Tuesday , April 23 2019
Home / Sosial & Politika / FFDTL No PNTL Sei Asegura Situasaun Iha Eleisaun Antesipada
Major-Jeneral F-FDTL, Lere Anan Timur hatan hela pergunta husi jornalista sira hafoin remata hasoru malu ho Prezidente da Republika.[Foto: Zinho MD | TAFARA.TL | 15.11.2017].

FFDTL No PNTL Sei Asegura Situasaun Iha Eleisaun Antesipada

Hafoin Prezidente da Republika anunsia desizaun ikus liga ho empase politiku ne’ebe durante lao iha fulan neen nia laran, katak fo fila fali ba povu, hodi vota fila fali liu hosi eleisuan antesipada.

Liga ho situasuan no preparasaun ba eleisaun antesipada, hosi parte defeza no seguransa nian, halao enkontru ofisial iha kuartel jeral F-FDTL, hodi hare besik liu ba preparasaun iha fulan hira nia laran, liga ho eleisaun antesipada.

Objetivu hosi enkontru refere, mak preparativus ba seguransa eleisaun antesipada nian ne’ebe besik dadauk ona. Ba jornalista sira, Xefe Estado Major-Jeneral F-FDTL Lere Anan Timur hateten, depois de 60 dias, Prezidente sei anunsia data eleisaun ninian, “tanba ida ne’e mak, ami bolu komandantes komponentes, komandantes unidades, municipios mai atu fo hanoin, atu halo oinsa, para responde dezafius boot ne’ebe agora dadauk mosu iha ita nia oin”.

Hatan ba media GMN kona-ba fasilidade ne’ebe sei apoia ba servisu parte rua nian. Lere responde katak militar sira tau problema kona-ba fasilidade, buat ne’ebe iha FFDTL sei bele uza, lalika ezizi buat ne’ebe boot liu ita nia kapasidade atu atende.

“Hau hanoin katak problema laiha, so quandu moras ka ou ain tohar ka, liman tohar mak la servisu ona, mas enquanto operasion, lalika ezize kondisoens no fasilidades”. Hateten Lere.

Lere mos husu ba parte seguransa nian, atu labele tau an hanesan forsa manutensaun baze maibe tau an nudar forsa lutu nasaun ninian, tenki fo buat hotu-hotu ne’ebe bele, labele limita ba buat balun que atu fo.

Lere mos apela ba lider politku sira tenke sai edukadu, ema ida ne’ebe ho maturidade, ema ida ne’ebe matenek, para mundu bele foti ita nia naran.

Iha fatin hanesan, Komandante Jeral PNTL, Julio da Costa Hornai, informa ba publiku katak situasaun jeral iha Timor-Leste lao ho diak.

“Laos problema boot ida, ne’ebe presiza operasaun boot ida, para toma atensaun ba ida ne’e. Kestaun sira ne’ebe akontese iha rai laran, ne’e kestaun normal”, tenik Julio

Hatan ba pergunta husi media GMN, kona-ba deskonfia militante partidu balun komete iha krime? Julio respode katak se deit mak komete iha krime, tantu militante, husi partidu ne’ebe deit, nia tenke ba hatan iha prosesu tribunal, mais depois de investigasaun kriminal, hotu tiha sei entrega ba tribunal, mak sei deside nia sala.*[Maria do Ceu, Henrique Soares de Jesus | Editor: Zevonia Vieira TAFARA.TL |29.01.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *