Monday , March 25 2019
Home / Opini / FUNÇÃO DEPUTADO/A PARLAMENTO NACIONAL SERVI BA POVU KA SERVI KARETA PRADO?
Hakerek nain, Moisés Vicente, Alumni Universidade da Paz-(UNPAZ), Faculdade de Direito, 2008

FUNÇÃO DEPUTADO/A PARLAMENTO NACIONAL SERVI BA POVU KA SERVI KARETA PRADO?

Perguntas iha leten husu ba na’in Deputadu/a sira ne’ebé tur iha Parlamentu Nacional atu halo reflesaun didiak. Hodi se mak imi tur iha orgaun soberanu Parlamentu Nacional? La’os lori povu nia naran mak imi tur iha Parlamentu ka imi foti an mesak mak tur iha Parlamentu Nacional ne’ebá?. Iha semana hirak liubá kotuk iha fulan hirak liubá, massa Movimentu Universitáriu Timor-Leste (MUTL), Sosiedade Cívil iha rai laran no sidadaun sira seluk tan la konkorda orgaun soberanu Parlamentu Nasional sosa kareta foun ba membru Deputadu PN, tanba gasta deit orsamentu. Tanba gasta osan ne’e solin hanesan bee, tanba osan orsamentu Estadu ninia ne’e mai husi fonte ida deit rekursu Mina Rai nian. Enkuantu mina rai ne’e maran atu foti fali osan ne’e husi ne’ebé?. Estadu Timor-Leste ne’e gadai ona tanba ne’e maka ami sidadaun sira la konkorda atu sosa kareta Prado foun ba membru PN, maibé trata uluk lai kareta sira ne’ebé iha ona trata tiha lai ba, depois mai hatama Patrimoniu Estadu ninia cek tiha lai bainhira kareta ne’e nia kondisaun la diak halo fiskalizasaun duni no bele hare fali kareta seluk.

Função orgaun soberanu Parlamentu Nacional nian ne’e klaru ona ne’ebé hakerek iha ita nia Constituição da RDTL Artigu 92 hatete nune’e: Parlamentu Nasionál mak órgaun soberania Repúblika Timór-Leste nian ne’ebé reprezenta ema Timór-oan tomak, iha kbi’it atu halo Lei, atu Fiskaliza no atu halo Desizaun Polítika. (O Parlamento Nacional é o órgão de soberania da República Democrática de Timor-Leste, representativo de todos os cidadãos timorenses com poderes legislativos, de fiscalização e de decisão política). Nomos iha Constituisaun RDTL Artigu 95 no seluk-seluk tan. Sosa kareta prado foun ba Parlamentu Nacional la’os buat foun ida iha tinan ida ne’e, maibé hahu kedan iha tinan 2008 até mai to’o agora (2018) estudante Universitáriu kontinua hakilar ba kareta Prado ida ne’e. Tuir lolos na’i Deputadu/a sira kareta prado sira ne’ebé mak at ba hadia deit, maibé sira la ba hadia sira ba troka tiha. Se sira (Deputadu/a) foun sira rona informasaun katak Deputadu tuan sira halo lelaun tiha kareta prado tuan, entaun Deputadu foun sira tenke kontinua halo investigasaun.

Deputadu/a Parlamentu Nasional foun tenke haka’as an halo investigasaun ba hato’o keixa ba Polísia ba buka tuir no PN foun la iha vontade atu trata asuntu ne’e. Agora dadaun orgaun soberanu PN sira maka tenke hanorin ninia sidadaun sira oinsa maka atu moris ho simplesidade ka moris ho bai-bain deit, se salariu hanesan ne’e, to’o ona salariu hanesan ne’e lalika buka tan ida seluk. Estudante Movimentu Universitáriu Timor-Leste sira ne’ebé mak ho aten brani sakrifika sira nia estudu, tuir lolos estadu kria kondisaun ida diak atu sira labele lakon tempu ba halo asaun, maibé kria kondisaun diak para aban bainrua bele sai futuru lideransa ne’ebé diak, mais tanba injustisa sosial ne’ebé mak mosu iha ita nia lideransa estadu nian entaun sira tenke salva patrimoniu riku soin Povu Maubere nia ida ne’e.

Iha Parte seluk, hau nia observasaun iha loron Sesta-Feira, 9 Novembru 2018 lamenta tebes atuasaun oknum Polícia Nacional Timor-Leste (PNTL) halo brutalizmu ba membru Movimentu Universitáriu Timor-Leste (MUTL) ne’ebé halo demonstrasaun kona-bá kareta prado iha kampus UNTL nia oin. No oknum PNTL hapara direita demonstrasaun ne’e ho tiru direita gas air mata ba kampus UNTL laran. Iha momentu ne’ebá oknum PNTL halo mos agresaun fisika ba membru MUTL rasik hodi rezulta kanek estudante nain tolu (3), mane rua no feto ida hetan kanek todan. No loron Sesta ne’e membru PNTL kaptura membru MUTL hamutuk 22 pessoas, tama Sela PNTL, Caicoli, Dili, durante 72 horas. Atuasaun ida ne’e membru Polícia Nacional Timor-Leste aplika atuasaun la ho profesionalismu no hatudu karater bandalizmu nian. Husu ba Instituisaun PNTL, liliu Komandante Eskuadra PNTL sira dehan ba Membru PNTL sira labele halo violasaun Direitus Umanus ba ema seluk arbiru deit no atu le’e didiak ita nia Constituisaun da RDTL iha Artigu 147 hatete: 1. Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku. 2. Prevensaun kriminál tenke hala’o ho respeitu ba direitus umanus. 3. Lei maka sei harii rejime ba polísia no mós forsa seguransa seluk. 1. A polícia defende a legalidade democrática e garante a segurança interna dos cidadãos, sendo rigorosamente apartidária. 2. A prevenção criminal deve fazer-se com respeito pelos direitos humanos. 3. A lei fixa o regime da policia e demais forças de segurança. Graça adeus, iha loron Segunda 12 Novembru 2018 Juiz sira no Advogado Privadu iha Tribunal Distrital Díli (TDD) liu husi dezisaun ba primeiro interogatoriu aplika deit ba membru Movimentu Universitáriu Timor-Leste (MUTL) hamutuk 22 pessoas hetan liberdade no hetan deit Termu Indentidade Rezidensia (TIR).

Ikus liu, rekomendasaun hau nian mak ne’e husu ba orgaun soberanu Parlamentu Nacional (PN) diak liu kareta prado tuan sira ne’ebé sei uza hela iha tinan kotuk liubá kareta prado ne’e sei diak hela diak liu membru PN ba foti fila-fali. Se PN hakarak kontinua sosa kareta prado foun diak liu ba sosa deit Motorizada foun, ka kareta Hilux, Kijang, Avanza deit nune’e ladun gasta orsamentu bo’ot liu no fasil atu tunba halo fiskalizasaun iha baze teriotoriu nasional Timor-Leste. Duque uza kareta prado, uza tan vidru metan, dala ruma populasaun iha baze mos la kuiñese tan. Durante tinan barak nia laran, tuir hau nia observasaun finde semana halo fali kontaktu eleitor deit iha baze, la ba halo fiskalizasaun ida iha baze ne’ebá. Rekomenda mos ba Prezidente Republika (PR) se PN kontinua aprovado orsamentu sosa kareta prado foun, diak PR veta tiha orsamentu 2019 kona-bá sosa kareta prado foun nian ne’e. Nune’e orsamentu sosa kareta prado foun ida ne’e bele tau fali iha Ministeriu seluk, bele ba iha Ministério da Educação, Saúde, Infra-estruktura, Agricultura, Bee mos no seluk-seluk tan. Antes hau taka opinião ida ne’e musika Iwan Fals dehan nune’e: “Wakil Rayat Seharusnya Merayat Jangan Tidur Waktu Sidang Soal Rayat”.

Referénsia:

  1. Sosiedade Sívil La Konkorda PN Sosa Kareta Foun. Disponivel asesu iha loron 5 de Novembru de 2018. https://timoragora.blogspot.com/2018/11/sosiadade-sivil-lakonkorda html?fbclid=IwAR13Wtb_zUf15rNIatxzk9_8uLtKV2YOWkScF1zbDUOBHJELS9w59bBmyqs.
  2. MUTL-PN Hasoru Malu Kansela Sosa Prado. Disponivel iha loron 6 Novembru 2018. https://www.smi-tl.org/notisia/breaking-news/812-mutl-pn-hasoru-malu-kansela-sosa-prado?utm_source=dlvr.it&utm_medium=facebook.
  3. FONGTIL: Atuasaun PNTL ho Karater Bandalizmu hasoru Membru MUTL . Disponivel asesu iha loron 14 Novembru 2018, Jornal INDEPENDENTE.
  4. Prezidente Republika (PR) Lu-Olo: MUTL La Sala Halo Demonstrasaun. Disponivel asesu iha loron 14 Novembru 2018, Jornal Diario Nacional.
  5. FONGTIL: Atu Keisa PNTL Brutal Hasoru Manifestante MUTL. Disponivel asesu iha loron 14 Novembru 2018, Jornal Diariu Timor-Post.
  6. Reitór Universidade Nasionál Timor Lorosa’e (UNTL), Francisco Miguel Martins konsidera asaun Movimentu Universitáriu Timor-Leste (MUTL) ne’e tanba Liberdade Expresaun, ne’ebé garante mós iha ita-nia Konstituisaun da RDTL. Disponivel asesu iha loron 13 Novembru 2018. http://www.tatoli.tl/2018/11/konstituisaun-prevee-liberdade-espresaun/?fbclid=IwAR33uVmmc-_R9Ez4VDgRp8YvKaIG jq6s9paybQrlfyOGEt8d60n9NVVQOs.
  7. Lagu Iwan Fals Kritik Wakil Rakyat – Surat Buat Wakil Rakyat. Disponivel asesu iha loron 13 Novembru 2018. https://www.youtube.com/watch?v=QraUIQbMdFw.
  8. Tribunal Distrital Díli (TDD) Aplika TIR ba Membru MUTL 22. Disponivel asesu iha loron 13 Novembru 2018, Jornál Suara Timor Lorosae.
  9. Prezidente Repúblika (PR), Francisco Guterres Lú Olo, konsidera Movimentu Universitáriu Timor-Leste (MUTL) ne’ebé iha semana kotuk halo manifestasaun hasoru membru Parlamentu Nasionál kona-ba kestaun sosa Prado ne’e la sala. Disponivel asesu iha loron 14 Novembru 2018,https://timoragora.blogspot.com/2018/11/pr-konsideramutlPpmY_lImkOsooFixdqUQjFlwuzyfJPwk.

*Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Hakerek Na’in Alumni Faculdade de Direito, Universidade da Paz, Díli, (2008). Iha sujestaun ruma bele haruka iha e-mail: moisesvicente.mahein@gmail.com. * [ Moisés Vicente | TAFARA.TL | 17.11.2018]  

About Moisés Vicente

Check Also

Patriotismo constitucional atu hari’i “cultura democrática”: Tetu no sukat “veto e promulga”

Loron hirak ne’e ema barak mak sukit lei, tetak constituição no hari’i ninia argumento rasik …

Leave a Reply

Your email address will not be published. Required fields are marked *