Wednesday , April 24 2019
Home / Eleisaun Parlamentar / Fretilin Iha Ona Akordu Servisu Hamutuk ho KHUNTO no PD
Fretilin, PD no Khunto halo konferensia imprensa ho media sira hodi fo sai rezultadu enkontru entre partidu tolu ne’e.[Foto: Zinho MD | TAFARA.TL | 04.09.2017].

Fretilin Iha Ona Akordu Servisu Hamutuk ho KHUNTO no PD

Partidu Fretilin no konvida KHUNTO (Kmanek Haburas Unidade Nasional Timor Oan) no Partidu Demokratiku (PD) asina Akordu ida nudar komprimisiu politika hodi servisu hamutuk ba forma VII governu. Ho PLP, diskusaun koligasaun sei kontinua halao hela.

Sekretariu Jeral Fretilin, Dr. Mari Alkatiri ba jornalista TAFARA.TL liu hosi konferensia da imprensa, bainhira husu kona ba akordu final hodi halo koligasuan ho KHUNTO no PD?

Dr. Mari Alkatiri hateten katak, asina akordu ohin loron sedauk bele dehan koligasun final, maibe ida ne’e sei hanesan komprimisu politiku entre partidu tolu.

“Klaru katak koligasaun ne’e laos partidu lima ne’e hotu tenke halo koligasaun, tanba depois sentidu kritiku ne’e mos sei lakon. Governu tenke lao ba oin, parlamentu mos tenke iha sentidu kritiku, tanba ne’e mak sedauk iha koligasaun maibe ohin ne’e iha kumprimisiu politiku, so que ho forsa koligasaun ona maibe sedauk formalmente ita bolu koligasaun,  tanba sedauk iha kestaun balun ne’ebe tau iha akordu ida ne’e. PD foin halo proposta no introdus iha akordu ida ne’e, entaun sei kontinua diskuti nafatin, para atu halo addenda ba akordu ida ne’e. Ida ne’e akordu dinamika ida”, esplika Dr.Mari Alkatiri.

Sekretariu Jeral Fretilin afirma liutan katak, sei nafatin halo dialogu ho partidu sira seluk hanesan PLP ho CNRT, “hau uza Sr.Taur Matan Ruak nia lia fuan, ita fiar atu dook malu agora, no sei to iha loron ida, ita sei hasoru malu iha dalan klot ida no sei hasoru malu.”

Bainhira TAFARA.TL husu kona ba karik hosi akordu ne’ebe iha sei laiha tan insidensia parlamentar?

Eiz Premeiru Ministru, Dr. Mari Alkatiri esplika katak, sei loke nafatin odamatan ba partidu hotu, sei normal bele iha inkluzaun no insidensia parlamentar. Tanba Fretilin uluk halo insidensia parlamentar tinan tolu resin no la husu akordu ida, atu hakerek, halo tanba hadomi rai ida ne’e, halo tanba hakarak atu hatudu politika foun ba rai ida ne’e.

Dr.Mari Alkatiri, esklarese liutan katak, liga ho formasaun governu prinsipiu ida mak tenke meritu no profesionalidade. Prinsipiu boot liu mak Premeiru Ministru ida deit, laiha rua ka tolu tan.  Fretilin hakarak lansa kultura politika foun ba povu katak, hosi ne’e ba oin tenke hatene no bele respeita povu nia votus, se mak manan husik nia lao tiha ba oin, depois apoia hamutuk, ida ne’e ezemplu diak ida.

Iha parte sorin TAFARA.TL husu ba Prezidente Partidu Demokratiku, Mariano Asanami Sabino, kona ba razaun saida mak halo PD hakarak servisu hamutuk ho Fretilin hodi forma governu?

Ba TAFARA.TL Asanami hateten katak, PD kaer prinsipiu desde inisiu iha kampanna mos koalia ona katak ba Timor ne’e laiha reserva, kuadrus PD laos ema foun mak foin mosu, barak mak kuadru rezistensia.

“Ho responsabilidade ba rai ida ne’e, mak ohin ami prontu para atu lao ba oin. Prontu atu viabilza no garantia governu ida ne’e to 2022, no prontu mos atu servisu ho se deit iha rai ida ne’e. PD sempre aprende lisaun ne’ebe mai hosi kotuk no nafatin orgullu ba Maun Xanana Gusmao, Maun Mari, Maun Lu Olo,  Jeneral Taur Matan Ruak no Jeneral Lere Anan Timur ho Falintil sira, ita hamutuk hodi konstrui Timor ne’ebe diak liu”, esplika Asanami.

Iha parte sorin TAFARA.TL konsege konfirma ho Portavos PLP, Fidelis Magalhaes via telephone, kona ba progresu koligasaun ho Fretilin lao to iha ne’ebe no karik sei iha nafatin iha dialogu ho Fretilin hodi koalia kona ba koligasaun?

Fidelis Magalaes esplika katak, “Ami seidauk hatene kona ba asina akordu entre Fretilin, PD no Khunto . Koligasaun entre PLP ho Fretilin ami sedauk hatene”.

Kona ba prosesu koligasaun ho PLP, Sekretariu Jeral Mari Alkatiri esplika, “Ho PLP iha prosesu atu lao hamutuk maibe kadaves ita ezizi sasan no la konsege hetan akordu, ida ne’e normal iha prosesu koligasaun maibe ita sei nafatin hamutuk tanba parlamentu ne’e dalan klot ida, ita sei hasoru malu iha ne’eba. Hau hanoin povu lakohi ona problema tanba ne’e mak fulan ida resin solusaun la mai mos povu nafatin hakmatek.”

Asina akordu komprimisiu politiku ne’ebe halao iha loron 4/09, iha Otel Novo turismo hetan partisipasaun hosi Dr.Jose Ramos Horta no kuadrus hosi partidu KHUNTO no PD.* [Zevonia Viera | TAFARA.TL | 04.09.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *