Saturday , May 26 2018
Home / Sosial & Politika / Governu Deside Selu Tusan Hosi BM no BDA, Rui: Penalidade aas se TL la kumpri dever, sei tama iha lista metan
Konselho Ministru VII Governu Konstituisional. [Foto: Media Gabinete Primeiru Minstru]

Governu Deside Selu Tusan Hosi BM no BDA, Rui: Penalidade aas se TL la kumpri dever, sei tama iha lista metan

“Penalidade aas tebes wainhira Timor-Leste la kumpri ninia dever, inklui tama iha lista metan (black list), la simu tan grant, osan emprestimu kansela tiha, la bele husu tan osan empresta, no seluk tan. Ho penalidades sira ne’e, naran Timor-Leste sai aat no klima ba investimentu sei la favoravel ba Timor-Leste rasik”. Rui Gomes

Relasiona ho tusan ne’ebe governu anterior iha, liu hosi Konselho Ministru VII Governu Konstituisional, iha loron 7/02 foti desizaun atu selu tusan, hosi Banku Mundial [BM] no Banku Dezenvolvimentu Aziatiku [BDA].

Liu hosi komunikadu imprensa ne’ebe fo sai hosi Gabinete do Secretario de Estado do Conselho e da Comunicação Social, iha loron 12/02 esplika katak

tuir akordu entre Timor-Leste ho instituisaun sira ne’ebé fó tusan, Timor-Leste tenke selu osan inan (principal loan) no ninia funan (interest). Iha tinan 2018, Governu Timor-Leste tenke selu tusan hamutuk USD 894.171,41 ne’ebé kompostu husi selu osan inan USD 265.242,55 no selu osan funan USD 628.827,86.

Iha komunidaku imprensa, Ministtru Planu no Finansas, Dr. Rui Gomes afirma katak, nudar nasaun ne’ebé halo tusan, tinan-tinan Timor-Leste tenke selu osan inan no funan, sei la selu sei kona multa no sansaun seluk.

“Penalidade aas tebes wainhira Timor-Leste la kumpri ninia dever, inklui tama iha lista metan (black list), la simu tan grant, osan emprestimu kansela tiha, la bele husu tan osan empresta, no seluk tan. Ho penalidades sira ne’e, naran Timor-Leste sai aat no klima ba investimentu sei la favoravel ba Timor-Leste rasik”, informa Rui Gomes

Rui Gomes hatutan katak, pagamentu ba Timor-Leste nia tusan husi ADB no WB ne’e tinan-tinan tenke halo dala rua, iha loron 15 fulan Marsu no loron 15 fulan Setembru. Tinan kotuk, 2017 Timor-Leste kumpri ninia dever selu tiha ona ninia tusan hamutuk USD 1.305.000 (osan inan no funan ka interest).

Timor-Leste halo tusan husi liur (foreign debt) hahú iha tinan 2012, ne’ebé halo husi instituisaun Japan International Cooperation Agency [JICA] ka Ajénsia Kooperasaun Internasionál Japaun nian hamutuk USD 47.000.000, hodi finansia konstrusaun estrada Díli – Baucau no husi ADB USD 40.000.000 hodi finansia konstrusaun estrada Díli – Liquiça no Tibar – Gleno.

Iha tinan 2013 halo tusan husi ADB USD 50.000.000 ba konstrusaun estrada Manatuto-Natarbora no husi Banku Mundiál USD 40.000.000 ba konstrusaun estrada Dili-Ainaro. Tinan 2015 halo tusan husi ADB USD 12.000.000 hodi halo konstrusaun estrada Tasi Tolu-Tibar. Iha tinan 2016 halo tusan husi ADB USD 76.000.000 ba konstrusaun estrada Baucau-Lautém, Maubara-Karimbala, no Atabae – Mota Ain. Iha tinan 2016 mós halo tusan husi ADB USD 50.000.000 ba konstrusaun estrada Dili-Baucau. Ikus liu mak iha tinan 2017 halo tusan husi Banku Mundiál USD 35.000.000 ba konstrusaun estrada Laulara-Solerema. To’o ikus tinan 2017, Timor-Leste nia tusan hamutuk USD 350.000.000. *[Zevonia Vieira | TAFARA.TL | 13.02.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Ran Ema Ida nian, Sei Salva Ema Ida nia Vida

Importante ida ba hau, e hau bele salva hau nia an mos no mos bele …

Leave a Reply

Your email address will not be published. Required fields are marked *