Wednesday , October 24 2018
Home / Eleisaun Parlamentar / Fretilin – PD Husu Povu Nafatin Hakmatek, Marí: Labele Reazen Ho Emosaun
SekJer Fretilin, Marí Alkatiri, Presidente PD Asanami, Jose Reis no Adriano iha konferensia imprensa. [Foto: Zevonia Vieira | 12.05.2018]

Fretilin – PD Husu Povu Nafatin Hakmatek, Marí: Labele Reazen Ho Emosaun

“Apelu ba lideransa politiku partidaria no koligasaun sira, atu ita hotu hamutuk simu rezultadu ne’ebe atu mai, tanba ida ne’e povu nia vontade. Hamutuk hodi selebra demokrasia ne’ebe iha, laos atu sobu fali demokrasia ne’ebe iha”. Marí Alkatiri

Sekretariu Jeral Fretilin, Dr. Mari Alkatiri hamutuk ho Presidente Partidu Demokratiku, Mariano Asanami Sabino, liu hosi konferensia imprensa hatoo agradese wain ba povu tomak tanba ohin loron ezerse ona sira nia votu.

Ba jornalista sira Marí Alkatiri hateten partisipasuan ba eleisaun ohin loron diak tebes, povu responde duni ba apelu ba partidu politiku sira nian.

“Fretilin ho PD hotu hatene koligasaun ne’ebe sai baze iha VII governu no ami nia komprimisiu ne’e mantein. Ohin ami mai ho kontente fo apelu ba povu tomak atu tur hakmatek. Apelu ba lideransa politiku partidaria no koligasaun sira, atu ita hotu hamutuk simu rezultadu ne’ebe atu mai, tanba ida ne’e povu nia vontade. Lalika buka fali razaun oin-oin para kestiona lejitimidade povu nia votu, tanba sasan ne’ebe organiza iha instituisaun administrasaun eleitoral, ne’e halo ho transparensia, halo ho profesionalismu no sei iha duvidas, ida ne’e sei lori ba tribunal rekursu, para tau ita nia duvidas no labele kontinua halo buat at tanba kampanna hotu ona, agora tempu atu ita respeita povu nia votu”, hateten Marí

Liu hosi konferensia iha hotel Ramelau, 12/05 Marí Alkatiri reafirma katak komprimisiu partidu rua ne’e nafatin. Partidu rua ne’e tun ba baze no lori programa VII Governu nian, “idak-idak hatoo nia visaun maibe ho programa VII governu nian. Ami la lao hamutuk tanba partidu rua ne’e ho nia identidade rasik no laiha aliansa, mais aliansa ne’e laos ho suratahan maibe aliansa ne’e ho komprimisiu entre organizasaun tanba iha vontade atu responde povu nia ezijensia, iha vontade atu serbi ba povu”.

Apelu ba povu nafatin tur hakmatek, labele reazen ho emosaun ba rezultadu ne’ebe sei fo sai, hamutuk hodi selebra demokrasia ne’ebe iha, laos atu sobu fali demokrasia ne’ebe iha.

Iha fatin hanesan Asanami hateten ohin loron ne’e povu nian tanba povu idak-idak hamrik hodi ezejerse sira nia votu. Agredese ba padre, madre no amo Bispo ne’ebe halo orasaun. Votus iha VII governu nian, ne’e votus hakmatek nian. Ita hotu respeita vontade votu nian no ita hein nia rezultadu.

Asanami mos apresia partidu no koligasaun sira hotu ne’ebe mak tuir kampanna,“ukun ne’e povu nian, ohin ia fo konfiasa ba se deit, militantes no simpatizantes PD nina nafatin hakmatek no simu rezultadu”.

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *