Friday , January 18 2019
Home / Sosial & Politika / Fretilin: Kilat PNTL Sosa Ho Osan Povu nian Atu Fo Seguransa, Laos Lori Kilat Hasai Fali Povu nia Moris
joven sira partisipa iha kampanye. [Foto: Copyright media bankada Fretilin | 18.11.2018]

Fretilin: Kilat PNTL Sosa Ho Osan Povu nian Atu Fo Seguransa, Laos Lori Kilat Hasai Fali Povu nia Moris

“Bankada Parlamentár Fretilin mos ejiji Governu Konstitusionál VIII ho lideransa Primeiru Ministru Taur Matan Ruak nian, atu hola medidas ne’ebé forte hasoru membru Polisia Nasionál ne’ebé komete krimi ida ne’’. Deklarasaun Bankada Fretilin

Akontesementu oknum Polisia Nasiontal Timor-Leste [PNTL] tiru mate joven nain tolu mate no seluk kanek todan, iha Kuluhun iha oras madrugada loron 18/11, Bankada Fretilin liu hosi komunikadu imprensa ne’ebe distribui ba media deklara katak ho triste tebes Timor oan sira hotu hahu loron ohin ho informasaun konaba hahalok violensia hasoru joven sira iha Bairo Kuluhun de Baixo ne’ebé komete husi membru Polisia Nasionál Timor-Leste nian.

Bankada Fretilin iha Parlamentu Nasional informa katak, foin semana kotuk mak Timor-Leste hanoin hikas fali masakre santa cruz 12 Novembru, tinan 27 liu ba wainhira joven loriku asswain Timor oan sira ema forsa invazór sira nian oho no hakanek ho kilat iha Semiteriu Santa Cruz, “sira mate atu ohin loron ita hetan liberdade no paz, ne’ebé ita hotu tenki fo liman ba malu atu serbisu hodi hametin iha ita nia rain doben ida ne’e. Iróniku tebtebes, tamba ohin, iha Timor-Leste ida ne’ebé livre tiha ona, membru polisia Timor-Leste nian mak lori kilat povu nian hasai joven Timor oan sira nia vida”.

Liu hosi komunikadu imprensa Bankada Parlamentár Fretilin deklara katak kondena maka’as átu kriminal ida ne’e no ejiji ba Estadu Timor-Leste atu investiga lalais krimi ida ne’e.

Bankada Parlamentár Fretilin mos ejiji Governu Konstitusionál VIII ho lideransa Primeiru Ministru Taur Matan Ruak nian, atu hola medidas ne’ebé forte hasoru membru Polisia Nasionál ne’ebé komete krimi ida ne’e no ejiji mós atu Governu hola medidas forte atu garante katak membru forsa defeza no siguransa Timor-Leste nian sira sei la repete tan átu sira hanesan ne’e iha futuru.

“Fiar katak autoridade relevante sira Estadu nian sei halo buat hotu atu hetan lia los kona ba akontesimentu ida ne’e no lori ema sira ne’ebé komete krimi sira ne’e ba justisa. Polisia Nasionál Timor-Leste (PNTL) ho FALINTIL Forsa Defeza Timor-Leste (PNTL) kaer kilat sira ne’ebé sosa ho osan povu nian atu fo siguransa ba povu, la’os lori kilat ne’e hasai fali povu nia moris. To’o Ona Ita nia povu, no liuliu ita nia joven sira, la merese ona atu mate tan ho kilat musan ka kroat seluk”,deklara bankada Fretilin 18/11. * [ Zevonia Vieira | TAFARA.TL | 18.11.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

OJE 2019, TMR: PR Sei Desidi Tuir nia Kompetensia, Hau Uluk Mos Veta No Haruka Fila Fali Ba PN

“Prezidente iha tempu para estuda, kuandu nia promulga nia bele halo, mais se imi hare …

Leave a Reply

Your email address will not be published. Required fields are marked *