravana artistika atu sira bele ezamina no promove sira nia kreatividade artistika. Ami fiar katak hamutuk ita bele haburas no dezenvolve liu tan turismu Timor nian no bele maximiza liu tan kapasidade artistika no kreatividade Timor oan sira nian liu-liu ita nia joven sira”.

Secretaria estadu ne’e mos informa katak realizasaun caravana ba tinan ne’e ba dala lima ona hahu husi 50 Goveru konstituisional, no atividade refere hamosu interese bo’ot ba komunidade Timor oan sira nia le’et.

Iha fatin hanesan, Presidente Juri ba Caravana, Olendina Caeiro hatete depois anunsiu rezultadu ba grupu sira ne’ebe sai hanesan manan nain ba caravana tinan ida ne’e katak, “Se mak laliu iha ne’e imi tenke buka hadia a’an para tinan seluk bele liu. La manan ne’e laos buat ida ita tenke triste maibe, la manan ne’e para ita atu hatete katak esforsu a’an atu diak liu tan. Ba sira ne’ebe tinan ne’e seidauk hetan, ba prepra a’an halo didiak atu tinan oin bele kompete fila fali. Ita mos tenke hatene interpreta saida mak caravana artistika no saida mak karnaval tamba buat hirak ne mós juri sira tetu hotu”.

Manan nain sira ba Caravana periodu 2017 ba Kategoria Sosiedade Sivil Kultura Original inklui: 10 lugar UNTL ho valor manan 2940, hetan premio Tasa 1, Aifunan no Osan $ 2,500.00;         20 lugar DIT ho valor manan 2870, hetan premio Tasa 1, Afunan no Osan $ 2,000.00; 30 lugar grupo Tane Kultura ho valor manan 2720, hetan premiu Tasa 1, ho Osan $1,500.00.

Manan nain ba Kategoria Grupu Sosiedade Sivil Modernu mak: 10 lugar UNITAL ho valor manan 2595 hetan premio Tasa1, Aifunan no Osan $ 2,000.00; 20 lugar grupo Floresta De Montana, ho valor manan 2470, hetan tasa 1, Osan $ 1,000.00; 30 lugar Grupo ETC ho valor manan 2720, hetan premiu Tasa 1, Osan $ 1,000.00.

Kategoria ba Grupu favouritu sosiedade sivil kultura original no modern nian manan hosi Grupu CSMA ho valor manan 2135, hetan premiu Tasa ho Osan $ 500.00. No mos Grupu favoutitu Munisipiu Bobonaro, hetan premiu tasa ho Osan $ 500.00.

Ba Kategoria Grupu kultura munisipiu manan sira inklui: 10 lugar Viqueque, ho valor manan 2560, hetan premio tasa 1, Aifunan no Osan $ 2,000.00; 20 lugar Aileu, ho valor manan 2395, hetan premio Tasa 1, Aifunan no Osan $ 1,500.00; 30 lugar Lautem, ho valor manan 2300, hetan premiu Tasa 1, Osan $1,000.00.

Grupu ne’ebe mak rezistu ba tuir Caravana ne’e hamutuk 67, no partisipante sira ne’e mai husi munisipiu 12, inklui mos Zona Espesial Oecusse, Grupu Universitariu, Ensinu Secundariu no sosiedade sivil.

Tuir programa Ministeiro Turismu Arte e Cultura atividade hanesan sei akontese fila fali iha tinan oin. Tuir observasaun jornalista TAFARA.TL eventu ne’e lao ho diak tamba hetan partisipasaun maximu husi joven sira iha Dili laran, no sira antuziasmo tanba hetan animasaun husi banda Muzika Fitun Furak.*[Bebiana Soares | TAFARA.TL | 02.06.2017].

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

INDMO Realiza Sertame ba Sentru Formasaun Publiku no Privadu

Institutu Nasional Dezenvolvimentu Mão de Obra (INDMO) loke sertame ba Sentru Formasain Publiku no Privadu. …

Leave a Reply

Your email address will not be published. Required fields are marked *