Monday , December 10 2018
Home / Sosial & Politika / Governu Lansa Politika Zero Plastiku, Sei Hapara Importasaun Saku Plastiku
kampanne konaba impaktu lixu plastiku ba ambiente liu-liu ba rai no bee. [Foto: copyrigt google | 09.10.2018]

Governu Lansa Politika Zero Plastiku, Sei Hapara Importasaun Saku Plastiku

Dadus hosi Asian Development Bank [ADB] hatudu katak kada ema ida iha Dili, loron oda produs lixu 0.7 kilograma lixu. Loron ida iha sidade Dili produs 190 toneladas lixu.

UNDP no Embasada Nova Zelandia servisu hamutuk ho VIII Governu Konstituisional hodi lansa politika zero plastiku no programa pilotu resiklaveis iha Suku Motael.

Iha fatin lansamentu, Diretora Nas Controlu Poluisaun e Impkatu Ambiental Amenica Machado Fernandes hatan ba TAFARA.TL konaba signifikante hosi zero plastiku katak ne’e atu hapara uza tipu plastiku iha Timor-Leste? Diretora Amenica hatan katak Zero plastiku ne’e nudar asaun ida hodi hamenus lixu, tanba lixu plastiku ne’e nudar lixu ne’ebe fo impaktu negativu boot, tanba ne’e presiza hanoin oinsa atu redus lixu, laos signifika atu halakon maibe atu redus, maibe asaun ida oinsa atu kombate lixu.

Diretora Amenica informa mos katak agora dadauk governu halo ona sirkulasaun ka nota sirkular no.2/MCAE/GSEA/X/2018, hodi fo informasaun katak iha tempu badak sei halo moratorium no hapara importasaun plastiku.

“Fo atensaun ba ema hotu, durante ne’e ita uza liuliu imprezariu, loza no kios sira oinsa bele prepara an, hodi kria saku alternativa ida, hodi nune’e plastiku ne’ebe ita hapara ona, ita iha ona saku alternativa hodi bele utiliza. Plastiku ne’ebe atu hapara importasaun mak plastiku kresek ka saku plastiku [plastic bag. red] tanba buat sira ne’e hotu hapara mos, ita presiza kria asaun alternativa ida”, esplika Amenica

Iha Nota Sirkular rasik esplika katak iha inisiu 2019, Governu Timor-Leste sei hasai diploma ba moratoriu ka bandu importasaun no uza saku plastiku, hosi plastiku konvensional no produtu single used [uza dala ida. Red] plastiku sterioform hanesan falun hahan no derivadu plastiku.

Hosi lansamentu zero plastiku ne’ebe halao iha suku Motael, governu mos halo ona faze konsultasaun ho imprazariu sira konaba atu halo produsaun saku alternative. Tuir Diretora katak, durante ne’e halao ona levantamentu dadus halo survey ba iha loza sira no mos konsumedor sira, no sira prontu atu uza salu alternativa

Liu hosi programa lansamentu, Vice Ministru da Administração Estatal e do Ordenamento Territorial, Abilio Caetano hatoo deskursu katak Wainhira lixu aumenta fo ameasas makaas ba saude no ambiente ne’ebe la saudavel no sustentavel, no hamenus oportunidade ba dezemvolvimentu seitor turismo iha Timor-Leste.

“Presiza esforus ne’ebe adekuadu no sustentavel hodi nune’e bele uza metodologia hanesan redus, reuza no resiklazen, hodi ita redus kuantidade lixu iha Tibar, nune’e fatin lixu iha Tibar bele uza ba iha tempu naruk”, hateten Abilio iha sede suku Motael, 09/10.

Vice Ministru mos rekonnese katak governu rekonnese importansia hosi kuantidade lixu, liu hosi programa resiklazen ne’ebe elabora ona iha various dokumentus politiku governu nian. Hosi tonelada lixu ne’ebe diaramente produs iha Dili 18% iha forma de suratahan, 18% seluk formas de lixu plastikus, 32% lixu matak, ne’e signifika katak 68% lixu iha sidade Dili maka bele halo fali resiklazen, tanba material sira hanesan suratahan, plastiku no lixu matak bele transforma fali ba utilidade seluk.

Iha tinan 2016 Ministério da Administração Estatal e do Ordenamento Territorial servisu hamutuk ho UNDP, hodi implementa programa pilotu resiklazen iha suku Motael no nia susesu sei bele haluan ba iha suku sira seluk iha municipio Dili.

