Thursday , November 23 2017
Home / Eleisaun Parlamentar / Mari Alkatiri: Primeiru Parseiru Ne’ebe Hau Sei Eskolla Mak Xanana
Lider Partidu Nain Rua Koalia ba Malu.[Foto: jornalbisnistimor.com]

Mari Alkatiri: Primeiru Parseiru Ne’ebe Hau Sei Eskolla Mak Xanana

“Ha’u nia preferensia governu koligasaun ho partidu ida, Hau servisu hamutuk ho Xanana tinan rua tolu resin, koñese diak hanesan parseru servisu, parseiru ke ha’u sei eskolla mak Xanana.”

Deklarasaun ne’e hato’o husi Sekretariu Jeral Partidu Frente Revolusionariu Timorense Independente [FRETILIN] Dr.Mari Alkatiri, iha intervista direta ho Jornalista TAFARA.TL iha Committee Central FRETILIN [CCF], Dili, 23/07/2017.

Povu ezerse sira nian lian iha loron 22/07, liu hosi elisaun legislativa, ne’ebe mak sei determina estadu nian distinhu ba iha futuru. Liu hosi intervista direitamente jornalista TAFARA.TL ho Sekretariu Jeral Fretilin, Dr.Mari Alkatiri hodi konfirma kona ba Fretilin sei manan absoluta iha periodu ida ne’e. Maibe tuir rezultadu provizoriu iha horas ne’e Fretilin ho pursentu 29,71% no CNRT 28,69%.

Hatan ba kestaun ida ne’e, Sekreatriu Jeral Fretilin afirma, povu la fo absoluta ba partidu nem ida, tamba abstensaun mos barak.

“Hau horseik kuandu hau kolia seidauk hatene nivel ba abstensaun ne’e boot ba nebé, abstensaun barak ne’e signifika ema Fretilin barak mak la vota. Ami konta ona mais ou menus 70 ou 80 mil ema Fretilin mak la vota, ne’e mak halo sasan la’o oin seluk”, esplika Mari Alkatiri.

Maske nune’e lider Fretilin ne’e sente kontenti, tamba povu fo nafatin responsabilidade ba Fretilin hodi lidera ukun. Relasiona ho Governu foun, Fretilin nu’udar partidu ne’ebé manan maioria simplis, bele forma governu koligasaun ho partidu seluk ou bele forma governu mesak deste ke iha intendimentu iha parlamentu, signifika apoia desidensia parlamentar hetan apoiu husi partidu seluk, hanesan agora daudauk akontese iha Portugal, governu ne’e minoritariu maibe hetan apoiu husi Partidu rua tan iha parlamentu. Ida ne’e bele mantem, laiha krize institusional. Maske nune’e Sekretariu Jeral FRETILIN prefere forma governu ho koligasaun maske iha dalan atu forma governu mesak, hodi hamutuk dezenvolve Timor-Leste sai buras liu.

“Hau nia preferensia ba iha governu koligasaun ho partidu ida. Hau servisu hamutuk ona ho Xanana tinan rua tinan tolu resin. Ami koñese malu uluk kedas diak hanesan amigus, i agora koñese malu diak mos hanesan parseiru iha servisu. I hau hanoin primeiru parseiru ke hau sei eskola mak Xanana,” tenik Sekretariu Jeral FRETILIN.

Relasiona ho deklarasaun Prezidente Partidu Congresu Nasional Rekonstrusaun Timorense [CNRT] Kay Rala Xanan Gusmão, ne’ebe ho komitmentu katak sekarik CNRT la hetan 33 kadeira iha Parlamentu Nasional, CNRT sei  sai opozisaun.

Ho deklarasaun ida ne’e, Dr.Mari Alkatiri esplika katak, deklarasaun ne’ebe mak Xanana Gusmao hateten ne’e parte hosi kampaña politika ne’ebe bele akontese maibe tempu kamapaña hotu ona, hanoin deit ba povu ida ne’e.

“Tempu kampaña ita kolia buat barak mas kampaña bainhira hotu ona ita hanoin deit ba povu ida ne’e, ita hanoin ba rai ida ne’e, ita nia pozisaun saida mak diak liu para atu servi ba povu ida ne’e, rai ida ne’e, i hau fiar katak Xanana sei hatene duni, atu servi povu ida ne’e rai ida ne’e, nia tenki ativu iha exekutivu, labele sai deit iha opozisaun”, esplika Dr.Mari Alkatiri.

Prezidente Autoriedade ZEEMS ne’e sublina liu tan, adversariu iha kampaña, kritika malu, ne’e liu ona, agora adversariu laiha ona, hanesan Timor-Oan, kompatriota hotu, buka atu servi rai ida ne’e. Demokrasia nune’e duni, hanesan jogu ida perante kampaña mais liu ona-liu ona, agora tenki hamutuk fali atu lori rai ida ne’e ba oin.

Entretantu Membru komunidade Suku Motael, Franscisco Menezes ba TAFARA.TL hateten, se deit mak manan hodi ukun presija halo dezenvolvimentu, tau matan ba povu sira ne’ebe iha area remotas no hakoak ema hotu-hotu.

“Se deit mak manan bele dezenvolve rai Timor ne’e halo diak, ba hare kamada sosial hotu kedas, atu kamada iha leten, iha klaran ka iha okos, ne’e tenke dezenvolve halo didiak liu-liu ba ita nia maluk sira iha knua ne’eba be araska los, ezize estrada, ahi mos seidauk to’o, be mos laiha, ida ne’e mak inportante liu,” lian hanesan mos temi husi Membru Komunidade Suku Metiaut, Cidalia Guterres Gusmão.

Eiz Primeiru Ministru Dr.Mari Alkatiri hato’o obrigadu ba povu tomak tamba akompanha prosesu kampaña ne’e ho hakmatek, hatudu maturidade laiha violensia. Mari Alkatiri husu ba povu Timor-Leste atu nafatin mantem ida hanesan ne’e ba oin, la’os deit tamba atu forma Governu foun, mas husi ne’e ba oin povu tenki partisipa nafatin iha dezenvovimentu.

Nia mos husu ba Povu atu partisipa ativu iha prosesu konstrusaun estadu, labele pasiva atu nune’e ita hotu mak autor ba dezenvolvimentu nasional. “Povu tenki partisipa, liu liu Joven sira tenki partisipa para bele dezenvolvimentu ne’e akontese, se lae se mak atu halo los. Bainhira povu la partisipa, povu senti benefisia deit entaun se mak halo dezenvolvimentu.”* [Martinho Moniz | TAFARA.TL | Editor Zevonia Vieira | 23.07.2017].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Komunidade Unidade VI Quelecai Relembra Masakre Santa Cruz 12 Novembru

Loron 12 fulan Novembro 1991 loron nakukun ba Juventude Timor-Leste, iha ne’ebe Jovens barak fakarak …

One comment

  1. Espera lideres nain rua ne’e, no lideres politiku sira seluk bele aseita malu hodi forma Governo ida nebe forte no fokus ba hadia ema nia moris.

Leave a Reply

Your email address will not be published. Required fields are marked *