Wednesday , October 24 2018
Home / Sosial & Politika / Estudante Bolseira 150 resin Iha Brazil Preokupa Simu osan Tarde, Hetan Presaun Hosi Uma Nain Atu Duni Sai
Universidade Federal de Uberlandia iha Brazil Rio dei Janeiro. [Foto: google copyright | 09.08.2018]

Estudante Bolseira 150 resin Iha Brazil Preokupa Simu osan Tarde, Hetan Presaun Hosi Uma Nain Atu Duni Sai

 Estudantes ne’ebé hela iha pensionatu selu diretamente ho uma nain, bainhira selu tarde estudantes sempre hetan presaun ka ameasa husi uma nain atu duni sai, tamba selu la tuir data kontratu ninian”. Estudante hatoo prekupasaun ba TAFARA.TL via e-mail

 Estudantes bolseirus Timor oan mais ou menus 150 resin ne’ebé hala’o hela estudu iha teritoriu Brasil, oras ne’e dadaun hasoru hela problema konaba bolsa atrasado, tanba Governu la dauk halo pagamentu ba bolsa fulan Setembru no fulan Outubru tinan ida nee.

Estudante hirak ne’ebe oras ne’e dadun halao hela estudu iha Nasaun Brazil hatoo problema ida ba TAFARA.TL via E-mail no Whatsapp, tanba situasaun ne’ebe sira enfrenta prejudika tebes ba sira nia kondisaun.

“Ho atrazadu ida nee, prejudika tebes ami no hamoris problema mak hanesan tuir mai nee, uma nain ejiji ami tenki selu alojamentu ne’ebé ami hela ba. Balun ne’ebé hela iha pensionatu no balun hela iha apartamentu. Estudantes ne’ebé hela iha pensionatu selu diretamente ho uma nain, bainhira selu tarde estudantes sempre hetan presaun ka ameasa husi uma nain atu duni sai, tamba selu la tuir data kontratu ninian.”hatete estudante Mario Bolseira via E-mail.

Nune’e mos estudante Mario [laos naran lolos] informa “balun ne’ebé hela iha apartamentu kada fulan selu ho boleto [via eletróniku. Red], bainhira estudantes selu tarde husi data determinada maka estudantes sei selu multa kada loron.”

Ho nune’e liu husi karta ne’ebe sira manda liu husi e-mail relata problema ne’ebe mak sira hasoru liliu ho bolsa ne’ebe mak tama tarde, tanba sira presija selu bee, eletrisioadade, Wifi Internet inklui transporte ba eskola.

Ami presija selu kontas adisionais hanesan bee, ahi, internet, transporte ba kampus, no material estudu ninian. Maibe ami laiha osan hodi sosa no selu buat sira ne’e”, konfesan Mario

Iha estudantes balun ne’ebé hela do’ok husi eskola, presija lao ain ho distansia 5 km resin hodi tuir aula iha tempu loron, maibé iha tempu kalan ami labele ba tuir aula, tamba do’ok husi ami nia hela fatin”, konfese Mario via e-mail iha loron 08/10.

Sira mos informa ba TAFARA.TL katak durante fulan hitu ona seidauk iha Embaixador no adidu sira ne’ebe mak halao misaun iha Brazil, tanba ne’e susar mos ba sira atu hatoo dezafiu ne’ebe mak sira hasoru, tanba ne’e situasaun ne’ebe mak agora sira infrenta akontese ona iha fulan hitu liu ba.

“Adidu no Embaixador laiha, tamba sira nia missaun remata iha fulan 7 liu ba. Ho situasuan ida ne’e laos foin maka akontese, maibe akontese durante fulan hitu ona. No mos semana oin estudantes balun presija ba hala’o estudu iha base ka kampu, nune’e estudantes sira presija tebes osan hodi sosa material da eskola no passagem hodi halao viagem iha semana oin, no semana ne’e mak ami nia bolsa la tama, signifika katak estudantes sira ne’e sei la ba tuir estudu iha base ka kampu no sei reprovadu/kredit iha materia ne’ebé matrikuladu”, afirma Mario.

Ho problema ne’ebe sira hasoru, estudante sira ne’ebe halo estudu iha Brazil recomenda ba governu katak husu ba Ministério da Educação atu halo transferensia imediato osan bolsa nian, atu nune’e labele prejudika prosesu aprendizajem, hela fatin no necessidade básiko. Husu mos ba Ministério das Finanças atu bele tau prioridade ba prosesso pagamentu bolsistas sira hotu ne’ebé oras ne’e dadaun namkari iha ema rain hodi buka matenek basa ami nian moris iha ne’e depende totalmente husi governo no moris iha ema nian rain situasaun diferente ho moris iha ita nian rain no husu mos ba governo atu estabele fali ona embaixador ho adido tanba durante fulan hitu ona ami iha ne’e sem embaixador no adido.

Universidade iha Brazil ne’ebe estudante Timor oan sira halo estudu mak hanesan Universidade Federal Fulminense [UFF], Universidade Federal de Uberlândia no universidade seluktan.

Bainhira nutisia ne’e TAFARA.TL hatun, seidauk halo konfirmasaun ho Ministeriu Edukasaun, TAFARA.TL sei halo konfirmasaun ho Ministeriu relevante iha tempu badak tuir mai. * [ Bebiana Soares | Editor: Zevonia Vieira | TAFARA.TL 09.10.2018 ]

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *