Saturday , May 25 2019
Home / Eleisaun Parlamentar / Fretillin, PD ho KHUNTO Besik Ona Asina Akordu Koligasaun
Partidu Fretilin, KHUNTO no PD halo enkontru kona ba dokumentus ba koligasaun iha Sede Fretilin.[Foto: Zevonia Vieira | TAFARA.TL | 11.09.2017].

Fretillin, PD ho KHUNTO Besik Ona Asina Akordu Koligasaun

Hafoin remata enkontru ho partidu PD no KHUNTO, Adjuntu Sekretariu Jeral Fretilin, Jose Reis ba jornalista sira esplika katak Fretilin halo inisiativa hodi konvida fali parseiru hosi koligasuan, PD no KHUNTO, atu bele haree fila fali dokumentus koligasaun.

Tuir informasun hosi Jose Reis liu hosi enkontru refere, Sekretariu Jeral Fretilin, Dr.Mari Alkatiri fo hanoin katak estrutura ne’e tenke efetivu liu, no Fretilin entrega dokumentus atu nune’e PD no KHUNTO bele haree fila fali. Se laiha buat ruma, aban bele iha buat ruma, partidu tolu sei bele asina akordu de koligasaun final.

Hatan ba perguntas hosi TAFARA.TL kona ba dokumentu importante ne’ebe sei koalia hamutuk entre partidu PD, KHUNTO no Fretilin, Jose Reis hatan katak koalia nafatin kona ba prinsipiu, katak ho prinsipiu proporsionalidade, meritu ne’ebe ezizi iha koligasaun, partilhas responsabilidade ba programas, ida ne’e mak koalia hamutuk.

“Ami mos koalia kona ba harii orgaun ida iha koligasaun, orgaun de kordenasaun para atu bele funsiona koligasaun hanesan reuniaun ordenariu no extraordinariu ne’ebe mak sei mai, para atu bele konsentra nafatin, hanoin hamutuk kona ba leis ka programas ne’ebe koligasaun sei hamutuk atu defende iha parlamentu nasional”, esplika Jose Reis.

Hosi parte sorin Prezidente Partidu Demokratiku, Mariano Asanami Sabino ba TAFARA.TL hateten katak liga ho asina akordu ba koligasaun, hosi PD nafatin kaer metin palavra de ordem katak ba o Timor ami sei prontu serbi.

“Ami mantein ami nia komprimisiu no prontu serbi, tanba ne’e la ezizi no la husu, ami so iha deit komprimisiu katak ita presiza fo kontinuasaun ba governasaun ne’ebe durante ne’e Timor oan kaer.  Tanba ne’e laos hare se mak bele, maibe saida mak ita bele, halo ba ita nia rai no povu, atu nune’e povu ne’e bele sente moris dignu iha sira nia rai, labele iha tan diskriminasaun iha future, ba funsionariu, PNTL, FFDTL. Hosi instituisaun publiku sira ne’e bele serbi tuir duni sira nia knaar, ema idak-idak mos mosu mai tuir duni sira nia kapasidade no meritu duni”, tenik Asanami.

Asanami afirma liutan katak liu hosi diskusaun no dokumentus ne’ebe iha, hamosu ona konkordansia ida, no partidu idak-idak sei haree dokumentus ne’e sei hasoru malu tan.

Asesor Politika partidu KHUNTO, Jose Tokoluli Turquel, responde ba perguntas hosi TAFARA.TL katak kona ba espetativa hosi KHUNTO rasik ba formasaun koligasaun.

Turquel hateten katak, partidu menus votadus mak KHUNTO, maibe iha prosesu ida ne’e KHUNTO nia lian maun boot sira rona.

“KHUNTO hato’o buat importante katak, Timor-Leste ne’e pais postu konflitu tanba ne’e importate atu iha konsentrasaun ba ideas, vizaun atu haree Timor ba oin ne’e, Timor ida oinsa. Entaun presiza komponente nasional hotu atu hasoru malu.

Konsensus politika sei iha prosesu, ami simu dokumentu esbosu, ami sei halo apresiasaun depois ami sei responde kada item”, esplika Jose T. Turquel.

Tuir esplikasaun hosi lideransa partidu sira, hafoin remata enkontru iha CCF Lurumata, loron 11/09, iha tempu badak nia laran akordu final ba koligasaun sei realiza.* [Zevonia Vieira | TAFARA.TL |Editor: Ato ‘Lekinawa’Costa | 11.09.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *