Saturday , April 20 2019
Home / Sosial & Politika / Entrevista Eskluzivu ho NN: “Hau Hetan Moras HIV/SIDA Tanba Ransu Livre”
This photo/image is courtesy of Photoshare, taken from www.who.int

Entrevista Eskluzivu ho NN: “Hau Hetan Moras HIV/SIDA Tanba Ransu Livre”

DILI – Iha loron Sesta (07/04/2017), jornalista Lian Foinsa’e (LF), Secretaria de Estado da Juventude e do Desporto, Beldemira de Araujo halo entervista eskluzivu ida ho vitima moras HIV/SIDA iha Dili [ita hanaran deit NN/Vitima], hodi koalia kona-ba vitima ninia esperensia moris, hahu husi molok no hafoin kona virus ida nee. Vitima rekonhese katak, moris ho HIV nee la fasil maibe tenke iha nafatin korajen. Nia hare katak, ema barak mak iha persepsaun negativa hodi diskrimina pasiente HIV/SIDA. Nune’e, vitima nee husu atu muda hanoin ida nee, tanba sira ne’ebe kona HIV/SIDA nee mos ema normal hanesan ema hotu. Buka atu respeita malu no simu malu. Tanba respeita ema ne’ebe kona HIV, la certamente hada’et kedas moras nee ba ema seluk. Redasaun hatun intervista kompletu hanesan tuir mai nee;

LF: Ita bele konta istoria uitoan antes hetan virus HIV nee?

Vitima: Hau iha tinan 1997 depois de remata SMA iha Timor hau langsung (liu kedas) baeskola iha Indonesia.Ihane’eba, hau moris hanesan mahasiswa bain-bain ba kampus, hala’o atividades eskola nian hanesan mahasiswa sira seluk.Depois de ida nee, hau mos hala’o atividades hanesan mos joven sira seluk. Hau ransu ho kolega bapa oan sira ba diskoteka, bele dehan hau ransu livre. Hau mos servisu iha bar idaiha Malang-Indonesia. Hau kalan-kalan sempre ba servisu, iha tempulivre, hau sempre ba dugemho kolega sira iha bar ou diskoteka. Momentu ne’eba hau ba ho minor idade hela. Hau aprende buat barak iha ne’eba. Hau sempre gabung ho maluk husi Ambon no Jawa balun. Iha ami neen (6) mak kolega diak ou akrab liu. Iha hau nia familia ami maun-alin nain 6, maibe maun mate tiha, entaun hela mai nain 5, feto 3 no mane 2.

LF: Bele haktuir liu tan atividades saida deit mak hala’o bainhira ba dugem ou ba diskoteka?

Vitima: Ami sempre hemu tua, tanba alkohol baami hanesan buat ne’ebe bai-bain tiha ona, hanesan mos bee hemu. Kuandu ema hemu tua manas, bai-bain tenke soran ho minuman ringan, maibe ami hemu deit nein kahur buat ida.

LF: Alende alkohol ita boot mete aimoruk droga ruma ka lae?

Vitima: Obrigada.Loos tebes iha momentu ne’eba, iha ami nia grupu nee iha ami lubuk ida mak sempre hamutuk no sempre uza droga.Laiha loron ida mak ami la uza, maske hau hala’o nafatin atividade nu’udar estudante universitariu. Hau nia kolega ransu sira nee ami hotu hanesan deit, hemu tua dor nomos uza droga. 

LF: Karik sei hanoin hetan tipu droga saida mak ita boot sira uza?

Vitima: Hau uza droga hanesan sabu-sabu, tipu idahoron, sona nomos iha pil. Bainhira uza ona droga sira nee, ami nia neon hanesan tiha semo. Ba hau, droga nee buat diak ida iha tempu ne’eba. Droga oi-oin hau uza, importante bele halo hau nia neon semo (fly).

LF: Nu’udar estudante universitariu ida, tanba sa mak ita boot labele domina-an no fasil tebes monu ba droga?

Vitima: Hau hakarak esplika uitoan katak kuando joven ida mak moris sees-an ona husi kontrolu no domin familia nian, entaun nia kuandu ladun kuidadu-an, nia mos sei moris livre.Tanba laiha ema mak atu kontrola tan nia. Sa-tan hau moris iha nasaun ne’ebe dook husi familia, ne’ebe mak laiha ema ida mak kontrola hau, entaun hau ransu no fasil tebes tama ba area nakar sira hanesan nee.

LF:Ita boot mos mete iha relasaun seksual livre ka lae?

Vitima: Hau ransu ho kolega sira ne’ebe idade boot liu hau. Tempu ne’eba hau sei nataton hela, entaun relasaun seksual nee ladun importante ida, hau gosta liu mak droga. Maske hau mos halo relasaun seksuallivre maibe ladun hanesan hau uza droga nee. Hau hala’o moris nee iha risku tebes, maibe hau laiha konsiensia ba buat hirak nee. Hau hala’o deit, importante mak hau kontente.

LF:Atividades sira hanesan nee la prejudika eskola ka? Por ezemplu notas (nilai) monu?

Vitima: Notas bai-bain deit.

LF: Iha sa-tinan makita boot foinkonsiente ho hahalok sira nee, no depois oinsa mak ita boot hatene katak hetan moras HIV? Konta tuir took nia lala’ok nee oinsa?

Vitima: Hakarak konta istoriauitoan.Tuir loloos hau gosta lee.Hau ho kolega sira koko atu bele asesu internet.Hau loke situs-situs sira ne’ebe koalia kona-ba moaras ou virus sira nee, entaun hau tertarik lee.Iha artigu ida mak koalia kona-ba HIV/SIDA.Iha ne’eba, hau lee kona-ba bahaya virus nee iha Kompas nomos Jawa Post.Entaun iha tinan 1999, hau fila mai Timor no tuir tiha votasaun ba referendum, depois iha fulan Julho tinan 2000 hau fila fali ba.Hau ho kolega ou ami nia grupu ba halo test virus HIV/CIDA. Momentu ne’eba ami hanesan hura-hura deit ou naran ba koko deit.

Kuandu ba test, ami la interese atu rona counselinghanesan sira seluk ne’ebe ba tuir. Tempu ne’eba, ema barak mak antri hodi rona konsellu husi petugas,mas ami lakohi,ami hakarak langsung ba test deit. Sira konsege dehan tenke liu husi counseling depois mak ba test para rona rezutadu karik labele hakfodak. Maibe ami nia grupu hakarak direitamente halo test.

Wainhira hakat ba doutor ne’ebe mak test ran neelangsung husu katak tanba saida mak ami ba grupu hodi test nee, atu uza hodi eskola ou servisu? Ami hatan katak hakarak test deit hodi hatene kona moras nee k alae. Tanba doutor hare hau tau bringkus iha ibun no matan rebo-rebo, entaun nia husuhau husi ne’ebe. Hau dehan deit husi Ambon, tanba hau durante iha Indonesia nee ema hotu hatene hau ema Ambon laos ema Timor. Rona tiha dehan hau husi Ambon, doutor nee dehan imi lakohi liu husi counseling entaun ami hasai ran hetan moras ruma nee konsekuensiatanggung sendiri, tanba liu husi counselingmak o bele simu konsekuensia saida deit.Hau baruk hein kleur tanba hau nunka gosta hein kleur, entaun hau dehan ba doutor nee katak Okey, ambil darah sudah!Depois doutor nee mos hasai ona ran kompletu no hodi husu pergunta yakin kamu tidak kena virus itu?Hau dehan yakin tidak kena.

LF: Ita boot sira ba test iha ne’ebe no iha sa-tinan?

Vitima: Ami ba test iha Rumah Sakit  Saiful Anwar iha fulan Novembru 2000.

LF: Depois hasai ran nee loron hira mak ita boot sira rona rezultadu?

Vitima: Test hanesan ohin, aban ami rona ona rezultadu. Doutor mak fo hatene liu husi telefone, maibe momentu ne’eba HP seidauk iha, entaun ami fo deit numeru telefone kost nian ba doutor. Loron ida ami ba foti rezultadu test nee, hau ba la hasoru kolega sira ne’ebe ami test hamutuk. Dalaruma test nee ami ba hamutuk, maibe simu rezultadu doutor sira telefone ema ida-idak mak mesak ba ho oras ne’ebe la hanesan. Ida nee segredu. Wainhira hau tama ba laran, hau hasoru doutor nee, no nia fo envelope koor mutin ida mai hau hodi dehan “ini untuk kamu orang Ambon, pantas kamu kena,” hau bingung no seidauk loke envelope nee.Doutor husu fali “kamu bisa buka amplop ini atu tidak?” Hau sentesemakin penasaran.Fou-foun ba hasai ran nee hau brani, maibe atu simu rezutadu ou lees envelope neehau la brani tebes.Iha momentu nee, perasaan dug-dag tebes no iha laran neemosu pergunta, “seandainyamoras nee kona oinsa?” Ho hakruk nia konta,hau la brani loke envelope nee no fo fali ba doutor atu loke hela. Nia loke no hatudu mai hau no hau hare tanba uza liafuan mediku, entaun hau la hatene sentidu husi buat ne’ebe hau hare, pozitivu no negativu neesa loos, hau la hatene. Iha liafuan ida hakerek reaktif. Tanba hau la kumpriende, doutor esplika mai hau katak reaktif nee signifika hau pozitivu kona virus HIV. Rona ida nee hau hanesan tiha disambar petir no lakon konsiensia. Hau sente plafon nee atu monu tun rabat rai deit ona. Hau komesa sente katak buat ne’ebe hau tauk mosu duni mai no kona duni hau. Hau hanoin deit, oinsa hau nia inan-aman sira rona, familia no kolega sira rona. Kampus rona tan oinsa loos, enkuantu hau foin mak semester haat. Sira hasai tiha hau husi eskola, hau nia familia sira rona, la hatene saida mak atu akontese ho hau nia destinu. Hau tuur nonok deit iha doutor nia fatin kuaze oras ida resin. Doutor fo korajen, halo hau nervozu liu tan no lakohi rona saida mak doutor koalia. Depois hau foti rezultadu teste nee, hau hatama ba hau nia pasta, nia fotokopi nee hau foti lees kedas iha dotor nia oin hodi tau ba lixu fatin, hakat sai ba fali hau nia kost.

LF: To’o tiha kost, tuir mai saida mak akontese?

Vitima:Depresiboot. Tanba hau nia hobby nani, entaun hau hakat ba pisinaidaiha Malang ne’eba. Hau tenta atu oho-an  dalahira kedas iha pisina fatin nee, hau haksoit nee nunka hakarak ba bee laran hanesan bai-bain, maibe buka mak pozisaun sira ne’ebe mak iha risku nee mak hau haksoit ba, maibe buat ida la akontese bahau.Dalaruma tempu ne’eba seidauk to’o para hau mate. Hau mos komesa hemu tua ho kolega sira iha kost nomos fila fali ba bar. Hemu to’o lanu kleuk didiak, hau hemu read level ne’ebe mak ema hemu tenke kahur, maibe hau hemu tanan deit. Iha oras balun nia laran, hau lanu la sadar ou la hanoin sa mak akontese mai hau, maibe bainhira hau sadar, buat ida sempre mosu fali iha hau nia neon.

LF: Saida deit mak iha ita nia hanoin tempu ne’eba? Ita boot arrepende ho buat ne’ebe akontese?

Vitima: Hau hanoin mak “tenke mate.”Liafuan nee mosu hela deit, no komesa husi nee hau nia hahalok komesa iha mudansa. Hau la gosta kolega sira iha kost no iha kampus moshau lakohi ransu no hau gosta tuur mesak mesmu antes nee hau ema ne’ebe gosta ransu.Hau nia atetude mudamaka’as.Hau ida ema sempre hamnasa hasoru saida deit – derepenti hau sai fali ema nebe mak sensitivu tebes. Ema koalia liafuan balun hau la gosta nee hau hirus kedas. Hau depresi maka’as to’o fulan rua ho balun hanesan nee, hau koko para oho-an maibe failha hela deit.Depois de ida nee, doutor mos komesa telefone hodi fo hatene katak o labele hanoin barak lai,ou yakin ho test nee.O bele mai test fali hafoin fulan 3. Rona liafuan nee hau nervozu liu tan, não medigasfo tiha rezultadu mai, agora dehan fali tenke ba test foun. Entaun bainhira doutor telefone mai, hau sempre bosok.

LF: Ho ita boot nia kondisaun ida ita lakohi ba test nee, ita hala’o moris oinsa?

Vitima: Hau ba kampus hanesan bain-bain no to’o iha loron ida, hau hasoru malu ho hau nia kolega Balinese ida ne’ebe mak ami sempre ransu antes hau hatene rezultadu nee.Nia mos ba test hotu iha momentu hau test nee. Hau hare nia primeiru  hau hare hau la gosta, mas nia hakbesik an mai ami tuur hamutuk no nia komesa tenta hodi husu mai hau, tanba sa mak hau iha mudansa maka’as. Hau hakruk la koalia, tanba hau tidak mungkin atu esplika ba nia katak hau kona virus aat nee.Mas hau nia kolega nee koalia nafatin nofo korajen mai hau, entaun hau la tahan hau dehan ba nia katak o foti hela envelope iha pasta laran nee ba hare no lee ba. Nia lee hotu nia hamnasa tiha no nia dehan “gara-gara tiga huruf HIV,o nia sikap berubah total hanesan nee ka?Depois oinsa ho o nia masa depan?O tenke hatene katak HIV nee bukan akhir dari segalanya.Seandainya o bele bangkit, hau sei dukung o”. Nonok tiha minute balun, hau komesa koalia ba nia katak “o ema ne’ebe la hetan HIV, sementara hau ema ne’ebe pozitivu HIV. Hau mak sente moras, laos o.” Rona tiha ida nee, nia mos komesa tau liman ba nia pasta hodi hasai ninia envelope hatudu mai hau.  Afinal nia mos kona hotu virus nee.  Hau lee hotu tiha nia rezultadu, kolega nee dehan mai hau katak “lihat aku biasa-biasa saja, nah sekarang yang harus ita lakukan harus ikutin perintah dokter.”Maibe hau lakohi rona tanba hau hare doutor deit mos hau la gosta.

LF: Hatene tiha kolega neenia rezutadu, itaboot sente oinsa?

Vitima: Hau hatene tiha nia rezultadu, hau komesa laran kaman uitoan tanba afinal la’os hau mesak. Ami nain rua komesa kalan-kalan sai no sees-an husi kolega nain haat sira seluk. Ami rua sempre ba asesu internet  hodi buka informasaun kona-ba HIV nee rasik. Hare mudansa ami rua nian nee, kolega haat nee mos komesa husu tuir ona, entaun ami rua mos komesa gabung fali ho sira para sira labele hatene. Ami ba nafatin bar sira nee mas ami rua nafatin ba asesu internet buka infomasaunkona-ba HIV nee rasik no ami rua konsege hatene aimoruk nee, maibe iha momentu nee atu asesu ba aimoruk nee araska tebes. Nune’e ami la konsumu aimoruk.

LF: La konsumu aimoruk oinsa ho ita nia saude rasik iha momentu ne’eba?

Vitiama: Durante fulan 4 iha tranzisaun nia laran, hau nia kondisaun diak fila fali mesmu la diak liu hanesan uluk. Hau fila fali ba kampus no ransu diak ho kolega sira no koko ho ba tama iha LSM sira ne’ebe servisu ba HIV. Wainhira ami ba gabung no halimar bola ou olahraga, hau komesa ba foti brosura HIV nian no foti kondom mai kost. Wainhra hau foti lori mai nee, hau taka  iha hau nia odamatan. Kolega sira hare sira bingung tanba ema ne’ebe mak antes nee nakar tebes, bele peduli fali kona-ba saude nian no tau fali kondom iha oda atan ne, la nyambung liu.Mas hau la peduli ho sira nia penilaian,hau tau nafatin.

LF: Tanba sa mak ita hakarak tau kondom ou tempel fali kondom iha odamatan nee?

Vitima: Hau mak hakarak tempel deit. Hau mos tanba gabung ona iha LSM no hatene barak iha internet kona-ba virus nee, entaun hau hakarak atu esplika katak importante tebes uza kondom ba kolega sira.

LF: Tuir fali mai oinsa, doutor ne’ebe durante nee tau matan ita boot kontaktu malu nafatin ka lae?

Vitima: Tanba liu tiha fulan 3 to’ofulan neen ona, hau la ba Rumah Sakit, entaun doutor tenta hela deit kontaktu hau atu haruka hau ba test tan fali, maibe hau lakohi ba. Nia telefone mai hau, entaun hau bosok tiha dehan hau nia kolega ida doutor buka nee ba  tihaAmbon ona. Rona hanesan nee mos doutor nee telefone buka nafatin. Mas hau la interese tanba hau mos fit fali ona no komesa ba kampus.Hau mos ba gabung ho kolega Timor-oan sira, ba diskoteka ou bar sira nee hodi halo laran malirin, tanba hau lakohi hanoin kona-ba virus nee. Hau lakohi mes-mesak tanba  hau gosta hura-hura.Hau hanesan nee bebeikto’ohaluha tiha HIV. Hau haluhadouter nia reseita katak hau labele hemu alkohol no labele mete to’o dader. Hau mos servisu tan iha bar neehakarak ka lakohi tenke mete to’o dader duni no loron-loron hetan hela alkohol, hau tenke hemu nomos fuma sigaru maka’as.

LF: Saida mak akontese tuir mai, liu-liu itaboot nia saude rasik?

Vitima: To’o iha inisiu 2006, hau tetu hau nia kilo 80 kg, mais to’o iha fulan Maiu 2006 hau sente buat ruma lakon husi hau nia isin. Vontade han laiha, depois kalan toba ema sentierai malirin maibe hau sentie manas no kosar, nar-naran isin kolen hela deit. Hau isin manas kleur, hemu aimoruk isin manas nian mos la tuun no hemu vitamina mos isin kolen nunka diak.  Hau haluha total kona-ba status hau nian ne’ebe mak kona virus HIV iha tinan lima liu ba, hau haluha rai loos.Ho kondisun hanesan nee, hau muda ba uma ibu angkat ninian no hela iha ne’eba tanba hau lakohi interrompe kolega sira. Hakfodak deit iha semana tolu nia laran, hau nia kilo tun husi 80kg ba 30kg. Momentu ne’eba hau so hanoin deit mak hakarak mate. Moras bebeik nee diak liu mak mate. Hau lakon tiha konsiensia, no derepente hau iha tiha ona hospital. Vizinhu sira mak lori hela hau ba Rumah Sakit Panti Nirmala. Nee hospital privadu ida iha Malang. Fatin furak tebes. Doutor halo test fali bah au nia moras, tanba hau dehan kabun moras, ema fo aimoruk la diak nafatin.

LF: Ita hatene tuir hela kabainhira doutor sira hala’o teste nee?

Vitima: Hau la dun hatene tuir an. Sira koalia maibe la kleur hau haluhan ona, depois hau sai haluha total, hau nia kakutak kiik nee ladun joga ona. Hau hanesan tiha ema amnesia alias haluha buat hotu, no hau rasik mos la hatene hau nee se. Doutor sira koalia hau rona mais hau pikun aat loos. Iha hospital nee, hau nia moras HIV nee kolega sira rona hotu, no sira komesa tauk. Nune’e ida-idak ba halo teste ba an rasik maibe laiha ida mak hetan virus nee. Tuir mai tanba laiha mudansa ba hau nia saude, sira lori fali hau ba Rumah Sakit Saiful Anwar, hospital estadu nian, hau hela iha ne’eba semana ida. Hau nia denyut nadi nee labele detekta, so bele kaer no detekta husi fuan. Doutor ne’ebe trata hau nee ema diak tebes. Nia dehan ba nia kolega sira katak diak liu haruka pasiente nee fila ba Timor ona tanba nia la’os ema Indonesia maibe ema Timor tuir informasun ne’ebe hau rona.Iha tempu ne’ebe hau laiha forsanee sira haruka hau fila.Kolega Timor-oan sira lakohi hau atu mate, entaun sira halo esforsu maka’as atu hau bele fila lalais mai Timor.Tiket sira nee sira mak urus hotu. Hau konsege husi Surabaya mai Kupang no hau nia ibu angkat mos akompanha hau.

LF: Wainhira ita sadar uitoan doutorharuka mai Timor nee ita nia hanoin oinsa?

Vitima: Hau rona atu mai Timor nee maske hanoin hetan maibe liu tiha minutu ida rua hau haluhan ona sa mak doutor dehan. Kuandu sadar mak rona ema tama sai koalia kasihan — kasihan.Hau rona sira dehan mai Timor nee hau komesa iha esperansa katak hau sei la mate, maske kondisaun hau nian atu moris nee bele dehan deit 10 ou 5 porsentu.  Derepente hader no koko uza kadeira roda ba haris fatin, kolega sira hare hakfodak tanba ema moras grave id abele hader lao, karik ida nee sinal ema atu mate ona. Maibe hau hakbesik ba vidru nee hau dehan ba ibu angkat katak hau sei la mate, tanba atu mate karik husi loron primeiru kedas. Sira hare no tanis deit ona tanba aban hanesan nee ami aranka mai Kupang ona.

 LF: Ba sa’e aviaun nee ita boot uza nafatinkadeira roda ka oinsa?

Vitima: Ambulancia lori hau ho ibu angkat ba bandara, to’o iha ne’eba hau pingsang tan fli no hanoin mos lakon total. Depois ami ho aviaun tun, hau uza nafatin kadeira roda. Iha Kupang aluga fali mikrolet ida para tula fali ami mai Atambua.Subrinha ida madre ida Kupang mak trata. To’o iha Atambua nee hau isin manas tebes no hau mear ba mear to’o monu,la hatene tuir oan no lakleur sadar fali.Subrinhu sira fo nuu ben kahur ho susuben atu fo maibe tanba doutor bandu entaun la konsege fo hau hemu. Dader ami komesa mai ona Mota-Ain atu fila mai Timor. Atu tama Timori mos liu prosesu lubuk ida, tanba hau ba Indonesia nee hau nia pasaporte hau doku tiha, hau la extende entaun imigrasi lakohi fo hau tama mai Timor. Ami diskuti malu maka’as, maibe tanba sira hare hau nia kondisaun grave, sira mos husik hau liu duni mai Timor no lori liu kedas hau ba Hospital Nasional Guido Valadares.

LF: Fila mai Timor, oinsa reasaun ita nia familia liu-liu inan aman?

Vitima: Iha dader hau hau iha ruang isolasi nee, kala hau nia mama ba ho kolega sira seluk, mas hau la konhese sira, tanba hau nia kakutak kiik nee la funsiona diak, entaun sira mai moshau la hatene no hau koalia bahasa deit no husu deit fali mak ibu angkat nee. Momentu sira ba hare hau nee sira mos prepara hadia ona uma tanba ho hanoin ida katak hau la moris ona.Dadersan tuku 5 deit hau hare senhora ida tuur hela iha hau nia sorin, hau la hatene nia nee se, no nia koalia mai hau moshau la hatene. Hau nia denyut nadi lakon mosu bainhira tau soru, halo sira hotu paniku inklui enfermeira sira.Liu tiha minutu balun, hau nia ain sira mamar hotu. Hau nia mama lolo liman buti kedas hau nia ain. Foin lamas deit, hau sente hanesan iha forsa ida mak tama mai hau nia isin lolon tomak, halo hau kosar sai maka’as no hanoin mos mosu hikas fali. Durante fulan ida iha ne’eba, seidak iha rezultadu diak. Hau mos hetan TBC kroniku, no hau hemu deit aimoruk TBC nian. Aimoruk ba virus HIV ho naran Lamivudine Tenofovir Efavirenz (ARV) nee seidauk iha. Jornalista sira komesa tama sai salaun nee hodi husu tuir, maibe enfermeira sira la fo hatene. Hau nia memoria tun-sa’e nafatin. Iha duni mudansa uitoan, so que ladun komfortavel tanba refujiadus mos hela barak iha hospital tanba krizi. To’o iha dia 13 Agostu 2006, hau alta no mai hela iha Ailok Laran hodi kontinua halo tratamentu kontinua iha Klinika Bairro-pite. Yang jelas hau nia mama hanesan ema nebe menyelamatkan hau nia moris iha momentu neba. Nia heroi ida nebe menyelamatkan hau no motiva hau atu bele bangkit ho situasaun nebe situasaun.

LF: Tratamentu iha Klinika Bairro-pite nee oinsa?

Vitima: Hau hasoru doutor Daniel, nia haruka hau test fila fali ran.Rezultadu iha loron tuir mai hau  nafatinpozitivu HIV no doutor komesa passa aimoruk ARV bahau hemu.Graça a Deus, hau bele hemu ona aimoruk nee no hau baixa iha klinika nee.Kalan-kalan hau tenke hemu aimoruk nee ho aimoruk TBC nian nee, tanba doutor dehan keta halo ba la’os o mate tanba virus HIV nee maibe o mate tanba TBC kronika nee.Hau hemu aimoruk semana ida deit, hau sente iha mudansa. Antes nee hau nia ibun laran sira nee mos kanek hotu alias sariawan akut mas doutor neefo aimoruk ida ho naran Flucanazol loron rua to’o tolu deit hau bele han ona etu. Hau lao mos komesa ho distansia ne’ebe mak dook uitoan. Depois  rujuk fali ba iha Tibar, Irman Lourdes nia fatin, hau hela deit iha neba. Hau nia mama lalin hotu hau nia album  foto sira nee ba hotu Tibar. Mamahanoin katak album foto sira nee hanesan semangat hidup hau nian. Maibe momentu ne’eba hau nia konsiensia sei tun-sa’e entaun mama hatudu foto sira nee mai dalaruma hau hatene dalaruma hau lahatene.Iha ne’ebaami hala’o atividades barak hanesan rega aifunan no seluk tan. Maske nune’e,madre sira haruka hau atu toba mak barak.To’o fulan September 2006, hau nia isin mos komesa sa’e ba bobot 45 kg, hena sira balun hau bele hatais ona.

