Thursday , May 23 2019
Home / Sosial & Politika / EA Sei Realiza Iha Fulan Maiu, Data Ba EA Prezidente da Republika Sei Anunsia
Ministru Estatal, Dr. Valention Ximenes halo entrevista ho jornalista sira iha palacio prezidensia. [Foto: Zevonia Vieira | 01.02.2018]

EA Sei Realiza Iha Fulan Maiu, Data Ba EA Prezidente da Republika Sei Anunsia

Relasiona ho desizaun ikus ne’ebe Prezidente da Republika, Dr. Francisco Guterres Lú Olo, anunsia iha loron 26/01 konaba eleisuan atensipada, ohin loron liu hosi enkontru entre Ministeriu Administrasaun Estatal [MAE], Comisaun Nasional Eleisaun [CNE] no Prezidente da Republika, katak tuir ajenda eleisuan sei akontese iha fulan Maiu.

Hafoin remata ekontru, ba jornalista sira iha palacio prezidensia 05/02, Ministru Administrasaun Estatal, Valentino Ximenes informa katak eleisaun sei halao iha fulan Maiu maibe data ka loron Prezidente da Republika mak sei anunsia

“Ami bele dehan katak, eleisaun ne’e hala’o iha fulan Maiu maibé data ne’e ami hakarak husik hela ba sua Ex.cia Prezidente da Repúblika atu bele anunsia i dekreta”, informa Valentino Ximenes.

Iha enkontru refere MAE No CNE entrega proposta unika ba Prezidente da Republika, konaba kalendiariu eleitoral. Tuir informasun hosi Valentino Ximenes katak objetivu hosi enkontru ne’e atu hatoo kalendario eleitoral, depois sei halo tiha ezersiziu boot ida no konsege hetan kalendari mai hosi opiniaun hotu-hotu, hanesan hosi STAE, CNE no mos rona orientasaun hosi Prezidente da Republika ho nia ekipa.

Hatan ba pergunta husi jornalista nian kona-ba preparasaun husi orgaun eleitorál rua ne’e, Valentino responde katak servisu tekniku hahu dadauk ona, rekrutamentu ba ofisiais STAE nian, brigada sira iha munisipiu tomak hahuu halo. Resensiamentu eleitoral hahuu lansamentu formal iha nivel nasional, iha Munisipio Ermera, semana oin sei haruka tekniku sira ba rai hanesan Inglatera, Irlandia, Portugal, Australia no Korea do Sul, atu bele atualiza kartaun eleitoral ba eleitor sira, hodi partisipa ativa iha eleisaun ida ne’e.

Ho situasaun polítika ohin la’o hanesan ne’e, halo públiku baruk atu partisipa iha momentu votasaun, nune’e Valentino Ximenes mós konsidera katak, ida ne’e sai hanesan dezafius, maibé nia promote katak sei buka maneira hotu-hotu, hodi garante partisipasaun ida ne’ebé masimu iha eleisaun antesipada.

“Dezafiu ba eleisaun ida ne’e mak partisipaun, tamba eleisaun ida ne’e primeira vez akontese ne’ebé ita halo iha ita nia istoria, maibe ninia karakter prosesu eleisaun tomak ne’e hanesan ho prosesu eleisaun baibain. Preokupasaun boot estadu liu-liu CNE nian mak ema nia partisipasaun komesa menus ba dadaun, nune’e ami tenta buka maneira mekanismu hotu-hotu, bele garante partisipasaun diak iha ninia rezultadu oin mai”, konfessa Valentino iha Palacio Prezidente.

Valentino mos hateten parte governu iha ona mekanizmu balun, hodi bele garante partisipasaun povu nian iha EA. Ih opsaun tekniku lima hodi garante partisipasaun sidadauk hotu, ida mak eleitoral sira bele muda ninia rezidensia provizoriamente, iha sentru sira urbanu hotu-hotu, ezemplu hanesan iha Baucau no Ermera bele partisipa hotu, maibe depois eleisaun hotu, tenke muda fali ba ninia rezidensia antiga ka moris fatin, segundu hanesan eleisaun uluk MAE oferese kareta hodi tula votante sira ba sira nia rezidensia, maibe agora difisil tamba orsamentu ne’ebé minimu tebes, nune sei tur hamutuk koalia kona ba ida ne’e ho diretor sira. Terseiru aumenta urnas signifika, tenke aumenta despeza katak tenke rekruta tan ofisias, seguransa, transporte no ekipamentus hotu iha estasaun votus hodi bele garante ema nia partisipasaun, ida fali prepara kaixa hodi ema hotu-hotu bele ba vota no rai eleitoral iha kaixa refere, hafoin remata tuku 3 mak foin sira bele foti kartaun eleitoral, maibe iha kestaun seluk mos tenke konsidera hanesan ema sira ne’ebé atu vota, tenke hein ninia prosesu inklui karta ofisiais. Ho prosesu hirak ne’e ba partidus politika hotu, estadu, governu, CNE no STAE fiar katak sei la prezudika ba eleitor sira hotu.

Total orsamentu ba Ea hamutuk $5 milhoes dollares Americano no orsamentu ida ne’e, orsamentu estadu nian. Kona ba seguransa ba EA ida ne’e sei garante lao ho normal.

Valentino apela ba sidadaun hotu ne’ebé responsavel tenke ezerse ninia direitu sivíku no direitu politiku atu ba vota, lalika rona rumores sira tamba ida ne’e bele deskoraza ema nia partisipasaun, “hau espera katak tinan ida ne’e ho ajuda Maromak nian, Matebian ba rai lulik, ita hotu-hotu bele ba partisipa diak liu tan”.

Entretantu iha parte sorin, Estudante hosi municipio Lautem, Imanuel do Rosario Ximenes, ne’ebe hela iha Dili ba, liga ho opsaun ne’ebe iha, bele garante partisipasaun publiku nian iha EA? Ba TAFARA.TL Imanuel responde katak sei agredese ba governu liu hosi CNE ne’ebe sei kria kondisaun bazeia ba opusan tekniku lima ne’ebe fo sai hosi governu liu hosi MAE.

“Ha’u fiar katak estudante hotu ne’ebé mak iha Díli, sei possivel partisipa iha EA ativamente. Kompara ho tinan kotuk, tuir data estatistika tinan 17 ba leten hodi partisipa iha eleisaun jeral, tanba ho opsaun ne’ebé tenke ba ida-idak nia rezidensia original ka moris fatin hodi vota, entaun eleitor sira liu-liu ba estudante ne’ebé halao estudu iha Dili, defisil tebes atu ba sira nia sentru votasaun iha area urbana”, hateten Imanuel

Imanuel mós hatutan ho opsaun lima refere nu’udar estudante ka joven ne’ebé responsavel fiar katak EA ne’ebé sei realiza iha fulan Maio, sei lao ho partispasaun maximu tanba ema hotu- bele vota iha ne’ebé deit, tuir opsaun ne’ebé bele muda nia rezidensia provizoriamente durante eleisaun.*[Maria do Céu |Editor: Zevonia Vieira | TAFARA.TL | 05.02.2018].

 

 

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *