Wednesday , June 19 2019
Home / Sosial & Politika / Ex-Lider Pro Integrasi Herminio: Governo Indonesia Tenke Husu Deskulpa no Fo Kompensasaun ba Vitima Funu
Ex-Lider Pro Integrasi Herminio das Silva da Costa iha loron memoria 7 de Dezembru. [Foto: Zevonia Vieira | 10.12.2018]

Ex-Lider Pro Integrasi Herminio: Governo Indonesia Tenke Husu Deskulpa no Fo Kompensasaun ba Vitima Funu

Komemora Loron Memoria, 7 Dezembru, loron hirak liuba, familia vitima kontinua eziji Indonesia atu hatudu ruin no rate vitima invazaun nian. Ex-Vice Sekretariu Prezidium APODETI, Herminio da Costa da Silva mos apela ba governo Indonesia atu entrega ema nia ruin, husu diskulpa no fo kompensasaun ba vitima sira.

Iha loron komemorasaun ba dala 43 nian, Centro Nacional Chega! (CNC) konvida mos Ex-Vice Sekretariu Prezidium APODETI, Herminio da Silva da Costa hodi hola parte. CNC hato’o konvite ba Herminio tanba nia fo sasin ba CAVR kona ba invazaun Indonesia nian.

Iha entrevista ho TAFARA.TL liga ho invasaun hosi forsa Indonesia mak halo ona violasaun dereitus umanus bo’ot, Hermino da Costa da Silva hatan katak governu Indonesia iha dever ida atu entrega fila fali ema ne’ebe mate iha operasaun militar. Moralmente nasaun Indonesia tenke halao nia dever, ema sira ne’ebe lakon sira nia vida hanesan Isabel Barreto, Borja da Costa, Rosa Muki, Nicolau Lobato no sira seluktan, ida ne’e dever moral ida kualker nasaun ida tenke halo.

“Hau apela ba governu Indonesia atu komesa entrega ema sira nia ruin, ita labele moe tanba relijiaun fo dalan para ita responsabiliza ita nia an. Sebele partikularmente tenke husu deskulpa tan, atu bele halo mamar ema nia sofrementu durante Indonesia okupa tinan 24 nia laran, ema balun hetan diak mais barak liu hetan la diak. Indonesia tenke fo de kompensasaun para sira bele moris diak”, konfesa Herminio nudar Ex-prointegrasionista.

Ba TAFARA.TL Ex-Vice Sekretariu Partidu APODETE ne’e mos hateten ba TAFARA.TL katak iha loron 7 Dezembru 1975, hahalok sala ne’ebe forsa Indonesia halo ona.

“Hau nia premeira pensamentu ne’e hau hatete ne’e sala ona. Ita labele forma futuru nasaun ida tuir forsa, mais hau hatene ema barak la sala, Indonesia hanesan nasaun ida, nia iha responsabilidade nafatin secara moralmente, politikamente no militarmente Indonesia tenke responsavel no oinsa mak bele hadia ema nia laran moras”,

Iha fatin hanesan, relasiona ho ema baruk ne’ebe lakon ne’ebe hetan tiru no oho hosi militar Indonesia, TAFARA.TL dada lia ho familia vitima Maria Genoveva da Costa Martins naran kodigu ‘Loha’ signifika subar iha fatuk kuak hodi nune’e inimigu labele haree, hatoo esperansa boot ba governu Timor-Leste no Indonesia.

“Hau husu Governu Timor-Leste no Indonezia tenke iha koperasaun ida ne’ebe diak para bele iha dalan hodi hatudu Borja da Costa nia ruin. Nudar kultura, familia no ran ami nian maibe ema ne’e nasaun nia patrimoniu. Borja da Costa mate fo nia isin no ran hodi salva rai ida ne’e, no oinsa mak povu Timor bele hetan ninia liberdade, “ Genoveva expresa.

“Kompetensia governu Timor no Indonezia hodi halo kordenasaun diak para bele fo fila restu mortais sira mai hotu; Hanesan Nicolau Lobato, Daitula, Wewe, Muki Bonaparte tanba too agora la hatene sira nia ruin iha ne’ebe”, Genoveva esplika liutan iha ponte kais, iha 07/12.

Ezijensia hosi familia vitima sira husu justisa kontinua lao nafatin, iha esperansa bot hodi harii Komisaun ba Ema Lakon. CNC mos kontinua halao servisu hosi husu harii Komisaun refere. Direitor Ezekutivu Centro Nasional Chega! Hugo Fernandes ba TAFARA.TL hateten katak ema lakon tenke sai prioridade servisu governu Indoneziu ho Timor, ne’e labele responsabilidade Centro Chega! nian deit, tanba Komisaun ba Ema Lakon ne’e governu Indonesiu ho Timor rasik mak rekomenda.

“Saida mak Centro Chega! halo, komesa hatudu inisiativa sira. Responsabilidade bot liu governu Timor-Leste no Indonesia mak tenke tuur hamutuk no koalia ida ne’e,” esplika Hugo Fernandes

Hugo Fernandes mos afirma katak responde ba inisiativa sira lao ona, iha semana ida ne’e, iha visita reunifikasaun ba Timor oan sira ne’ebe lakon durante funu nia laran no fila mai, hodi hasoru sira nia familia, maibe atu halo ida ne’e nudar Komisaun mak sedauk.

Indonesia halo invazaun mai Timor-Leste iha 7 Dezembru 1975 no kontinua okupa Timor-Leste durante tinan 24 nia laran. Durante okupasaun Indonesia, iha CAVR nia relatoriu hatete katak iha ema 1,500 – 3,000 mak mate durante tempu konflitu internal. Iha tempu okupasaun Indonesia, violasaun fatal mak akontese hosi 1974 – 1999 halo mate ema 110,000 resin. Mate tanba hamlaha no moras hamutuk 95,000 resin. Iha eventu kauza deslokasaun hamutuk 100,000 resin mak akontese no halo halo ema besik 300,000 mak desloka hosi sira nia hela fatin. Dadus ikus hatudu katak ema sira mak refujia ba rai seluk, inklui Indonesia, Portugal, Australia hamutuk 250,000. Iha tinan ikus antes Indonesia husik hela Timor-Leste, ema besik 1,500 mak hetan oho. Hamutuk ho vitima lubuk ida ne’e, mosu mos akontesementu kruel sira seluk, hanesan estragus ba kultura, propriedade, meioambiente, no relasaun entre ema iha sosiedade nia laran. Situasaun ne’e laos fo efeitu deit ba parte sira ne’ebe involve iha konflitu deit maibe mos ba ema inosente sira. Sira hotu, ne’ebe mak involve dereitamente no mos hirak ne’ebe hetan impaktu hosi konflitu, barak mak sei moris no kontinua sofre mentalmente, fizikamente, sosialmente no politikamente. * [ Zevonia Vieira | Editor: Ato ‘Lekinawa’ Costa | TAFARA.TL | 10.12.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *