Saturday , July 21 2018
Home / Sosial & Politika / Fidelis: Ordem Juridiku Lalos, Investimentu no Dezemvolvimentu Ekonomiku Sei Laiha
Deputadu AMP, Fidelis Magalhaes halo entrevista ho jornalista sira. [Foto: Jesuinho Marcal de Jesus | 13.06.2018]

Fidelis: Ordem Juridiku Lalos, Investimentu no Dezemvolvimentu Ekonomiku Sei Laiha

“Iha nasaun ida ne’ebé deit, wainhira nia enkuadramentu, ninia ordem juridiku sira lalos, investimentu sei laiha, dezemvolvimentu ekonomiku laiha,” deklarasaun ne’e hato’o husi Fidelis Magalães ne’ebe kaer pasta nu’udar Ministru Reforma Lejislativa no Asuntu Parlamentares ba dirijentes media sira.

Fidelis Magalães aproveita enkontru ho Diretor no Chefe Redasaun midia sira, aprezenta papel Ministeriu Reforma Lejislativa no Asuntu Parlamentares ne’ebé Sekretaria Estadu Komunikasaun Sosial (SECOMS) tutela ba.

Funsaun principal Ministeriu refere mak atu hadia “framework” legais sira, tanba iha nasaun ida ne’ebé deit, wainhira nia enkuadramentu, ninia ordem juridiku sira lalos, investimentu sei laiha, dezemvolvimentu ekonomiku laiha. Nune’e Ministriu ne’e sei haree no hadia lei sira ne’ebé mak ladiak, lei sira ne’ebé kontra produtivu no lei sira ne’ebé mak replika.

“Ita nia problema mak ne’e, as vezes ita repete, replika leis rua tolu, mais lei sira mos kontra malu, tanba ita nia search enging mos laiha ne’ebé ita halo ida ita dehan lei ne’e ita seidauk halo.” Dehan Fidelis.

Governante ne’e haktuir, dalabarak iha asesor ida hakarak dehan ninia prezensa ne’e util, entaun nia dudu ita para halo lei ida, mais na verdade lei ne’e ita la presija. Komu buat ne’e kedengaran ne’e furak ita halo tia. Ita laiha database atu check, atu hare fali katak lei ne’e iha tebes duni ka lae, dalabarak ita repete bebeik. Ida ne’e ita hakarak halo, hadia e-goverment liu husi catalog ka makina ida ne’ebé mak user friendly iha instituisaun sira ne’e hotu, para bainhira ita halo diploma sira ne’e karik labele repete. No mos ita hakarak lei sira ne’e refleta duni ita nia kontestu nasional no lokal, la hamate ita nia komprimisu ba konvensoens internasionais sira, i ita nia ema sente na’in, hatene lei sira ne’e.

Ne’ebe dalabarak hakerek tia lei, lei ne’e ita store tia, ita la hatene. Ita kolia lei mak lei mak haruka, lei mak haruka, maibé koñesimentu ita nia populasaun ba lei nene badak, la kle’an. Entaun ita labele ejije ita nia populasaun nia responsabilidade tanba nia lahatene nia responsabilidade mak saida, tanba nia lahatene saida mak leis sira bee regula lorloron, laiha koñesimentu kona-ba ida ne’e.

VIII Governu liu husi Ministeriu refere sei simplifika leis hirak ne’ebe durante ne’ebé sai fali obstaklu ba investimentu, no dezemvolvimentu ekonomiku. Atu relaiza ida ne’e, tuir konseitu Governante ne’e nian, ba oin sei kontinua diskuti ho media, sosiedade sivil, no organizasaun hotu-hotu, tanba atu reforma lejislativa ne’e presija rona ema hotu-hotu. Atraves SECOMS sei kontinua servisu maka’as liu tan atu tradus hotu lei sira ba tetun, estandariza leis hirak ne’e depois sosializa ba komunidade sira atraves media para hotu-hotu bele hatene nia parte. Nune’e asuntu komunikasaun sosial sei sai mos perioridade nasaun nian.

“Liu husi ita bo’ot sira mos, ami sei halo promosaun ba informasaun publiku ne’ebé makas, ita hakarak estandarija buat barak, ita hakarak uja slot produtivu, apoiu barak ba imi, la’os deit ba koezaun i unidade nasional, ba edukasaun mos ita sei koko. Perioridades ba imi ne’e sei sai perioridades ida ba nasaun,” afirma Fidelis.

Eis Deputadu ne’e haklean, “treinamentu ba jornalista sira mos minimu tebes. Ita labele imajina tanba sosiedade ida ne’ebé matenek, sosiedade ida ne’ebé avansadu, se nia Jornalista la’os ema sira ne’ebé treinadu duni. La’os deit iha nia areas maibé iha mos areas sira seluk.”

Bolsu estudu, promosaun ba Jornalista sira, motiva no fo formasaun ba ema sira ne’ebe hakarak sai jornalista ka hakarak kontribui hanesan jornalista sai mos perioridade ba Governu ne’e. Sei la fo deit perioridade hotu-hotu ba enjinaria ou jeologu tanba minarai. Rikeja bo’ot liu ne’e mak populasaun. Maneira atu halo aproveitamentu diak liu, enkoraja populasaun maka midia i komunikasaun sosial ne’ebé kompetente no ne’ebé hatene, buat barak laos hatene halo reportajem deit ba notisia.* [Martinho Moniz | TAFARA.TL | 06.07.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Governu Hato’o Pedidu 140 Milloens ba Parlamentu Nasional Hodi Responde ba Situasaun Atual

Relasiona ho liquides estadu ka orsamentu estadu laiha, VIII Governu Konstitusional atraves Konsellu Ministrus ohin …

Leave a Reply

Your email address will not be published. Required fields are marked *