Tuesday , May 21 2019
Home / Eleisaun Parlamentar / Esperansa Povu Nian ba Partidu Politiku Ba ELPAR 2017

Esperansa Povu Nian ba Partidu Politiku Ba ELPAR 2017

Povu partisipa iha elisaun parlamentar, ho mehi ida deit katak programa ne’ebe partidu politiku sira promete bele implementa duni, la halo povu preokupa, oinsa mak povu sai hosi mukit.

Kada tinan 5, Timor-Leste halao elisaun parlamentar hodi define futuru nasaun no estadu tuir povu nian hakarak, katak oinsa povu sai hosi mukit, oinsa asesu edukasaun ne’ebe adekuadu, oinsa dezenvolve ekonomia ne’ebe sutentavel, oinsa ema hotu bele asesu saude ne’ebe diak hosi area rural no agrikultura ne’ebe sustentavel.

Povu sira tinan 5 sempre obserav saida mak seidauk lao diak, no saida mak lao diak ona maibe presija kontinua dezenvolve ho diak liutan.

Jornalista TAFARA.TL halibur lian povu nian, hodi buka hatene preokupasun povu nian ne’ebe hakarak hato’o ba partidu politiku sira, atu bele responde no implementa bainhira partidu ne’ebe deit mak eleitu iha elisaun parlamentar.

Olivio Laurentino Soare (18), hela iha Bairo Pitte hateten, nudar sidadaun Timor-Leste haree ba partidu hotu katak, hodi halo kampanna bua ho diak tuir regulamentu ne’ebe iha. Partidu 21 hatudu nian programa idak-idak.

“Espera buat sira ne’e lao tuir programa ne’ebe sira promete, hanesan mota nebe la iha  ponte, hau tenke buka lalais ponte ida, hodi tau ba leten  hodi hakat tiha lalais  ba sorin, antes liu tiha ba, depois fila mai la iha tan preokupasaun iha kotuk. Ida ne’e mak hau hakarak hatete,maske programa  balun la sai realidade maibe vida politiku mak hanesan ne’e ona,” hateten Olivio.

Olivio ezizi ba governu, oinsa bele tau matan ba povu sira, liu-liu iha area edukasaun, estrada iha area rural atu nune’e dezevolvimentu ne’e lao ho tuir duni povu nia mehi.

Maria Auxiliadora Moniz Guterres (28), hela iha Ai-Mutin Preokupa ho povu sira nian moris iha area rural.

“Povu barak sei infrenta problema iha vida ekonomia, agrikultura, edukasaun no saude. Ho nune’e Maria Auxiliadora ho esperansa boot ba partidu sira ne’ebe kompete hela iha elisaun, atu servisu hamutuk hodi hadia, no serbi povu hodi dezenvolve rai doben ida ne’e no liu-liu kria kampu servisu ba komunidade”, Maria Espera.

Maria mos hare parte segurasan nian, hodi bele asegura seguransa lao ho diak, servisu hamutuk ho komunidade sira hodi ses hosi violensia no konflitu. Atu nune’e problema ne’e la mosu no la halo povu sira tauk.

Komunidade Ismail Amaral (27), hela kampu Merdeka haktuir katak, vida nudar negosiante , ezizi liu ba partidu sira ne’ebe agora dadauk halo kampanna politiku, bainhira lidera governu ba tinan 2017-2022, bele proteje povu sira nia moris, bele fo balansu ba povu nia moris

“Ita hare liu ba iha Parte Agrikultura nebe povo balun sei preokupa tebes, tanba sira iha vontade atu fila natar, maibe la iha kbiit osan hodi bele halao atividade  to’os nian. Iha parte ba negosio nia oinsa atu orienta sira iha vida ekonomia, nune’e iha atividade ne’e bele lao ho diak, atu nune sai sidadaun nebe diak iha vida ekonomia, no oinsa bele kompete ho investimentu internasional.

Manuela Foreirra Sequeira (56) hela iha Palpasu hateten katak, nudar inan hato’o preokupasaun katak elisaun kampanna akompana dala hira ona, espera katak la hamosu violensia.

“Ita ne’e nasaun ida ne’ebe kiik no ita ne’e la seluk, la leet mesak Timor oan deit. Nudar nasaun demokratiku ida, ita mos tenke iha konsiensia rasik hodi halao moris ho hakmatek. Hau preokupa liu ba familia,vizinnu no mos ambiente, hodi bele hari estabilidade no pas iha nasaun ne’e “,Manuela espera

Manuela husu ba Partidu politiku sira atu bele servi ba nasaun, tanba sei iha partidu ida mak sei manan, hodi lidera povu ho diak.* [Zelia Ximenes  |Contributor TAFARA.TL Editor: Zevonia Vieira | 23.06.2017].

About Zelia Ximenes

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *