Friday , January 18 2019
Home / Opini / G7+, Emilia Pires & Korupsaun

G7+, Emilia Pires & Korupsaun

Diskusaun ne’ebe halao iha TVE (16/11/2018) hau foti kestaun korupsaun ne’ebe la explisitamente temi iha dokumentu New Deal. Ba pontu ida ne’e, Sekretariu Jeral g7+, Helder da Costa, hatete katak ida ne’e asuntu sensitivu tebes iha estadu frajil sira. Karik tanba ida ne’e duni mak kazu sira ne’ebe relasiona ho hafraku seitor justisa, inklui aktu ne’ebe figura eminente g7+ hanesan Emilia Pires halo nunka sai diskusaun iha g7+. Artigu ne’e hakarak uza kazu Emilia Pires nian hodi liga ho servisu g7+, liliu halo diskusaun tuir koridor Peace Building and State Building Goals (PSGs) nian, liliu meta ida liga ho Justisa nian.

Korupsaun konsidera nudar krimi exraordinariu iha estadu Timor-Leste. Krimi korupsaun bele halo estadu monu ba estadu frajil, no loke dalan ba estadu falladu. Nasoens Unidas (ONU) konsidera korupsaun nudar obstaklu uniku mak bot liu ba dezenvolvimentu ekonomia no sosial. Tanba korupsaun estraga fundasan instituisaun demokratiku nian, destroi lei no orden no halo burokrasia nia existensia atu serbii ema sira mak iha poder (rekursu no politik).

Ba g7+ korupsaun la temi explisitamente iha dokumentu New Deal laran, karik tanba razaun mak Helder da Costa dehan, “asuntu sensitivu iha estadu frajil sira”, maibe korupsaun nudar elementu ida hosi Transparensia no Akuntabilidade , ka parte ida hosi prinsipiu save iha TRUST (Transparency, Risk-sharing, Strengthen country systems and capacities and Timely predictable aid), iha g7+. Iha g7+ aplikasaun prinsipiu TRUST ne’e fo konsiderasaun liu ba utilizasaun sistema nasaun estadu frajil nian.

Emilia Pires ho kazu korupsaun

Bainhira haree ba prisipiu TRUST iha g7+, no halo leitura ba kazu Emilia Pires nian, bele nota katak Emilia Pires lao dok no lao sai hosi saida mak nia rasik inisia, promove no Elder da Costa halo advokasia ba.

Emilia Pires mak figura importante ida iha governo Timor-Leste tinan tolu liuba. Nia mak nudar Ministra Finansas no mos pioneru ida no lidera ba g7+ no promotor ba New Deal. Maski nune’e, saida mak Emilia Pires halo iha nia servisu lakon hotu derepente, bainhira mosu kazu korupsaun ne’ebe involve mos Emilia Pires nia kaben.

Iha 2012 mosu alegasaun ida hasoru Emilia Pires, momentu neba nudar Ministra Finansas iha IV Governo Konstitusional. Alegasaun ne’e akontese tanba Emilia Pires, nudar Ministra, aprova pagamentu ba ninia katuas oan, Warren Mcleod, nia kompania. Iha aktu ida ne’e, diskonfia katak Ministra Emilia viola Lei Sistema Aprovisionamentu nian, liliu relasiona ho konflitu de interese.

Tuir informasaun mak publika iha temposemanaltimor.blogspot.com katak quotasaun ne’ebe Warren Macleod, Diretur ba kompania Mac’s Metalcraft, hosi item numeru ida to’o numeru lima ba kustu US$895,140.00 ne’ebe defini nudar kategoria projetu emerjensia nian, tanba ne’e mak Ministeriu Saude entrega deit ba Emilia Pires nia katuas oan, sein liu hosi prosesu tenderizasaun. Osan ne’ebe alokadu ona atu sosa kama ba pasiente iha Hospital Guido Valadares, Dili.

Iha notisia hanesan, sita statementu hosi Adjunto Komisariu Anti Korupsaun, Jose Antonio de Jesus das Neves, ne’ebe hatete katak bainhira ministra ida labele halo diferensa kona ba konflitu de interese entaun ministra ne’e viola ona lei. Iha kazu ida ne’e viola lei tanba atu uza single source ba projetu ida presija halo tuir lei prokuradoria nian.

Iha julgamentu ne’ebe halo ba Emilia, Juiz sira fo sentensa Emilia ba tinan 7 nia laran (independente.tl, 31/01/2017). Iha publikasaun mak hanesan, Emilia hatete katak Juiz Tribunal Timor-Leste nian la hatene Portuguese no la kompentente ho sistema legal. Emilia fo razaun katak Juiz sira la uza faktu hodi halo julgamentu.

