Wednesday , October 24 2018
Home / Sosial & Politika / Feto 87% no Mane 77% Laiha Servisu, 46% Deit Mak Eskola Ka Tuir Formasaun
UNDP no FIinders University lansa relatoriu nasional dezenvolvimentu umanu TL 2018 "Planeia oportunidade ba populasaun joven ida".[Foto: Zevonia Vieira | 03.04.3018]

Feto 87% no Mane 77% Laiha Servisu, 46% Deit Mak Eskola Ka Tuir Formasaun

Joven sira la partisipa iha kualidade no variedade edukasaun ne’ebe adekuadu, oportunidade ba formasaun no dezenvolvimentu abilidade nune’e bele transisiona ho susesu hosi edukasaun ba servisu. Feto 87% no mane 77% laiha servisu, 46% deit mak eskola ka halao hela formasaun iha tempu peskiza. Feto 44% no mane 49% ne’ebe sujere katak proporsaun boot ida hosi joven sira laiha servisu

 UNDP Timor-Leste servisu hamutuk ho VII Governu no Flinders University hodi lansa relatorio nasional dezenvolvimentu umanu Timor-Leste 2018 ho titlu Planeia oportunidade ba populasaun joven ida.

Liu hosi komunikadu imprensa ne’ebe publika liu hosi UNDP esplika katak Timor-Leste tama dadauk ba janela uniku ida tinan 30-40 ba oportunidade demografika ho potensialidade ba dezenvolvimentu ekonomiku no umanu ne’ebe lais. Enkuantu nasaun barak enfreta dezafiu hosi sira nia populasaun idozus, Timor-Leste segundu nasaun ne’ebe joven liu iha rejiaun Asia pasifiku, iha oportunidade atu transfere tulun ne’e ba socio ekonomiku dividendu liu hosi loke potensialidade populasaun joven sira nian.

“Maibe esforsu ne’e hasoru dezafius hosi numeru joven dezempregu ne’ebe hasoru vulnerabilidade oioin iha moris diak, partikularmente iha edukasaun no vitalidade komunitaria. Investimentu ho kualidade no tarjetu tenke aumenta barak liu ba saude, edukasaun no ekonomia agora, se lae Timor-Leste bele lakon oportunidade uniku atu hasae potensialidade dezenvolvimentu ba dekade hirak tuir mai”, esplik iha komunikadu imprensa, 3/04

Liga ho relatoriu Nasional Dezenvolvimentu Umanu Timor-Leste 2018 ne’ebe lansa ona hosi Primeiru Ministru, Dr. Marí Alkatiri ho objetivu mak atu promove diskusaun publiku no formulasaun politika sira konaba investimentu iha juventude no sira nia moris diak, nune’e bele benefisia hosi potensialidade demografika dividend. Relatoriu ida ne’e rezultadu hosi kolaborasaun durante tina ruan entre PNUD, governu Timor-Leste no Universidade Flinders Australia.

Kordenador Rezidente Nasaun Unidas no Reprezentante Rezidente PNUD, Roy Trivedy katak Timor-Leste iha oportunidade uniku atu aselera nia dezenvolvimentu umanu. Ida ne’e so bele aproveita liu hosi jerasaun joven feto no mane sira ne’ebe iha kbiit, abilidade, edukasaun diak no preparadu atu kontribui totalmente iha prosesu konstrusaun nasaun.

Tuir dadus esplika katak Timor-Leste nudar nasaun ida joven liu iha mundu 74% hosi populasaun ne’ebe ho idade 35 ba kraik, sai hanesan nasaun foinsae daruak iha rejiaun asia pasifiku depos de Afghanistaun no globalmente joven liu ba dala 15, idade media tinan 17,4%.

Rezultadu peskiza hatudu katak joven sira iha Timor-Leste dezempenna ladiak iha area edukasaun hanesan alfabetizasaun, valor sivika principal, konnesementu no abilidade iha sekulu 21, inklui koalia iha publiku, abilidade atu maneka finansa, utilizasaun teknolojia bazika ba informasaun no komunikasaun bazika no teknolojia no konnesementu konaba pratika diak iha ijiene, nutrisaun no saude.

Tuir relatoriu hosi Relatoriu Dezenvolvimentu Umanu [RDU] hatudu katak joven sira la partisipa iha kualidade no variedade edukasaun ne’ebe adekuadu, oportunidade ba formasaun no dezenvolvimentu abilidade nune’e bele transisiona ho susesu hosi edukasaun ba servisu. Feto 87% no mane 77% laiha servisu, 46% deit mak eskola ka halao hela formasaun iha tempu peskiza. Feto 44% no mane 49% ne’ebe sujere katak proporsaun boot ida hosi joven sira laiha servisu

Liu hosi dadus hatudu katak presiza esforsu makaas hodi hadia edukasaun iha Timor-Leste, RDU Nasional sujere ba governu bele adopta pratika diak internasional nian no konsidera aloka 25% hosi orsamentu ba setor edukasaun no formasaun hodi garante asesu ba edukasaun ho kualidade entre juventude feto no mane sira.

Tuir RDU Nasional katak hasae deit despeza publika sei la ganarte kualidade edukasaun ne’ebe aas. Investimentu ne’ebe iha tenke garante katak iha mos apoiu manorin nain ho kualidade no fasilidade aas iha sistema edukasaun nia laran, inklui asesu ba biblioteka, material rekursu no ekipamentu.

Edukasaun mos tenke hetan oreintasaun hosi kurikulu ida ne’ebe iha balansu diak no haburas aplikasaun teoretika no pratika. Esperiensia iha fatin seluk hatudu katak hasae komplesaun taxa eskola to grau 12 bele sai hanesan fator kontribuidor boot hodi hamenus dezempregu iha juventude sira. Oras ne’e seo oha difisiensia iha Timor-Leste nia edukasaun tanba dezvantazen jeneru.

RDU Nasional mos fo hanoin ba governu katak tenke garante ambiente edukasaun edukasional ne’ebe responde ba diversidade ambiente hanorin sira nian, liu osi politika no pratika edukasaun inkluziva, nune’e bele kria ambiente aprendizazen ne’ebe halo juventude sira sente seguru no motivadu. Presiza mos kontinua komunika valor edukasaun ba inan aman sira no komunidade, nune’e bele hadia retensaun kanorin sira, liu-lu entre joven feto sira ne’ebe atu tama ona ba idade puberdade.

Entretantu Ministro na Presidensia de Conselho de Ministro, Adriano do Nascimento iha intervensaun iha CCD, 3/04 hatete katak liu hosi relatoriu ne’ebe UNDP no Flinders University relata hosi esforsu ne’ebe halo ona, hodi hatudu realidde moris Timor nian, liu-liu iha seitor edukasuan. VII Governu apresia tebes ba relatoriu refere, tanba setor edukasaun importante ba prosesu dezenvolvimentu nasaun ida ne’e nian.

Tuir Ministru Adriano katak relatoriu ne’ebe nia kontiudu diak tebes, deskreve faktus, problemas no difikuldade ne’ebe nasaun nee infrenta. Relatoriu ne’e mos hatudu, hodi fo rekomendasaun ba ukun nain sira, atu bela tau esforsu politika, nune bele fo atensaun masimu, ba saida mak nasaun no estadu tenke halo tuir. Tanba ne’e governu konsidera ba kontiudu relatoriu ne’ebe aprezenta hosi UNDP, liu-liu iha dezenvolvimentu rekursu humanu nian.

“Papel importansia ba joventude sira nian, klaru katak relatoriu hateten iha nasaun ne’e ema barak liu mak joven ho nia problema no difikuldades oin-oin, ne’ebe nasaun ne’e infrenta no joven mos infrenta. Maibe nudar nasaun no estadu, nudar sidadaun ne’ebe moris iha nasaun ida ne’e, katak juventude iha nia papel importante ba prosesu dezenvolvimentu nasaun ida ne’e nian. Juventude nia papel mak atu hatuur metin soberania nasaun nian, hatuur no hametin paz no estabilidade seguransa no demokrasia ba ita nia paiz joven ida ne’e, juventude ne’e mos atu promove, konsensializa juventude sira seluk, inspira joven sira seluk, atu hamosu nasionalismu, patriotismu liu-liu hamosu espiritu voluntarismu, atu hola parte iha prosesu dezenvolvimentu nasaun ne’e nian”, hateten Adriano

Adriano fo hanoin ba partisipante sira katak govenu nia programa politika liu-liu mak tau esforsu ba difikuldade no dezafius ba problema sira ne’ebe infrenta liu-liu iha seitor edukasaun nian. Governu iha papel hamosu politika ida ne’ebe diak liu atu hadia kualidade edukasan no liu-liu atu trata joven sira ni futuru, hodi nune’e bele hadia sira nia moris.

“Governu ida ne’e iha nia politika rasik no elobora politika ba komponente tolu. Primeiru fo kontinuasaun ba planu estratejiku dezenvolvimentu ne’ebe estadu aprova ba tinan hirak liuba, politika governu ida ne’e hatuur hodi fo kontinuasaun progresu ne’ebe governu anterior halo no implementa dadauk, hodi hadia seitor hotu-hotu inklui edukasaun, governu ida ne’e fo komprimisiu liu-liu partidu Fretilin no PD fo komprimisiu eleitoral ne’ebe hatoo iha kampanye eleitoral hodi sai politika ba governu ida nian”, informa Adriano iha CCD.

Eiz membru parlamentu III legislature ne’e mos hateten katak, governu fo atensaun oinsa atu hadia diak liutan fasilidade eskola nian, atu hadia diak liutan kurikulu ne’ebe presiza halo adaptasaun ho dezenvolvimentu ka nesesidade nasaun ne’e nian. Programa governu ne’e nian mos atu hamosu politika ida, oinsa mak bele fasilita estudante hirak ne’ebe dook hosi eskola, halo akomodasaun ba estudante sira, atu sira bele hela besik iha eskola, hodi bele kontinua eskola, governu mos halo politika atu iha transporte escolar, governu mos iha hanoin ida hodi hamosu fundu ida, para oinsa bele fasilita kreditu ba joven sira ne’ebe matenek, maibe inan aman laiha kbiit, nune’e joven sira bele hetan asesu kreditu, hodi kontinua sira nia eskola iha universidade, “klaru katak programa ne’e tenke interligadu ho programa sira seluk hanesan saude no sira seluk maibe ita hotu akompanna politika iha rai laran programa sira ne’e la liu no rejeitadu hosi parlamentu nasional ne’ebe hela ba eleisaun atu mai dadauk ne’e, maibe ami kontinua nafatin ho programa ne’ebe eziste tanba komponente ida mak fo kontinuasaun ba programa governu anterior nian”.

Liu hosi Adriano nia intervensuan apela ba joven sira katak importante liu ba future mak iha korazen nafatin, tenke iha konfiansa no esperansa katak tempu ida ita nia nasaun sei diak, tempu ida kualidade edukasaun sei diak no tempu ida sei iha oportunidade atu hetan servisu. Matenek nain sira nia lia fuan “matenek halo ema fasil atu hanai malu maibe susar atu hanehan malu, matenek halo ema fasil atu ukun malu maibe susar atu sai atan ba malu”. * [ Zevonia Vieira | TAFARA.TL | 04.04.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

2 comments

  1. Porsentajen 87% feto no 77% mane la iha serbisu no porsentajen sira kona-ba la eskola ka treinu, sira mai husi powerpoint ne’ebe UNDP halo ka husi ne’ebe? Ami iha relatoriu de’it no buka maibe la hetan numeru sira-ne’e iha relatoriu nia laran. Obrigada.

    • Iha relatoriu pagina 8, paragrafu ikus iha ne’eba esplika entre respondenti peskiza sira, 82% [ feto 87% no mane 77%] laiha servisu, no pursentu 46 deti mak eskolah ka halao hela formasaun iha tempu peskiza [feto 44% no mane 49%), ne’ebe sujere katak proposaun boot ida husi joven sira laiha servisu

Leave a Reply

Your email address will not be published. Required fields are marked *