Tuesday , December 12 2017
Home / Eleisaun Parlamentar / Xanana Gusmao La Partisipa Enkontru Ho Prezidente Republika
Francisco Kalbuady halo intrevista ho Jornalista sira hafoin inkontru ho Prezidente Republika.[Foto: Zevonia Vieira | TAFARA.TL | 03.08.2017].

Xanana Gusmao La Partisipa Enkontru Ho Prezidente Republika

 “Ami reprezenta partidu CNRT, tanba iha konvite ne’e hateten dehan konvida partidu CNRT”. Sekretariu Jeral Partidu CNRT, Francisco Kalbuady hateten.

Prezidente Republika konvoka enkontru ho partidu CNRT tuir kna’ar ne’ebe mak esplika iha Konstituisaun artigu 106, depois de anunsia official hosi Tribunal Rekursu.

Hafoin hasoru malu ho Prezidente Republika, Dr.Francisco Guterres ‘Lu Olo’, ba jornalista sira iha loron 3/08,  iha palasio prezidente Bairo Pitte hateten katak nudar Sekretariu Jeral CNRT hamutuk ho Premeiru Vice Prezidente CNRT, depois simu tiha konvite, hosi Prezidente Republika, hodi fo hanoin ba partidu sira atu konsidere interese nasional ne’ebe as liu interese partidu idak-idak ninian.

Hatan ba perguntas hosi TAFARA.TL tanba sa Prezidente Partidu CNRT la marka prezenja ba dala rua, ne’ebe hetan konvite ofisial hosi Xefe Estadu?

Sekretariu Jeral CNRT, Francisco Kalbuady hateten, “ami reprezenta partidu CNRT tanba iha konvite ne’e hatete dehan konvida partidu CNRT”.

Francisco Kalbuady reaforsa liutan katak, sei halo konferensia iha CCD, hosi loron 4 to 5 Agustu, hosi konferensia mak sei hasai rezultadu, no tenke respeita kongresista sira nian desizaun.

“Ami hanesan segundu mais votadus, ami sei hein karta hosi Fretilin, mais antes ida ne’e mos ami la bele halo buat ida enkuantu sedauk halo konferensia. Ami sei tau interese nasaun no povu nian as liu”, esplika Kalbuady.

Tuir komitementu durante kampanna politika hosi CNRT kona ba se karik CNRT la manan absuluta, partidu CNRT sei say opozisaun iha parlamentu. Bainhira TAFAR.TL konfirma kestaun refere, Atual Ministru Turismo no Kultura la konsege responde asumtu ida ne’e.

Iha parte sorin, estundate UNTL, Lorensa Verdial ba TAFARA.TL ho espektativa katak partidu hotu tenke iha maturidade hodi foti desizaun ba povu Timor nian diak. Hanesan komunidade triste tanba Prezidente CNRT la respeita konivte formal hosi estadu.

“Hau triste tanba dala rua ona Prezidente CNRT hetan konvite hosi Xefe Estadu maibe nafatin la mai partisipa, razaun saida mak nia la mai marka prezensa tenke esplika nia razaun”, tenik Lorensa Verdial.

Lorensa hatutan liutan katak espera CNRT bele iha vontade hodi tur hamutuk hodi foti solusaun nebe diak liu no povu lakohi iha elisaun antisipada tanba ida ne’e sei gasta osan barak no la fo vantajen ba rai ida ne’e.* [Zevonia Vieira | TAFARA.TL | 03.08.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Aniceto: Hau Sei Nafatin PPN To’o Desizaun Tribunal Rejeita Pedidu Ka Iha Ona Destituisaun Definitivu

Prezidente Parlamentu Nasional, Aniceto Guterres ba jornalista liu hosi konferensia imprensa hateten katak publiku tomak …

Leave a Reply

Your email address will not be published. Required fields are marked *