LF:  Ho bobot sa’e nee, ita nia hanoin ou memora normal fali ona ka sidauk nafatin?

Vitima:  Iha dia 20 de Setembro 2006 nee ami passa hau nia aniversariu iha fatin ne’eba.Ami mos nonton sinetron ida iha SCTV.Hau tuur seriuso los tanba hare ba filme nee iha adegan kecelakaan. Husi nee hau komesa hanoin ona  ba loron ulang tahun no hanoin kois-kois konaba mama lori foto album sira nee. Hau hanoin to’oulang tahun uluk ho kolega sira. Hare adegan tabrakan mautnee hau hanesan hakfodak no kosar metan sulin derepente. Hau isin manas sa’e kedas to’o oin sira mean no uat sira hamrik hotu. Madre sira fo aimoruk kose deit ba isin lolon to’o diak. Hau hader mai, sente hau nia memoria nee fresku loos. Iha fulan Outubro, hau komesa rekopera ona, hau bele fase ropa mesak ona no atividades seluk. Mais rasa boring ou suntuk tanba sulan hela deit iha ne’eba, entaun hau husu fila mai uma iha Ailok Laran iha fulan 23 Outubro 2006 hodi halo fali rawat jalan iha klinika Bairro-pite. Hau seidauk nakloke-an ba liur tanba hau la hatene ema hira mak hetan moras hanesan ona ho hau. Hau nia mama foti nafatin foto hodi enkoraja hau, labele patah semangat.Mama dehan, “mate ne bele mate tuir Maromak nia determinasaun maibe labele nain mak husu mate. Ne’eduni doutor haruka hemu aimoruk entaun tenke hemu, haruka toba tenke toba no nakloke ba liur.” Komesa husi nee hau mos komesa iha daya tarik bahau nia foto sira nee. Mosu ona hanoin ona katak hau tenke bokur, bokur no bokur. Harapan hidup nee komesa iha no hau antusias atu bele hamrik no hakat sai. Hau komesa ba ona iha organizasaun idaho naran CWS iha Vilaverdene’ebe iha tempo ne’eba Pendeta Daniel mak lidera.Hau nonok husu deit iha hau nia laran, karik sei iha ema ruma kona moras hanesan hau? Hau haarak hatene karik hau mesak mak sente an alieanaduhusi maluk seluk. Hau mos ba tuir ona close meeting, ne’ebe hanesan anin foun bahau tanba ami hasoru malu, maskesei moe-moe hela tanba la konhece diak malu antes nee. Iha nee mak hau foin hatene, ami iha ema nain 6 mak moras kona iha tinan 2006.

LF: Iha sorumutuk nee, konsege sharing informasaun ruma kona-ba virus nee?

Vitima: Ami momentu nee hasoru malu mos ho madre sira, entaun ami sharing informasi kona-ba aimoruk.Ami nia grupu nee kiik los tanba nain nee, entaun madre sira halo atividade sempre involve ami no Graça a Deus, Dr. Daniel mos faselita internet gratuita mai hau.Nune’e kuando hakarak hatene informasaun ruma, ba asesu internet iha klinikaBairro-pite deit. Hau sempre buka informasaun kona-ba aimoruk ARV nee, hare nia efek samping nomos hare kona-ba aimoruk nee nusa tenke kombinasi ho aimoruk seluk.Hau komesa fit fali ona no hau mos ba involve voluntaria iha CWS hodi sai treinador, tanba sira bekali hau iha 2007 liu husi treinamentu fulan 6 kona-ba virus nee.

LF: Iha LSM nee ita la sente-an ka kuandu ema balun coinsidentalmente koalia kona-ba vitima HIV nee?

Vitima: Waoooo…nee hau hasoru.Iha ema balun koalia aat loos vitiman HIV no sira hakarak loos atu hatene ema nee nia modelu oinsa.Ida nee ofende loos, hau iha oin hela no sente hanesan atu hamrik buti sal-sala deit sira ona, maibe hau tenke tahan emosi tanba anjuran husi doutor. Entaun hau cuek no kaer prinsipiu katak hau kona HIV nee la hamosu problema ruma ba ema seluk. Hau hanoin pozitivu deit. Virus nee laos buat ida ne’ebe hakerek ka prega hela iha hau nia isin lolon, ne’ebe ema hotu bele hare loron-kalan. Hau bele moris hanesan ema sel-seluk. Sira gosta kaitkan HIV ho moral neehalo hau laran moras. Sira nia hanoin neeHIV mosu tanba ema fa’an an, maske bele mos kona liu husi buat seluk. Ami harii grupu kiik ida. Pendeta Daniel hamutuk ho madre sira ba hasoru Ministru Saude tempu ne’eba Dr. Rui Araujo hodi hasai ami nia grupu naran Esperansa. Komesa husi nee, hau hakarak sai inspirador bae ma seluk. Hau semangatfali ona no iha 2008 hau fila fali ba Jawa hodi remata hau nia estudu. Hau ninia mehi mak remata hau nia estudu, hau hanoin deit atu mate ona ka seidauk mate mos hau tenke hetan graduasaun. Hau ba Jawa ho bekal aimoruk tinan ida nian. Hau ba iha ne’eba, hau kontrak uma no ba hasoru hau nia doutor ne’ebe mak halo tratamentu ikus liu bahau no haruka hau mai Timor nee. Hau ba hasoru duni nia no nia la konhece hau. Nia hakfodak tebes bainhira hatene katak hau sei moris. Nune’e Doutor nee dehan hau bele uza faselidade hospital nian gratuita, entaun hau check up halo tes tan virus nee gratuita. Graduasaun tiha mak hau fila fali mai Timor hodi involve an nafatin iha grupu ne’ebe uluk hau hola parte molok ba kontinua fali estudu.Hau gosta fahe info kona-ba vitima HIV no hau sempre lori materai ba maluk sira ne’ebe hakarak rona. Hau gosta loke kona-ba hau nia status, tanba ho nune’e ema labele koalia aat bebeik HIV.

LF:  Iha familia ruma koalia aat kona ba ema ne’ebe kona HIV alende ema seluk?

Vitima: Hau nia familia rasik nunka atu hateten ou menyinggung hau, sira simu apa adanya no fo apoiu ba hau desde uluk ate agora, tanba hau nia mama sempre hanorin ami atu hadomi malu. Hau nia papa mate ona ne’ebe hela deit mama mak hare ami. Ami ne’ebe moris ho virus ida neesebenarnya hanesan ho ema normal. Hau uluk iha fen ema Jawa no oan ne’ebe agora SMP ona, mas sira la terjangkit virus nee. Hau lor-loron sempre hakerek kona-ba hau nia atividades sa deit iha hau nia livru diariu.Desde tinan 2000 ate agora, troka ona aimoruk dala haat no hemu aimoruk rutin lor-loron to’o agora. Kalan-kalan hau tenke hemu aimoruk antes toba.

LF: Itaboot halo ona buat barak ba maluk seluk, itabele fo mensagen ba maluk sira iha liur ne’eba liu-liu ba ita nia joven sira?

Vitima: Hau hakarak hato’o ba alin ou maluk sira, hare imi tenke proteje imi nia an didiak. Karik imi to’o ona tempu atu namora entaun namora mas tenke hatene katak namora nee para atu kompleta malu, la’os atu halo buat ne’ebe merugikan familia. Futuru iha imi nia liman rasik. Imi balun hatene maluk balun kona virus nee tenke respeita malu, labele koalia aat sira tanba sira mos ema hanesan ho imi hotu. Alende nee hau mos hakarak hato mensagen ba maluk nebe mak kona ona virus HIV nee katak imi tenki  tuir saida mak doutor haruka. Imi atu moris iha kondisaun saude nebe diak imi tenki hemu aimoruk nebe mak doutor fo hanesan ARV no aimoruk seluk nebe mak doutor fo tanba virus ida nee laiha aimoruk seluk hanesan ita balun dehan aimoruk cina ou aimoruk timor, ita nia aimoruk mak ida doutor sira fo. Ita sei diak kuando ita kumpri sa mak doutor rekomenda.* [Beldemira de Araujo | Chefe Redasaun Jornal Mensal Lian Foinsa’e | SE da Juventude e do Desporto].


Note: Entrevista eskluzivu ida ne’e upload iha TAFARA.TL ho autorizasaun hosi Autor rasik, Beldemira de Araujo, Chefe Redasaun Jornal Mensal Lian Foinsa’e, SE da Juventude e do Desporto.

About Beldemira de Araujo

Beldemira de Araujo, Chefe Redasaun Jornal Mensal Lian Foinsa'e, nebe responsabiliza hosi Direccao Nacional de Informacao, Comunicacao e Tecnologia, propriedade Secretaria de Estado da Juventude e do Desporto.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *