Saturday , April 20 2019
Home / Sosial & Politika / FIFA Fo Tan Sansaun Ba Timor-Leste
FFTL halo kongresy extraordinaria [Foto: Tmor News]

FIFA Fo Tan Sansaun Ba Timor-Leste

Komite Disiplinari FIFA nian fo sansaun ba Federasaun Futebol Timor-Leste (FFTL) ho multa 70,000 CHF (Swiss Franc) ka hanesan ho 70, 998,52 Dolar Amerikanu, no lakon jogu dala hitu iha kompetisaun preliminaria Kopa Mundial FIFA nian iha 2018. Sansaun ne’e fo ba FFTL tanba hatun jogador nain 9 ho nasionalidade seluk. Desizaun Komite Disiplina FIFA nian ne’e iha relasaun ho sansaun ne’ebe impoen tiha ona hosi Asian Football Confederation (AFC).

Tuir komunikadu imprensa ne’ebe FIFA publika, iha loron 12, Dezembru 2017, FIFA bele ona konfirma katak hasai ona sansaun ne’ebe impoen ba insidentes hirak ne’e akontese iha kompetisaun preliminaria ba Kopa Mundial FIFA nian no mos jogu amizade internasional sira. Nasaun sira ne’ebe kona ba sansaun FIFA nian no temi iha FIFA nia statementu imprensa mak Timor-Leste, Nigeria, no Jogador ida hosi Columbia, Edwin Cardona, tanba hatudu ninia jestu diskriminatoriu ba ninia oponente iha jogu amizade entre Republik Korea ho Columbia.

Tuir lista ne’e hasai hosi Komite Disipllina FIFA nian (iha sitiu FIFA.com), ne’ebe update iha 12 Dezembru 2017, hatete katak desizaun ne’ebe foti bazeia ba sirkuntansia espesifiku no desizaun balun sujeitu ba rekursu. Lista ne’ebe publika hatete katak , Timor-Leste hetan sansaun tanba bainhira sai nudar uma nain ba jogu Timor-Leste vs Mongola, 12 Marsu 2015, iha Stadium Municipal Dili,supporter barak liu (overcrowding) no asesu la autorizadu hafoin jogu hotu. Ba ida ne’e Timor-Leste viola Kodigu Disiplina FIFA nian, Artigu 65 kona ba Orgazisaun Jogu. Iha lista violasaun ne’ebe Komite Disiplina FIFA nian ne’e hatete mos katak Timor-Leste viola Kodigu Disiplina, Artigu 67 kona Responsabilidade tuir Lei ba Hahalok Apoiante Nian. Violasaun ba kodigu ne’e akontese tanba hahalok ne’ebe la propriu, inklui tuda bee iha masa laran ba arbitu. Violasaun ida ne’e akontese iha jogu Timor-Leste vs Malaysia, 13 Outubru 2015, iha Stadium Municipal Dili. Jogu hirak ne’e akontese durante tempu lideransa Fransisco Kalbuady Lay (Aktual Sekretariu Jeral Partidu CNRT) nian.

Laureadu Nobel da Paz, Jose Ramos Horta, iha ninia entrevista ne’ebe halo ho media online (www.sportsintegrityinitiatiave.com) hatete katak, “Konfederasaun Futebol Asia nian la moos iha asuntu ida ne’e”, Horta hatete liu hosi ninia email. “Sira mak durante ne’e suporta Kalbuadi hodi hasoru Timor oan sira sira seluk ne’ebe hakarak hasai nia”.

Tinan hirak liu ba AFC mos fo sansaun ba Diretor Tekniku FFTL nian Orlando Marques Henrique ba nia moris tomak hodi la involve tan iha futebol tanba viola Kodigu Disiplina FC nian no Lei Singapore nian.

Iha meadu tinan 2016, AFC mos halo investigasaun ba FFTL ligadu ho falsifikasaun pasaporte, hodi hatama Brazileiru nain 12 ba ekipa nasional Timor-Leste nian. Tuir komunikadu imprensa ne’ebe publika iha sitiu AFC nian (the-afc.com), 20 Janeiru 2017, ba kazu ida ne’e AFC fo sansaun ba Timor-Leste hodi la tuir AFC Asian Cup 2013 ho multa osan 20,000 dolar. Komite Disiplina AFC mos banddu Sekretariu Jeral (agora eis-Sekretariu Jeral ona) atu la involve iha atividade futebol ba periodu tinan 3 no multa 9,000 dolar. Komite ne’e mos fo orden, ba jogu 29 mak Timor-Leste partisipa ona, involve mos jogador illegal sira, ekipa nasional lakon hotu iha jogu sira ne’e no selu multa 56,000 dolar no suspensaun ba multa iha tinan rua nia laran. Hamutuk ho Amandio, Ofisial FFTL nian ida, Gelasio da Silva Carvalho, nia mos selu multa 3,000 dolar tanba hamonu qualidade jogu iha publik no halo interferensia ba sasin.

Hafoin kazu hirak ne’e akontese, Kalbuadi rezigna an tiha ona hosi FFTL iha 2016, nudar Presidente. Oras ne’e dadun FFTL prepara hela ninia Kongresu, no tuir informasaun ne’ebe rona hosi fontes kredibel katak, lideransa tuan iha FFTL kontinua tama nudar kandidatu ba Presidensia, inklui Fransisco Kalbuady Lay, Ozorio Florindo, no Gelasio da Silva Carvalho.*[Equipa TAFARA | TAFARA.TL | 19.12.2017]

 

About Equipa Tafara

Artigu ida ne'e kobertura no hakerek konjunta/hamutuk entre Jornalistas no/ka kontribuidor TAFARA.TL.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *