Thursday , February 21 2019
Home / Sosial & Politika / Feto Timor-Leste Tenke Brani Diskute, Interven no Foti Desijaun ho Kualidade
Juventude feto partidu politiku nian rona hela mensajen husi lideransa sira iha sesaun abertura. [Foto: Eza |26.06.2018].

Feto Timor-Leste Tenke Brani Diskute, Interven no Foti Desijaun ho Kualidade

Hakbi’it feto iha vida pulitika nu’udar dalan ba hametin no haburas demokrasia. Atu Feto sira iha papel hanesan ho Mane iha seitor no aspeitu hotu, MOFFE-TL ho CAUCUS fó formasaun ba juventude feto husi partidu politiku 14.

Formasaun ne’e ho tema Promove Partisipasaun Feto no Juventude Feto iha Partidu Polítiku atu hodi enkoraja, motiva no hakbi’it feto sira, nune’e bainhira tur iha estrutura partidu polítiku ruma ka asumi responsabiidade ruma iha orgaun estadu brani foti desizaun, brani diskute no brani atu interven iha kualker desizaun ruma.

Prezidente Board Caucus, Maria Exposto iha abertura hateten, “Caucus mai ho objetivu ida, hakarak enkoraja, motiva no hakbi’it feto sira liu-liu iha area polítika, oinsá mak feto maluk sira tur iha estrutura partidu polítiku ka asumi responsabiidade ruma bele foti desizaun ho kualidade”.

Maria Exposto expekta, feto sira ne’ebé tuir ona formasaun iha Caucus, automatikamenete feto sira ne’e bele hatete, brani foti desizaun, brani diskute, brani interven iha kualker desizaun ruma.

Iha fatin hanesan, Prezidente Rede Feto Timor-Leste, Judite Dias Ximenes afirma, feto nia partisipasaun iha vida polítika tamba emansipasaun, nune’e feto sira tenki partisipa ativu iha prosesu hotu-hotu hodi reprezenta nia feto maluk sira, la’os ba tur nonok de’it. Eis Deputada ne’e husu ba Feto sira ne’ebé involve iha partidu politiku tenke hatene didiak manual politika partidu nian hodi hatene saida mak partidu sei halo bainhira kaer ukun.

“Ita feto mós tenki preparadu, ita atu ba ukun ita tenki hatene manuál partidu nian ne’e saida? programa polítiku karik atu ba governu, saida mak partidu atu halo, ita tenki hatene. La’os feto ba ne’e atu kompleta de’it feto iha vida polítika, maibé ita ba ne’e ho ita nia natureza hanesan feto ne’e duni,” dehan Judite Dias Ximenes.

Partisipante, Maria Natalia Sousa Araújo hein katak atraves formasaun ne’e bele aprende buat foun ruma, nune’e bele fahe fila fali ba nia maluk feto sira ne’ebé mak la partisipa.

Diretora MOFFE-TL, Yasinta Lujina esplika, inisiu hanoin atu servisu hamutuk ho partidu hotu-hotu ne’ebé mak eziste (partidu 32), maibé depois de prosesu haree katak partidu barak fatin laiha. Nune’e ba tinan ida ne’e sira sei servisu hamutuk ho partidu polítiku sanulu resin haat, hanesan CASTD, CNRT, FRENTI MUNDANSA, FRETILIN, KHUNTO, PD, PDN, PEP, PLP, PUDD, UDT, UNDERTIM. Husi partidu sira ne’e, kada partidu reprezenta juventude feto nain 2.

Durante loron haat ne’e partisipante sira sei aprende kona-ba, Funsaun Parlamentu Nasionál, Polítika Abordajen Integradu ba Jéneru, Abilidade Koalia iha Públiku, Feto & Polítika, Funsaun Partidu Polítiku ‘Apos Eleisaun’ no partisipante sira sei rona eis governante feto sira nia esperiensia kona-ba feto nia lideransa.

Atividade ne’e realiza iha Tower, Fatuhada, servisu hamutuk entre Caucus no MOFFE-TL, hetan apoiu husi governu Japaun no governu Koreanu liu husi UNDP.*[Maria do Ceu | TAFARA.TL |Editor: Martinho Moniz| 26.06.2018].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *