Thursday , November 23 2017
Home / Eleisaun Parlamentar / Alkatiri: Respeita Desizaun, Se CNRT Hakarak Sai Opozisaun
SekJer Partidu FRETILIN, Mari Alkatiri hala'o intervista ho Media Nasional iha edifisiu Palacio Presidente, Dili. [Foto: Maria do Ceu | TAFARA.ORG | 26.07.2017]

Alkatiri: Respeita Desizaun, Se CNRT Hakarak Sai Opozisaun

Presidente da Republika, Fransisco Guterres Lú-Olo hasoru malu ho lider partidu. Objetivu esensiál husi sorumutu ne’e mak oinsá kria klima konfiansa entre lideransa partidaria.

Sekretariu jerál Partido FRETILIN, Mari Alkatiri, ba jornalista sira katak sei servisu hamutuk ho partidu sira seluk hodi lori dezenvolvimentu mai rai ida ne’e.

“Hahu husi partidu ne’ebe konsege tama Parlamentu, husi leten mai kraik, ha’u sei ko’alia ho sira seluk mos, 21 partidus partisipa iha eleisaun atu kria, kontribui klima konfiansa entre lideransa partidaria no entre partidus para hotu-hotu bele servisu hamutuk. Konsolida saida mak ita hetan ona to’o agora, paz, estabilidade, demokrasia no servisu hamutuk oinsá atu lori dezenvolvimentu mai rai ida ne’e.”

Tuir ajenda ne’ebe fo sai, ohin loron (26/07/2017) sei iha sorumutu entre Prezidente Repúblika Francisco Guterres Lú-Olo, hasoru malu ida-idak ho Sekretariu Jerál partidu FRETILIN, Mari Alkatiri, Sekretariu Jerál partidu CNRT, Francisco Kalbuady Lay no Presidente Partidu PLP, Taur Matan Ruak.

Bainhira jornalista hamosu pergunta ne’ebé liga ho forma governasaun foun. Alkatiri hatete katak, ne’e seidauk to’o tempu tanba apuramentu seidauk hotu. CNE sei halo apuramentu finál, depois sei lori ba Tribunál Rekursu halo konfirmasaun. Formasaun Governu so depois fo sai husi Tribunál Rekursu.

Hatan ba dúvida ne’ebé hamosu husi jornalista sira kona-ba FRETILIN sei halo koligasaun ho sé? Alkatiri dehan, uluk kedas FRETILIN hatete ona, FRETILIN manan, Xanana mós manan no FRETILIN sei halo koligasaun ho partidu seluk.

“FRETILIN uluk halo kampaña ne’e, FRETILIN dehan kedas, sé la hetan maioria absoluta tenki servisu hamutuk ho partidu seluk. Bele iha koligasaun, bele iha governu minoritaria inkluzaun, bele iha governu minoritaria insidensia parlamentar, iha formatu oi-oin mak ita bele uza,” Hatete Mari.

Nia mós akresenta tan katak, “Se iha maioria absoluta mós FRETILIN dehan kedas ona, FRETILIN sei la ukun mesak, ne’e dehan dalabarak. Iha fatin hotu-hotu FRETILIN manan, Xanana manan. Antes ne’e atu manan ka la manan ha’u hatete ona buat ne’e. Ha’u hanoin polítika ne’e iha konsistensia, ba kampaña hatete buat ida, tenki konsistente ho saida mak ó hato’o iha kampaña, sé la’e povu aban bairua sei la fiar ona.”

Nune’e jornalista husu, karik iha koligasaun entre CNRT, FRETILIN no PLP? Alkatiri hatete, “Ha’u seidauk ko’alia ho PLP, ha’u lakoi ko’alia dehan bele depois ema hirus fali ha’u, ha’u lakoi.”

Nia hatutan tan, “FRETILIN sei la sai opozisaun, tanba FRETILIN tinan lima ona , 2012 to’o agora FRETILIN sai opozisaun. Mas ida konstrutiva, la’os opozisaun para atu hamonu bebeik governu. Sé sai opozisaun hanesan FRETILIN nian halo, ne’e mak desizaun CNRT nian, tenki respeita. Maibé biar nune’e ha’u sei bolu nafatin ha’u nia kompadre Xanana par mai hamutuk ho FRETILIN par atu lori rai ne’e ba oin.”

Presidente Lu Olo mos halo enkontru ketak ho Sekretariu Jerál Partidu CNRT, Francisco Kalbuady Lay, iha loron hanesan no fatin hanesan.

Iha intervista ho jornalista sira, Kalbuady hatete katak, “PR Lú-Olo konvida partidu CNRT mai la’os atu ko’alia kona-ba forma Governu. Ne’e hanesan ambiente ida, PR nu’udar aman ba nasaun nian, nu’udar Xefi Estadu atu konvida ami mai para kria ambiente paz no kria ambiente konfiansa entre ita hotu-hotu, liu-liu lider polítiku sira. Ha’u hanoin oportunidade ida di’ak tebes, onra boot ba CNRT, oportunidade ohin dadersan bele hasoru PR no mai rona PR, Xefi Estadu nia hanoin. Iha sorin seluk, hato’o de’it parabens ba iha povu tomak, katak eleisaun parlamentar ida ne’e, la’o ho di’ak teb-tebes.”

Wainhira jornalista husu kona-ba CNRT atu serbisu hamutuk ho FRETILIN, maibé Sekretariu Jerál ne’e hatete katak seidauk la’o to’o iha ne’ebá. Nia kontinua hodi dehan, iha Partidu CNRT iha nia regras rasik. Nune’e iha 29/07, Partidu CNRT sei halo konferensia nasionál Partidu CNRT nian. Desizaun hotu sei mosu iha konferensia ne’e.

Nia mós realsa liu tan kona-ba mensajen husi povu nian ne’ebé klaru no hakarak nafatin paz no estabilidade. “Mensagen husi povu, klaru katak povu hadomi nafatin, hakarak duni paz no estabilidade. Liu husi sira nia votu, fó ona mensajen mai ita hotu-hotu, ne’ebé rai ida ne’e presija ema hotu-hotu. Parabens ba povu tomak tanba bele fó mensagen ne’ebé klaru katak ita hotu tenki hamutuk.” Dehan Kalbuady Lay.

Tuir ajenda hosi Edifisiu Presidensia da Republika nian, Presidente Lú-Olo sei hasoru malu ketak ho Presidente Taur Matan Ruak, iha tuku 3 lokraik, ohin.* [Maria do Ceu | TAFARA.ORG | Editor: Ato Lekinawa | 26.07.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Ministru Somotxo Apela Ba Povu Tomak Hodi Hakmatek Nafatin

Xefe Estadu Maior Jeneral F-FDTL, Lere Anan Timur,  Ministro de Defesa e Seguransa, Agustinho Sequeira …

Leave a Reply

Your email address will not be published. Required fields are marked *