G7+ ho Emilia Pires

Hosi inisu kedas Emilia Pires mak ema ne’ebe inisia no promove makas establesmentu g7+. Iha intervista ida ne’ebe Emilia Pires fo ba theglobalobservatory.org, nia hatete katak New Deal mak prosesu ida atu halo mudansa ba politika global nian. Ho gava an uituan, Emilia hatete katak, Timor-Leste muda nia hahalok ona, tanba ne’e Timor-Leste tenke muda mos doadores sira nia hahalok. Maibe nia mos hatete katak muda doadores nia hahalok susar tanba doador sira kesi an ba sira nia estadu nia politika mos.

Iha intervensaun seluk ida, iha Inaugural Harold Mitchell Development Policy Lecture, Timor-Leste and the New Deal for Engagement in Fragile States, iha Australia National University, 2012, Emilia Pires hato’o ninia speech kona ba Timor-Leste and the New Deal for Engagement in Fragile States. Iha nia intervensaun, Emilia koalia kona ba progresu dezenvolvimentu Timor-Leste nian, inklui temi kona ba establesmentu Komisaun Anti Korupsaun no introdus prosesu tenderizasaun ida transparente ba projetu infraestrutura sira.

Iha publikasaun seluk ida, iha sitiu Minsteriu Finansas nian (mof.gov.tl), ho titlu Building Peaceful States Against All Odds: The g7+ Lead the Way, Emilia Pires halo kritika makas ba doador sira. Nia kritika sira ne’e mesak relevante, maski buat balun exazeradu uituan.

Emilia hatete katak, “se ita (nasaun frajil sira) iha vizaun diak kona ba tulun doador nian, hau fiar ita sei iha estrada, eletrisidade, bee no saniamentu”. La hatene oinsa mak Emilia Pires bele hanoin katak ho vizaun diak kona ba tulun doador nian, sasan sira ne’ebe nia temi ne’e bele akontese ona. Emilia Pires pernah servisu ho Banku Mundial, antes tama ba servisu ho governo iha 2007. Banku Mundial mak instituisaun doador ida mos ba Timor-Leste. Saida mak Emilia Pires halo bainhira servisu nudar staff senior iha Banku Mundial, Asesor iha UNMISET no Ministeriu Finansas, hodi muda ajenda doador nian? Tanba saida mak Emilia Pires foin hanoin katak iha importansia atu muda politik doador nian bainhira tama ba servisu ho governo?

Buat balun ne’ebe Emilia Pires hatete inklui doador sira mak fo apoio ba Timor-Leste hakat liu deit ajenda estadu nian no buka atinji deit doador sira nia ajenda, hodi fornese servisus dereitamente ba povo. Dala barak sira halo ida ne’e ho koinesementu governo nian no mos konsentementu governo nian. Emilia hatete katak atitude doador sira ne’e hafraku lejitimidade governo no kauza fragmentasaun ba dezenvolvimentu. Tanba ne’e Emilia, lori gabinete governo nia naran hatete katak politika inkluzivu tenke globaliza uluk antes lokaliza.

Tanba ne’e, bainhira koalia kona ba harii dame, iha perspetiva g7+ nian, Emilia Pires hakarak hatete katak presija politika ida inkluzivu, seguransa no justisa. Maibe saida mak akontese iha pratika. Emilia Pires ho nia kazu ne’ebe konsidera nudar korupsaun ho ninia aktu halai ses hosi justisa kontinua halo fraku sistema justsia ita nian.

Emilia Pires Nia Hahalok Liga ho PSGs

G7+ hatur meta importante 5 ne’ebe nudar Peace Building and State Building Goals (PSGs). Meta PSGs ne’e mak Politika mak lejitimu no inkluzivu, Seguransa, Justisa, Fundamentu ekonomia ho Rendementu no Servisus. Iha g7+ mos dezenvolve indikador sira hodi sukat progresu hosi statutu frajilidade ba statutu rezilensia. Iha 2015, bainhira g7+ halo avaliasaun ba Timor-Leste nia situasaun frajilidade, liliu iha parte Justisa, g7+ konklui katak Timor-Leste nia situasaun justisa tama hela iha faze segundu hosi statutu frajil nian, ne’ebe signifika sei harii no reforma hela (Build and Reform).

Se karik depois de Tribunal fo sentensa ba Emilia Pires mak g7+ halo fali avaliasaun, entaun bele hetan katak situasaun Justisa, parte ida hosi meta PSG nian, bele sai aat liutan tanba aktu ne’ebe Emilia Pires ho maun bot Xanana Gusmao halo. Tribunal kondena tiha ona Emilia Pires halo koluio tanba involve iha projetu fornese kama pasiente nian ba hospital. Kazu ne’e akontese tinan 3 antes Helder da Costa, Sekretariu Jeral g7+, halo aprezentasaun kona ba statutu frajilidade Timor-Leste nian iha Bangkok, Thailand, iha 2015. Saida mak Emilia halo kontribui hodi hafraku liutan prosesu ba atinjimentu metas iha PSGs. Tanba Emilia Pires la hakruk ba prosesu justisa mak lao iha estadu ida ne’ebe, Emilia hamutuk ho ninia servisu maluk sira fo naran nudar estadu frajil. Aat liutan, iha momentu ne’eba, Emilia Pires hatete ho momoos katak Juiz sira la kompetente, hafoin Emilia halai ses hosi sistema justisa Timor-Leste nian. Momentu ne’eba, Tribunal mos husu ba Parlementu Nasional atu halo levantamentu imunidade Emilia Pires nian maibe Parlementu Nasional la foti asaun ne’e.

Tinan 2 depois kazu Emilia Pires nian hahu prosesa dadaun hela iha Ministeriu Publiku, maun bot Xanana Gusmao, nudar Premeiru Ministru iha tempu ne’eba koalia ba publiku, liu hosi TVTL, iha 4 Novembru 2014, iha oras ida resin nia laran, esplika kona ba frakeza seitor justisa nian no ninia impaktu ba dezenvolvimentu ekonomia. Maun bot mos justifika aktu governo hodi duni sai Juiz nain 5, Prokurador nain 2. Maioria sira hotu ema Portugal. Maun bot Xanana mos haruka karta ba Presidente Parlementu hodi husu ba Parlementu Nasional labele hasai imunidade membru governo sira nian.

Iha 25 Janeiru 2017, maun bot Xanana Gusmao mos hakerek karta hodi fo apoio ba Emilia no halo intervensaun ba sistema justisa no hatete katak sira ne’ebe servisu iha Tribunal la komprende saida mak estadu ida no hatete momoos katak saida mak Tribunal halo ne’e pratika injustisa. Agora dadaun maun bot Xanana Gusmao mos asumi kargu nudar Pesoal Eminente g7+ nian.

Aktu rua mak loloos ne’e la tuir ona meta PSGs iha g7+ nian, liliu parte Justisa nian. Aktu ne’ebe Emilia Pires ho maun bot Xanana Gusmao halo konsidera hafraku liutan sistema justisa. Tuir Emilia Pires nia intervensaun iha Australia National University, 2012, Emilia hatete katak, “Ba Timor-Leste Justisa signifika aproximasuan bazeia ba equidade ba ema hotu hodi hateke ba oin hodi implementa pratika diak, justisa sosial, justisa ekonomia no mos justisa lejislativa”.

Iha PSGs, Indikador bot 3 ne’ebe hola parte ba Justisa nian mak;1) Dezempenamentu no Independensia Instituisoens Justisa; 2) Kapasidade Institusoens Justisa, no; 3) Asesu ba Justisa. Kazu Emilia Pires nian hatudu momoos katak nia la halo tuir saida mak nia fiar no nia koalia bebeik iha eventu sira g7+ nian. Aktu ne’e hafraku independensia sistema justisa, no halo aat liutan fiar ema babain nian ba sistema justisa. Nune’e halo klean liutan estatuta frajilidade estadu nian. Ho saida mak akontese, g7+ sai ona nudar instituisaun ida ne’ebe neneik sei lakon ninia kredibilidade tanba ema sira ne’ebe inisia no apoio inisiativa g7+ la aplika saida mak sira ‘omilia’ bebeik.

***Hakerek nain ativista RENETIL, no artikel ne’e opiniaun pesoal, la reprezenta instituisaun mak hakerek nain hakna’ar an ba. [ Ato ‘Lekinawa’ Costa | TAFARA.TL | 09.11.2018]

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Hakotu Siklu Violensia no Dezenvolve PNTL, Halo Tuir Rekomendasaun CHEGA!

Timor-Leste kontinua monu ba hahalok violasaun dereitus umanus. Membru Polisia Nasional Timor-Leste (PNTL) ne’ebe mak …

Leave a Reply

Your email address will not be published. Required fields are marked *