Friday , September 21 2018
Home / Opini / Eleisaun 2018: Faktores Determinante Hodi Hasa’e Votus Partidu
Fernando Antonio da Costa [Ato "Lekinawa" Costa]

Eleisaun 2018: Faktores Determinante Hodi Hasa’e Votus Partidu

Politika han tiha hotu ona ema barak nia ruin dolen. Bele hatete katak ema barak dada iis ka husik iis ho dois ka morin politik nian deit. Sientementu hirak ne’e mosu iha tinan ida ikus ne’e nia laran, antes eleisaun 2017 no hafoin resultadu eleisaun nian. Notavel iha publik nia matan, politik nain sira halo esforsu ‘selok malu’ tun sae hodi bele ukun ka hodi hapara sira ne’ebe ukun hela. Teatru ida ne’e ninia frequensia tun uituan hafoin iha ona desizaun Presidente Republika Lu-Olo nian semana hirak liuba.

Ikus-ikus ne’e, dirkusu politika muda hosi hadau malu ba kaer poder liu hosi Parlementu ba fali eleisaun antisipada ka eleisaun subsequente. Agora ema hotu tetu ba tetu mai hela kona ba akontesementu tuir mai, tempu eleisaun no antes eleisaun 2018. Ema barak halo ninia observasaun no analiza se los mak sei manan iha eleisaun subsequente ne’e. Koligasaun hahu tiha ona, partidu tolu, CNRT, PLP no KHUNTO. Iha surat tahan leten bele haree ona katak, Partidu Koligasaun mak sei manan. Partido Koligasaun Governo nian, Fretilin ho PD, halo tiha ona desizaun atu la lao hamutuk, ka la halo koligasaun antes, hodi hasoru eleisaun tuir mai ne’e. Partidu ki’ik sira ne’ebe la hetan asentu iha Parlementu, sira mos halai hamutuk iha koligasaun ida tiha ona. Explisitamente bele hatete katak, Partido Koligasaun mak bele forma governo ona, hafoin eleisaun 2018. Tanba sira nia hamutuk bele hetan tiha ona kadera 35. Partidu sira seluk karik sei hela deit iha opozisaun, ka tama ba governo, depende negosiasaun hafoin eleisaun 2018.

Maibe leitura ba mapa rezultadu eleisaun ida la simplis hanesan ne’e. Rezultadu eleisaun depende ba faktores sira seluk. Situasaun politika ne’ebe agora lao dadaun bele favoravel ba partidu ida ka liu, maibe povo bele determina oin seluk iha tempu eleisaun. Povo hatudu tiha ona ninia desizaun matenek iha eleisaun 2017, CNRT nudar inkumbente (kaer ukun) iha tempu ne’eba, loloos ne’e iha vantajen atu manan ho numeru bo’ot, maibe ne’e la akontese. Povo fo votus barak nafatin ba Fretilin, fo votus barak mos ba PLP, partidu ida foin hahu, no fo votus barak liutan ba PD (kompara ho votus PD iha 2012).

Observasaun seluk, liliu hirak ne’ebe mosu iha media sosial, halo referensia forte ba prezensa lideransa historiku nudar fatores importante ida mak determina ema nia votus. Eleisaun Presidensial 2012 no 2017 hatudu momoos influensia lider historiku, liliu Xanana Gusmao, hodi determina kandidatu ida ninia elektabilidade. Maibe situasaun ne’e diferente bainhira tama ba eleisaun parlementar. Rezultadu eleisaun 2017 konfirma saida mak hetan hosi The Asia Foundation ninia survey opiniaun (Tatoli) mak publika iha 2014. Rezultadu ida hosi survey ne’e hatete katak respondentes 50% mak hatete sira nia preferensi bot liu fo votu ba partidu ne’ebe iha influensia ba ukun rasik an. Fretilin ninia vitoria iha eleisaun 2017, no mos iha eleisaun tolu seluk, konfirma duni preferensia ida ne’e.

Iha eleisaun mak besik ona ita nia oin ne’e, faktores saida deit mak sei influensia partidu ida ka koligasaun atu manan ka hasae numeru votus iha eleisaun? Iha nasaun dezenvolvidu sira, asuntu ekonomia mak dala barak sai faktor determinante ba eleitores nia desizaun. Ba Timor-Leste, vota bazeia ba issue ka problema mak atu resolve ne’e ladun hetan fatin iha eleitories barak nia hanoin. The Asia Foundation nia Tatoli Survey 2014 hatete katak 22% mak halo desizaun ba hili bazeia ba issue, signifika iha votantes lubuk ida seluk mak iha preferensia seluk. Hakerek ida ne’e hakarak temi sai faktores seluk tan, inklui proximidade istoria, lider istoriku, inkumbente, issue no imajen kandidatu/a membru Parlementu Nasional ne’ebe determinante ba hasae votus iha eleisaun.

Ida, exploitasaun ba istoria pasadu sei kontinua hetan fatin importante iha eleisaun. Bele nota katak diskusaun publiku sira, offline ka online, dala barak mak sei hetan influensia makaas hosi istoria pasadu nian. Eleitores sira sei haree nafatin ba se se mak tama iha elite partidu nian. Sira buka hatene ema ne’e nia antesendente, liliu karik nia involve iha luta ukun rasik an, ka hamutuk ho inimigu sira. Preferensia ida ne’e forte tebes ba sira ne’ebe iha istoria pasadu ladiak ho ema ne’e, ka istoria pasadu nebe iha relasaun ho ema refere. Balun mos haree se mak iha topu lideransa partidu nian, bainhira topu lideransa mai hosi lideres historiku sira, maski iha partidu laran ne’e iha ema hirak ne’ebe uluk pro-otonomi, sira sei la preokupa. Votantes ne’ebe hili hodi fo votus tuir sientementu istoriku ne’e halo opsaun hodi hili partidu ne’ebe mak iha baze istoria forte liu. Preferensia ida ne’e temi tiha ona iha leten, ligadu ho Survey Tatoli nian iha 2014. Resultadu eleisaun dala hat komprova duni preferensia ida ne’e.

Rua, fator lider ka lider historiku mos kontinua sai nudar fator ida mak determina eleitor nia votu. Eleisaun Timor-Leste ladun sentraliza iha politika partidu nian, karik iha mos uituan deit, barak liu sentraliza ba lideres partidu. Bainhira desizaun sentraliza ba lider, avaliasaun ba kandidatu ka lideres ninia qualidade mak determina desizaun ba vota. Votantes ne’ebe politikamente edukadu sei haree no tetu didiak liderese partidu no ninia kandidatu sira nia kharizma, kompetensia, no integridade hodi halo desizaun ba vota. Votantes ne’ebe halai tuir deit lider no kandidatu sira tanba bazeia deit ba istoria pasadu, sei desliga totalmente kestaun kompetensia no integridade hodi desidi sira nia votu. Votantes hanesan ne’e fasil monu ba manipulasaun lider nian no iha tendensia atu promove kultu ba lider ida, tanba sira susar atu hatudu hahalok diskorda ho desizaun ruma mak lider ne’e halo. Ita nia situasaun hatudu katak partidu hotu-hotu iha ninia lider istoriku, tuir sira nia tempu no grau partisipasaun iha funu ba ukun rasik an ninian. Maibe Fretilin, CNRT, PLP, no PD mak iha ninia lider ne’ebe ho todan istoria ne’ebe bo’ot kompara ho partidu kik sira seluk. Partidu sira sei kontinua halo exploitasaun ba lider istoriku sira nia pasadu hodi dada interese votantes.

Tolu, nudar inkumbente iha governasaun ida mak sai nudar factor importante hodi determina manan, ka hasae numeru votus iha eleisaun ba inkumbente ne’e. Importansia ida ne’e existi tanba inkumbente ne’e, durante tempu governasaun komplementa ka hakonu tiha ona ninia promesas politiku sira, ne’ebe nia halo durante kampanne. Iha sorin seluk, nudar inkumbente, sei hasoru mos dezafiu, bainhira iha ninia governasaun mosu fallansu barak, inklui la konsege implementa promesas politik sira, implementa maibe laos halo ho boa-governasaun, no mos hili ka apoint ema ‘sala’ laos tuir eleitor sira nia hakarak hodi ba okupa pozisaun politik sira. Opozisaun nudar potensia futuru governo sei explora frakezas hirak ne’e hodi halao kampanne iha eleisaun. CNRT nudar lider ba Koligasaun Partidu iha governasaun no mos iha parlementu periodu rua nia laran, durante ninia periodu ukun, implementa ona politika no programa hodi halo mudansa ba povo nia moris. Rezultadu hosi Survey Tatoli fo sai figura pozitivu balun ligadu ho governasaun ne’ebe lidera hosi CNRT. Kuaze 80% respondentes mak dehan governo halo buat diak, 65% dehan governo rona no konsidera publiku nia lian, no kuaze 50% ba leten mak hatete instituisaun estadu nian sira halo servisu ho diak. Survey IRI Timor-Leste nian iha 2016, mos hatudu nota positivu lubuk ida ba governasaun ne’ebe lidera hosi CNRT (29% dehan governo halo buat diak tebes, 45% dehan halo buat diak). Bainhira haree dadus hirak ne’e, hatudu duni katak CNRT ho ninia aliadu sira konsege implementa duni ninia programa mak sira promete tiha ona. Maski nune’e eleitores kontinua fo fiar ba Fretilin, ka Fretilin mak manan nafatin eleisaun. Ne’e kontradis duni, maski nudar inkumbente iha pozisaun diak liu hodi halo influensia ba eleitor sira, maibe realidade hatudu oin seluk. Iha tinan ida ikus ne’e, hafoin eleisaun 2017, inkumbente mak Fretilin ho PD, maibe sira nia tempu ukun ladun naruk hanesan ho CNRT ho ninia aliadu sira.

Hat, maski dadus survey The Asia Foundation nian hatete katak preferensia votantes atu vota bazeia ba issue ne’e kik (22%), maibe kampanne bazeia ba issue, importante nafatin hodi manan eleitores sira nia desizaun. Eleitores klase mediu sira barak mak hakarak ona halo desizaun ba vota bazeia ba programa Partidu nian. Iha Survey Tatoli nian hatudu katak infrastrutura, liliu estrada, sai nudar asuntu ida mak sai preokupasaun bot iha publiku (94%), no mos be mos (40%). Survey IRI nian mos hatudu pursentajen bot (29%) mak preokupa ho estrada. Survey ne’e mos hatudu progresu hosi governo nia servisu ba area saude (79%) no edukasaun (71%). Bainhira haree dadus hirak ne’e bele nota katak partidu koligasaun ninia governasaun halo duni servisu diak. Bazeia ba dadus ne’e, loloos CNRT iha opurtunidade atu manan barak liutan iha eleisaun 2017 nian. Maibe, karik eleitor sira nia preferensia atu vota tuir asuntu seidauk forte.

Lima, fator determinante ida seluk mak proximidade kandidatu/a ba eleitores. Iha rai dezenvolvidu sira, proximidade kandidatu/a ne’e bazeia ba ideolojia, ka politika ne’ebe kandidatu ne’e promove. Iha ita nia situasaun, proximidade kandidatu relasiona liu ho relasaun familia, lokalidade, no partisipasaun sosial. Kandidatu ne’ebe mak reprezenta familia ne’e iha ligasaun luan ho familia sira seluk iha ninia lokalidade, no partisipa bebeik iha eventu sosial familia nian sira, mak sei hetan opurtunidade bo’ot liu hodi hasa’e numeru votus. Situasaun ida ne’e mais favoravel liutan bainhira kandidatu/a ne’e iha bagajen istoria pasadu forte, iha kompetensia no iha integridade.

Maski temi ona fator sira iha leten ida pur ida, ligasaun entre fatores hirak ne’ebe temi ona ne’e mos presija tau iha konsiderasaun. Partidu ida iha lider forte maibe dala ruma iha kandidatu/a ho issue kampanne fraku mak sei kontribui ba hamenus votu, vice versa. Kondisaun ne’e aplikavel ba ligasaun entre fatores sira seluk mos. Pozisaun furak liu mak bainhira partidu ida iha fator lima ne’e mak forte hotu. Mais ne’e seidauk akontese iha eleisaun ita nian. Hakerek ida ne’e ladun haree hosi aspeitu eleitores nian, eleitores ninia preferensia no kontextu dala barak forma sira nia preferensia ba vota, no mos forma partidu ninia pensamentu kona ba ajenda eleisaun nian. [Ato ‘Lekinawa’ Costa | TAFARA.TL | 20.02.2018]

Ato ‘Lekinawa’ Costa

Ativista RENETIL iha Dili

*opiniaun iha hakerek ida ne’e responsabiliza hosi hakerek nain laos instituisaun sira mak hakerek nain hak’nar an ba.

 

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

La’o Hamutuk Reminds Authors that their Writing has Consequences

Freedom of speech comes with responsibility. Although La’o Hamutuk opposes legal measures which could restrict …

Leave a Reply

Your email address will not be published. Required fields are marked *