Friday , August 17 2018
Home / Sosial & Politika / Eskola Basico 3 Ciclo Fatumeta, Presiza Apoiu Infrastrutura Hosi Governu
Kondisaun Eskola Basico 3 ciclo Fatumeta Dili. [Foto: Virginia Pereira | 06.02.2018].

Eskola Basico 3 Ciclo Fatumeta, Presiza Apoiu Infrastrutura Hosi Governu

“Ami la iha kbiit hadia eskola ne’e, iha sala andar iha kotuk nia kondisaun mos la dun diak. Bainhira hau hahu servisu iha ne’e, odamatan sira ne’e at hotu ona, casa de banho mos at hotu”. Diretora Fernanda.

Edukasaun mak fator fundamental hodi prepara ema sai lideransa, edukasaun mak dalan ida hodi lori nasaun ne’e dezenvolve diak liutan, bainhira edukasaun la laiha, futuru nasaun mos sei nakukun.

Hare ba situasuan Eskola Basico 3 ciclo Fatumeta Dili, jornalista TAFARA.TL hakat besik ba eskola ne’e, hodi hare besik situasaun eskola ne’ebe la dun diak, ba estudante sira hodi tuir prosesu aprendijazen.

Fatin eskola ne’ebe komesa tuan, parede sira komesa foer, tanba tinta parede ne’ebe mak komesa foer, janela eskolah ne’ebe taka ho kaleng, banku no meza ne’ebe komesa at, plafon ne’ebe komesa dodok, bainhira udan tun, estudante sira sei la hakmaetek, halo estudante sira la sente avontade, bainhira partisipa iha prosesu aprendizajen. Ai hun ne’ebe mak laiha, ho rai manas, fiar no sente katak prosesu aprendizajen sei la lao masimu.

TAFARA.TL konsege dada lia ho Diretora Eskola Basico 3 ciclo Fatuema, Fernandea Kaldeira Belo, hodi husu tuir kondisaun eskola ne’ebe karik ne’ebe dun diak ba estudante no profesores sira, hodi halo atividade lor-loron. Fernanda konfesa katak kondisaun eskola la diak duni, iha laboratorium maibe eskola laiha kbiit hodi hadia.

“Ami la iha kbiit hadia eskola ne’e, iha sala andar iha kotuk nia kondisaun mos la dun diak. Bainhira hau hahu servisu iha ne’e, odamatan sira ne’e at hotu ona, casa de banho mos at hotu”, hateten Fernanda.

Fernanda informa katak eskola ne’e konsege halo sala da reuniau ida ba inan aman sira, osan ne’e kontribuisaun hosi inan aman sira ne’ebe halao iha 2014. Tinan ida kada ema ho kontribuisaun $2.50, hodi fo apoiu ba eskola ne’e, hodi harii sala reuniaun, “kontribuisaun nian deit ne’e la too, maibe ho ami nian programa sansaun ne’ebe ami aplika ba estudante sira, sei fo selu ba eskola $2.50 hodi bele tau hamutuk osan, ba hadia buat balun iha eskola ne’e”.

Ba Fernanda kontribuisaun ne’ebe inan aman no estudante sira halo ne’e laos dalan uniku hodi resolve problema ne’ebe eskola ne’e infrenta, maibe estadu tenke tau matan hodi hare infrastrututra ne’ebe mak sai nudar dever estadu nian.

“Dala hira ona, governu mai to iha ne’e, maibe la konsege halo no sedauk iha inisiativa hosi governu hodi hare asumtu ida ne’e”, hateten Fernanda.

Eskola refere uza sistema turma rua, alunu sira ho idade walu ho sia, eskola dader, idade hotu eskola iha lokraik. Turma hamutuk 24 maibe iha dader 16 turma mak funsiona, no turma walu iha lokraik.

Ba TAFARA.TL Fernanda konfesa katak, hanesan humanu sente triste bainhira hare kondisaun ida ne’e. Halo ona esforsu barak, hatama proposta maibe buat sira to agora la hetan resposta hosi parte governu.

Laos hatama proposta ba governu deit, maibe Fernando ho ekipa buka dalan seluk hodi husu tulun ba organizasaun sosiadade sivil, atu nune’e bele tulun oituan, hodi nune’e alunus sira bele tuir prosesu aprendizajen ho susesu no diak ba sira nia futuru.

Laos problema infrastrutura deit maibe konaba merendar escolar mos sai kestaun ne’ebe mak eskola refere hasoru. Fernanda informa katak dala ruma osan ba merendar escolar sai tarde, ida ne’e impede prosesu merendar ne’ebe la tuir ona nia orariu

TAFARA.TL dadalia ho alunu Nelia Kaixola [14], ho inosente, Nelia hateten sente triste tanba kondisaun eskola ne’e at.

“Ami estuda ladun diak tamba falta material barak hanesan kuadru, meja kadeira, kalen odamatan janela at hotu. Bainhira udan mai sempre nakonu, halo rai dodok no hare buradu los, ami nia haris fatin mos aat, ita uza mos senti la dun diak”, tenik Nelia

Estudante Juvencio Amarino Santos Ximenes [13], ba TAFARA.TL hato sentimentu katak sente triste no laran susar, tanba kondisaun eskolah ne’ebe la serve atu halo estudu.

“Ami nia alin balu eskola tan iha salaun laran,kadeira mos sei falta mai ami, ami estudante nudar future nasaun. Ami husu ba estadu atu tau matan mai ami nia eskola, hodi nune ami bele ho vontade eskola iha fatin ida ne’e”, hateten Juvencio ho esperansa boot.

Sai ona slogan fundamental katak labarik mak future nasuan nian, future sei nabilan, bainhira kualidade edukasaun fiziku no kurikulum lao hanesan. Timor-Leste sei sai furak iha future, bainhira produs labarik sira sai intelektual.

 

 

 

 

About Virginia Pereira

Check Also

SEKOMS Halao Enkontru Ho HAK, Hodi Rona Avaliasaun Area Komunikasaun Sosial

“Komunikasaun entre instituisaun governante sira ba nia povu la dun lao diak, entaun povu rasik …

Leave a Reply

Your email address will not be published. Required fields are marked *