Tuir Vice Ministru Abilio katak programa ne’e realizadu iha ambitu tolu mak hanesan kampanna sensibilizasaun hodi hasae konnesementu no apoiu hosi komunidade sobre materia resiklazen no realiza segigrasaun lixu iha sira nia hela fatin. Realiza kampanna mudansa hahalok iha komunidade nian sobre importansia hosi resiklazen no estabele estratejia hodi resolve, hodi involve seitor privadu, hodi partisipa ativamente atividade resiklazen nian.

Programa pilotu ida ne’e mos tenta atu hadia padraun moris komunidade urbanu nian iha Dili, liu-liu iha suku Motael, sei bele fo benefisiu direitamente ba uma kain sira.

Dadus hosi Asian Development Bank [ADB] hatudu katak kada ema ida iha Dili, loron oda produs lixu 0.7 kilograma lixu. Loron ida iha sidade Dili produs 190 toneladas lixu.

Jestor ba Programa Pilotu Zero Plastiku Iha UNDP, Reinaldo Soares ba TAFARA.TL esplika katak baze ba auditoria hosi Asian Development Bank [ADB] tinan 2015, mak UNDP iha inisiativa hodi hahu tun ba baze hodi eduka komunidade sira, oinsa mak halo resklazen no oinsa fahe lixu sira ne’e.

Reinaldo informa katak iha Suku Motael joven hamutuk 26 tun ba aldeia hodi halo sosializasaun durante tinan ida ho balun no komunidade komesa hahu ona halo segrerisaun iha sira nia fatin.

Komunidade suku Motael ne’ebe partisipa iha lansament refere, Lita Viegas [42], konfesa ba TAFARA.TL katak projetu zero plastiku ne’e importante, tanba problema lixu ne’e nudar responsabilidade ema hotu nian, dala barak komunidade sira sei soe lixu arbiru deit, “fila ba idak-idak nia an, oinsa mak ita bele proteje no hadomi ita nia ambiente ne’ebe moos, atu nune labele afeta ba ita nia saude no liu-liu saude ba ita nia oan sira”.

Hosi sosialiazaun ne’ebe UNDP halao, Lita prontu fahe informasaun ba nia maluk sira, hahu hosi uma laran, atu koidadu ambiente ne’ebe moos no labele soe licu plastiku arbiru.

Tuir Peskizador internasional katak presiza tinan 1000, atu lixu plastiku sira atu naben iha rai laran, ida ne’e tempu ne’ebe naruk, bainhira naben iha rai laran, praticulas plastiku sei hamosu beneno ba iha rai no rai laran

Se karik atu sunu plastiku sira ne’e, sei hamosu polusaun nebe iha beneno no sei fo ameasa ba saude liu hosi anin. Bele fo moras ba ema hanesan kankru, hepatitis, depresaun no seluk-seluktan. Laos fo emasau ba moras deit, maibe akontesementu ne’ebe sempre akontes iha ita nia leet mak lixu plastiku sei hamosu inundasaun.

Tuir kalkulasaun ne’ebe iha katak 500 milloesn no to’o billiaun ida saku plastiku iha mundu kada tinan, ne’ebe komesa estraga ona mundu ne’e.

Iha fatin hanesan Secretario Estado do Ambiente [SEA], Demétrio do Amaral ba TAFARA.TL informa katak governu liu hosi Secretaria Estado do Meio Ambiente durante ne’e halo hela programa extra kurikular edukasaun ba joven sira, oinsa halo resiklazen no governu nafatin esforsu an hodi haforsa liutan programa ida ne’e.

“Iha Sekretaria Estadu do Ambiente [SEA] iha rekursu kiik oan hodi ajuda liu-liu iha projetu pilotu sira ne’e”, afirma Demétrio do Amaral, hanesan expert ba iha asumtu Ambiente no nudar eis director Fundasaun Haburas ne’ebe servisu foka liu ba asumtu Meio Ambiente nian.

Iha seremonia lansamentu ne’ebe organiza hosi UNDP, entrega simbolikamente plastiku alternativu ba xefe suku Motael, no monta kedas lixu fatin ho tipu haat hanesan lixu ba suratahan, plastiku, vidru no hahan restu.

Programa lansamentu Zero Plastiku ne’e realiza tanba servisu hamutuk entre Governu Timor-Leste, UNDP no Embasada Nova Zelandia iha Timor-Leste. * [ Zevonia Vieira | TAFARA.TL | 09.10.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Komemora Loron Invasaun, PR Lú Olo Sauda CNC nia Inisiativa Hodi Hametin Memoria Kolektiva

Prezidente da Republika, Dr. Francisco Guterres Lú Olo sauda Centro Nasional Chega! no ekipa toma …

Leave a Reply

Your email address will not be published. Required fields are marked *