Thursday , November 23 2017
Home / Ekonomia & Bisnis / Paizes Sanulu Nebe IMF Konsidera Kiak Liu Iha Mundu, Iha Tinan 2015
Catherine Samba-Panza, Prezidente Interinu Republika Sentru Afrikanu. [Foto: www.worldbank.org]

Paizes Sanulu Nebe IMF Konsidera Kiak Liu Iha Mundu, Iha Tinan 2015

Global Finance Magazine publika ona lista konaba paizes 10 nebe konsidera kiak liu iha mundu, tuir IMF ninia estimasaun iha tinan 2015.

Timor-Leste la inklui iha lista refere, tanba tur iha pozisaun 67 ho PIB per capita [PPP] USD 7,388.46 iha tinan 2015.

Housi lista ne’e, Republika Sentru Afrikanu hanesan paizes menus dezenvolvidus liu iha mundu, impaktu housi violensia sektaria, ma jestaun iha politika, no korupsaun nebe rezulta pobreza. PIB per capita [PPP] estimadu iha tinan 2015 so USD 640.00, kiik liu kompara ho paizes sira seluk iha mundu.

Iha pozisaun segundu mak Republika Demokratika Congo. Konflitus nebe la hotu iha pais ida ne’e nudar bareira no impede dezenvolvimentu politika, institusional no ekonomiku iha pais ida ne’e, nebe ninia PIB per capita [PPP] trajikamente baixu, so USD 750.00 iha tinan 2015.

Malawi alkansa kresimentu ekonomiku iha tinan ida ne’e, maibe inflasaun nebe as no dependenti ba doadores mos bot teb-tebes hanesan fatores hirak nebe kontribui ba vida moris mak baixu. PIB per capita [PPP] estimadu iha tinan 2015 so USD 820.00.

Liberia sei infrenta hela konsekuensias housi guera sivil durante tinan 20. Nune’e ninia ekonomia mos sei frajil hela. Numeru kiak as, analfabetismu no korupsaun kontribui ba padraun vida moris nebe baixu teb-tebes, ho PIB per capita [PPP] estimadu so USD 935.00 iha tinan 2015.

Instabilidade politika lori ameasas qualquer progresu ekonomiku no institusional. Nune’e mos ho pratika korupsaun nebe makaas aumenta numeru kiak iha pais ida ne’e. Iha tinan 2015 PIB per capita [PPP] Burundi so USD 951.00.

Industrias extrativas kontribui makaas ba kresimentu ekonomiku iha tinan ida ne’e, maibe Nigeria kontinua ho situasaun instabilidade politika, frajilidade institusional no dependenti ba apoiu housi doadores. PIB per capita [PPP] iha tinan 2015 ho montante estimadu USD 1,070.00.

Hafoin alkansa kresimentu ekonomiku mak forte iha dekada ikus, liu-liu housi setor industria pertambangan, maibe Mozambique falha atu introdus ninia rezultadus hodi hamenus kiak, liu-liu iha area remotas. PIB per capita [PPP] iha tinan 2015 menus housi USD 1,210.00 tuir estimasaun IMF.

Eritrea hasoru konsekuensias bot ho Governo ida nebe represivu tebes iha mundu. Hodi nune’e, ho sansaun housi UN no ful-fulan sidadaun barak mak halai housi pais ida ne’e lori impaktu ba situasaun ekonomia, nebe estimsaun PIB per capita [PPP] so USD 1,200.00 iha tinan 2015.

Ho situasaun politika nebe ladun kondusivu no epidemic virus ebola mak akontese iha tinan 2014, Guinea mos tama iha lista refere ho estimasaun PIB per capita [PPP] menus housi USD 1,400.00 iha tinan 2015.

Iha pozisaun desimu mak Madagaskar, nebe infrenta konflitu politika ho tempu naruk no ma governasaun estraga tiha ekonomia housi pais ida ne’e. Iha tinan 2015, IMF estima PIB per capita [PPP] Madagaskar menus housi USD 1,500.00.* [MCMONIZ | TAFARA.ORG | 13.12.2015].

About Metodio Caetano Moniz

Metodio Caetano Moniz, nudar fundador TAFARA.TL, hamutuk ho Fernando A. da Costa & Zevonia Vieira.

Check Also

SEA Games 2017: Timor-Leste Hetan Medalha Bronze Tolu Hosi Taekwondo

Modalidade Taekwondo salva Timor-Leste nia oin wainhira atletas nain tolu kontribui medalha bronze (perunggu) 3 …

Leave a Reply

Your email address will not be published. Required fields are marked *