Thursday , August 16 2018
Home / Sosial & Politika / Feto Kontribui Makaas Ba Edukasaun, Saude no ekonomia, Lú Olo: Tenke Hakribi Violensia Jeneru
Prezidente da Republika, Dr. Francisco Guterres Lú Olo hato deskursu iha abertura loron nasional veteranu iha CCD. [Foto: Media PR | 02.03.2018]

Feto Kontribui Makaas Ba Edukasaun, Saude no ekonomia, Lú Olo: Tenke Hakribi Violensia Jeneru

“Ita tenke hakribi violénsia iha família no violénsia jéneru nian, iha ita-nia rain. Ita tenke haka’as-an atu muda lailais situasaun ida-ne’e. Ha’u husu ba Konsellu Ministrus, ba ajénsia relevante sira Estadu nian, atu hala’o lalais polítikas ne’ebé hase’es no penaliza violénsia doméstika”. Lú Olo

Feto forte, nasaun forte nudar slogan ida ne’ebe uza iha konferensia internasional feto nian ne’ebe partisipa hosi nasaun Afrika, Amerika Latina, Europa, inklui Timor-Leste.

Liu hosi konferensia ne’ebe koalia konaba asumtu feto, Prezidente da Republika, Dr. Francisco Guterres Lú Olo, hatoo deskursu katak konferénsia ida ne’e, ho partisipantes oioin ho kualidade, loke tan dalan ba diálogu no kooperasaun entre Estadu no sosiedade sivíl, iha nível hotu-hotu, “Ita-nia país tenke haklean ba beibeik diálogu no kooperasaun.

“Feto sira Forte ba Nasaun Ida Forte mak tema ba Konferénsia ida-ne’e. Ita-nia país hasoru hela dezafiu boot ida, oinsá hasa’e oportunidade hanesan ba feto no mane. Atu promove oportunidade hanesan ba feto no mane, ita presiza hotu nia partisipasaun. Ita presiza tulun hosi órgauns Estadu, hosi organizasaun sosiedade sivíl, relijiozu no laiku, no hosi sidadaun ida-idak, feto no mane,   hosi família ida-idak, iha suku no aldeia sira, hodi hala’o projetus dezenvolvimentu no liu hosi dalan seluk. Ba objetivu ida ne’e, ita presiza polítika públika di’ak”, hateten Lú Olo iha salao Ministeriu Finansas, 08/06.

Lú Olo hatutan katak feto sira reprezenta ita-nia sosiedade nia sorin-balun. Loroloron feto sira hala’o knaar hirak ne’ebé importante tebes, hodi fó-han sira-nia família no tanen ekonomia uma-laran nian no produsaun ekonómika, en-jerál. Maioria feto timoroan servisu iha to’os no natar-laran, no sira-nia atividade agríkola ne’e ajuda tanen moris ba maioria uma-kain Timor-Leste nian. Iha sidade-laran, númeru feto servisu iha kompañia sa’e ba beibeik, iha setór ekonómiku oioin. Bele dehan katak feto sira fó kontribuisaun maka’as ba edukasaun, saúde no ba ekonomia uma-laran nian, katak feto sira-nia atividade fó impaktu ba situasaun jerál nasaun nian.

Objetivus Dezenvolvimentu Sustentável [ODS] ne’ebe estadu Timor-Leste halo esforus makaas ba asumtu importante hanesan saúde di’ak no moris-di’ak ba ita hotu. Estadu hakarak labarik hotu simu vasina iha ita-nia rain no iha rain sira seluk hodi hase’es sira husi moras, edukasaun ekilibradu ho kualidade ba ema hotu, hodi garante ema hotu tau naran no remata duni eskola no garante igualdade jéneru no hakbiit feto sira, ho otas ne’ebé deit.

Ba konfresista sira Xefe Estadu ne’e informa katak Timor-Leste hanesan mós Estadu-Membru hotu Nasoins Unidas nian, kompromete-an hamutuk atu hetan objetivu Dezenvolvimentu Sustentável 17 ne’e, iha tinan 12 oin mai. Ba objetivu sira ne’e hotu, presiza partisipasaun hosi feto sira-ne’ebé iha koñesimentu, ativu, ne’ebé fó- an tomak no iha kbi’it. Presiza servisu kedas no hamutuk hodi halo sosiedade fó valór loloos ba feto sira-nia kontribuisaun ne’ebé importante. Bainhira proklama independénsia, estadu hahú hakaat dadaun ona ba objetivu hirak-ne’e, maibé dalan ne’ebé ita lao hamutuk ne’e, sei naruk hela.

“Ha’u sei hanoin-hetan katak, iha tinan rua/tolu hafoin ita proklama Independénsia, iha área sira ne’ebé la’ ós okupadu,   no ikus mai, iha baze-de-apoiu, derepente, feto barak hetan responsabilidade hirak ne’ebé aas, kaer dadaun lideransa lokál no barak kaer lideransa, nível nasionál. Feto sira hahú hatudu iha tempu ne’ebá katak sira bele hatán ba dezafius, no ita-nia sosiedade aprende simu no respeita sira. Bainhira ita restaura Independénsia, ita hetan dalan foun atu rekoñese no fó valór ba feto sira, iha ita-nia sosiedade. Konstituisaun RDTL hatuur katak sidadaun hothotu, feto ka mane, hanesan, tuir lei haruka. Konstituisaun la husik fihir ka haketak ema ho razaun ne’ebé deit, inklui, jéneru”, hateten Lú Olo

Iha Konstituisaun hatuur katak “Feto no mane iha direitu no obrigasaun hanesan iha nível família, kulturál, sosiál, ekonómiku no polítiku”.

Lú Olo apela ba ema hotu katak, “ita tenke hakribit violénsia iha família no violénsia jéneru nian, iha ita-nia rain. Ita tenke haka’as-an atu muda lailais situasaun ida-ne’e. Ha’u husu ba Konsellu Ministrus, ba ajénsia relevante sira Estadu nian, atu hala’o lalais polítikas ne’ebé hase’es no penaliza violénsia doméstika. Ha’u apela ba sosiedade tomak atu hakribit violénsia. Ita iha devér atu hakotu violénsia. Ha’u husu ba país “toleránsia zero” katak la simu violénsia doméstika, família tenke sai fatin ida ba domin no ajuda malu, la’ós fatin ida ba violénsia”. * [ Zevonia Vieira | TAFARA.TL | 08.06.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Membru Komunidade Balun nia Moris Depende ba Lixueiru Tibar, Maske Fatin Refere Bele Lori Moras

Aldeia Turlio, Tibar fatin ida ne’ebé Governu determina hodi soe lixu ne’ebé produz husi komunidade …

Leave a Reply

Your email address will not be published. Required fields are marked *