Monday , June 17 2019
Home / Sosial & Politika / DNJ NO DNAJ IHA SEDPAC TRANSFERE BA SEJT
Sekretariu Estadu Desportu no Promosaun Alta Kompetisaun, Osorio Florindo ho Sekretariu Estadu Juventude no Traballu, Nivio Magalaes foto hamutuk ho Funsionariu SEDPAC ne'ebe transfere ba SEJT akompana husi Diretor Geral SEDPAC, SEJT no Diretores Nasionais SEDPAC nian. [Foto: Martinho Moniz | TAFARA.TL | 26.10.2017].

DNJ NO DNAJ IHA SEDPAC TRANSFERE BA SEJT

Relasiona ho organika VII Governu Konstitusional nian, transforma Sekretaria Estadu Juventude no Desportu [SEJD] ba Sekretaria Estadu ba Desportu no Promosaun Alta Kompetisaun [SEDPAC], junta Juventude ho traballu hamutuk hodi transforma Sekretaria Estadu Politika Formasaun Profesional no Empregu [SEPFOPE] ba Sekretaria Estadu Juventude no Traballu [SEJT].

Relasiona ho organika VII Governu, loron 26/10, Sekretaria Estadu ba Desportu no Promosaun Alta Kompetisaun [SEDPAC] transfere funsionariu nain 15, ne’ebe haknar-an iha Diresaun Nasional Juventude [DNJ] no Diresaun Nasional Arte Juvenil [DNAJ] ba Sekretariu Estadu Juventude no Traballu [SEJT], hodi kontinua servi iha area ne’ebe durante ne’e Funsionariu sira haknar-an hela.

Tuir lista ne’ebe mak iha, Funsionariu Publiku mak haknar-an iha Diresaun rua, hamutuk 16, maibe SE-SEDPAC desidi tranfere deit funsionariu nain 15, tamba sei presija funsionariu balun hodi kontinua halo servisu iha SEDPAC.

Diretor Geral Sekretariu Estadu Desportu no Promosaun Alta Kompetisaun, Metodio Caetano Moniz, liu hosi introdusaun hatoo katak, iha tempu para hasoru malu, iha tempu para hafahe malu.

“Hafahe malu ida ne’e la’os hafahe ita nia fraternidade, fizikamente ita separadu fatin mak haketak ita, maibe nu’udar funsionariu publiku ita nia espiritu, ita nia integridade, ita nia profesionalismu atu servi povu rai ida ne’e, metin hela ho ita. Iha fatin ne’ebe deit, ita nia misaun mak servi, la’os servidu. Ita sei haktanek nafatin Povu rai ida ne’e, tuir ita nia mandatu hanesan funsionariu publiku”, hateten Metodio.

Metodio Moniz afirma katak, hodi akompanna nafatin governu ida ne’e, hafoin prosesu ne’e la’o hotu, sei prepara daudauk orsamentu ratifikativu, depois elabora hotu proposta orsamentu ratifikativu sei halo revizaun rasik ba dekretu organika orgaun do governu mak tutela ba SEDPAC. Prosesu ida ne’e mak sei la’o hodi hein programa governu aprova, prepara planu anual ba tinan 2018.

Diretor Geral SEDPAC husu ba Diretor Geral SEJT atu simu funsionariu sira ne’ebe mak transfere, labele konsidera sira hanesan bainaka, no husu funsionariu sira hatudu nafatin prestasaun servisu hodi servi ba povu iha rai ida ne’e.

Entretantu Sekretariu Estadu Desportu no Promosaun Alta Kompetisaun [SEDPAC], Osorio Florindo hateten katak, servisu iha ne’ebe deit mos servisu nafatin ba estadu

“Estadu mak Timor-Leste, la’os estadu Juventude Traballu, la’os estadu desportu alta kompetisaun. Knaar nafatin, fatin mak ket-ketak. Fatin mak ketak tamba politika, la’os tamba ita boot sira nia hakarak maka sai husi fatin ida ne’e atu ba fali servisu iha fatin seluk”, hateten Osorio Florindo.

Osorio Florindo akresenta liu tan, iha Novembru Dezembru nia laran, Parlamentu Foinsa’e sira sei halo atividade, nune’e SEDPAC pronto atu servisu hamutuk ho SEJT, para bele organiza halo susesu atividade ne’e nafatin. Tamba programa refere fo impaktu boot ba joven sira, liu-liu Parlamentu Foinsa’e, depois de sai husi ne’e sira ida-idak bele haknar iha fatin ne’ebe mak sira bele servisu, buka atu sustenta sira nia moris hodi kontribui ba prosesu dezenvolvimentu iha Timor-Leste.

Iha fatin hanesan Sekretariu Estadu Juventude no Traballu, Nivio Magalães iha nia intervensaun afirma katak sei buka atu halo tratamentu hanesan ba funsionariu hotu no sei la pulitiza instituisaun estadu nian.

“Hau bele garantia ba ita boot sira hotu katak, iha ne’eba tratamentu ba ita boot sira sei hanesan mos ho funsionariu sira iha ne’eba. Katak laiha bainaka, laiha uma nain, hotu-hotu hanesan, hotu-hotu funsionariu SEJT. Hau rasik sei la politiza instituisaun iha ne’eba hanesan ohin exelencia Sekretariu Estadu temi tiha ona katak, labele haree Sekretariu Estadu ne’e Ema PD, ne’ebe to’o cleaner mos tenki PD hotu, ne’e lae i sei la akontese”, esplika Nivio.

Serimonia transferensia ne’e hala’o iha Uma Laku Sekretaria Estadu Desportu ba Promosaun Alta Kompetisaun [SEDPAC] Lecidere, Dili, partisipa direta husi Sekretariu Estadu SEDPAC, SEJT no Funsionairu SEDPAC tomak. *[Martinho Moniz | Estajiadu, Dep.CS, UNTL | TAFARA.TL | Editor: Zevonia Vieira | 26.10.2017].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *