Friday , January 18 2019
Home / Opini / Hakotu Siklu Violensia no Dezenvolve PNTL, Halo Tuir Rekomendasaun CHEGA!
Ato ‘Lekinawa’ Costa, nudar Ativista RENETIL. [Foto: Dokumentu privadu | 06.08.2018]

Hakotu Siklu Violensia no Dezenvolve PNTL, Halo Tuir Rekomendasaun CHEGA!

Timor-Leste kontinua monu ba hahalok violasaun dereitus umanus. Membru Polisia Nasional Timor-Leste (PNTL) ne’ebe mak ninia servisu ne’e atu proteze sidadaun sira, fila oho fali ninia sidadaun. Atu ne’e akontesementu iha 18 Novembru 2018, joven nain 3 mate, nain 5 seluk hetan kanek, halo tauk komunidade tomak iha Kulu-Hun, posivelmente iha Timor-Leste laran tomak. Ne’e bele akontese tanba trauma ba tempu pasadu nian, iha okupasaun Indonesia no mos tempu ukun rasik an hanesan kazu 2006, kazu saudoso Mauk Moruk no violensia komunal nia sira mak akontese tiha ona.

Semana hirak antes ne’e, antes membru PNTL tiru mate joven nain 3, universitariu sira mak halibur an iha Movimentu Universitariu Timor-Leste hetan kaptura hosi PNTL tanba konsidera viola lei liberdade expresaun ne’ebe koalia kona ba distansia ba halo manifestasaun. Atuasaun PNTL involve halo violensia hasoru estudante sira no halo intervensaun ba universidade UNTL nia laran. Atuasaun PNTL nian ne’e viola Konstituisaun RDTL mak koalia kona ba liberdade expresaun.

Fulan ida antes akontesementu sira mak mosu iha Dili, iha Daisua, Manufahi, joven sira asalta malu no rezulta ema nain 2 mak mate no nain 3 seluk hetan kanek. Kazu hanesan ne’e kuaze akontese bebeik iha sosiedade nia let. Laos deit membru seguransa (PNTL ka F-FDTL) mak halo ba ema babain, maibe mos sidadaun sira halo ba malu no sira ne’ebe mak nudar ator seguransa mos halo violensia ba malu.

Ema hotu seidauk haluha kazu 2006, ne’ebe husik hela fuan kanek ba ema barak ne’ebe lakon hela fatin, no lakon mos sira nia vida. Siklu violensia ne’e kontinua mosu bebeik no mosu maka’as liutan bainhira iha kombinasaun deiak ho eventu politiku, hanesan eleisaun.

Hosi insidentes violensia kik oan sira to’o ba violensia bot, involve ator ka instrumentu seguransa estadu nian hamosu perguntas bot ida: tanba sa mak violensia publik, oho no halo impedementu ba ema nia moris susar atu diminiu? Tanba sa mak ator seguransa, ne’ebe mak loloos ne’e atu fo seguransa ba povo, sira rasik mos halo violensia ba povo?

Bainhira koalia kona ba dezenvolvimentu nasaun no estadu Relatoriu CHEGA! halo rekomendasaun forte ne’ebe koalia kona ba dezenvolvimentu ida ne’ebe mak kaer metin prinsipiu dereitus umanus. Bainhira lee Relatoriu CHEGA! no halo ligasaun ho objetivu estadu nian mak hakerek iha Konstituisaun RDTL, Planu Estratejiku Dezenvolvimentu Nasional 2011 – 2030, no Objetivu Dezenvolvimentu Sustentavel, liu-liu pontu 16 ne’ebe mak koalia kona ba Dame, Justisa no Instituisaun Forte, bele hetan fukun importante ida katak, dokumentu hirak ne’e hotu hakarak halo transformasaun pozitivu ba sosiedade nia moris.

Relasiona ho objetivu sira ne’ebe temi iha leten, hanesan Estadu, Timor-Leste hahu tiha ona halo servisu super-importante ida hodi buka lia los no halo rekonsiliasaun ho ninia pasadu. Servisu CAVR nian halibur dadus lubuk ida kona ba violasaun dereitus umanus oin-oin mak akontese tiha ona iha pasadu. CAVR halibur deklarasaun besik 8,000 resin hosi vitima, sasin no ator violasaun dereitus umannus. Dadus hirak ne’ebe halibur, ninia objetivu ida mak atu ema hotu aprende kona ba saida mak akontese ona, violensia sira ne’ebe mosu durante konflitu, atu la repete buat hanesan iha tempu dame nian.

Hosi servisu ne’ebe CAVR halo, produs relatoriu kompletu, livro 5 ho pajina besik 3,000. Relatoriu iha livro lima ne’e koalia kona ba idea inisiu hodi establese CAVR, ninia mandatu, komisaun nia servisu, konstrusaun ba istoria luta ba ukun rasik an no konflitu, invazasaun no okupasaun Indonesia no violasaun dereitus umanus mak ema hotu ne’ebe involve iha konflitu ka funu tinan naruk ne’e halo ona. Hosi livro 5 ne’e hamosu rekomendasaun 204, inklui kona ba reformasa institusional, reparasaun ba vitima, buka lia los no dokumentasaun, justisa no rekonsiliasaun, hadiak relasaun ho Indonesia, edukasaun ba nao-violensia no dame, no mos kona ba dezenvolvimentu no dereitus umanus.

Maibe importante tebes atu nota katak CAVR halo servisu iha inisiu tempu ukun rasik an nian. Estadu hahu funsiona ho ninia limitasaun oin-oin, liliu orsamentu. Relatoriu CAVR ne’e entrega ba Presidente da Republika Xanana Gusmao, nudar Xefe de Estadu iha momentu ne’eba, iha 2005, no aprezenta mos iha Parlementu Nasional. Relatoriu ne’e laos entrega hodi rai deit ba biblioteka maibe ba Presidente atu haree no halo servisu ho ninia rekomendasaun sira.

Presidente truka dala 3 no Parlementu Nasional truka dala 4, no Governo truka dala 5, maibe seriedade hodi halo implementasaun ba Rekomendasaun CHEGA! seidauk maximal. Relatoriu hosi Grupo Trabalho iha Gabinete Priemiru Ministru Rui Maria Araujo nian, iha tempu Governo danen (6), hetan katak 95% hosi Rekomendasaun CHEGA! seidauk implementa, inklui iha instituisaun seguransa nian.

Reforma Institusional mak parte importante ida hosi relatoriu ne’e. Iha parte ida ne’e, relatoriu CHEGA! halo referensia espesial ba Dezenvolvimentu Polisial nian. Relatoriu CHEGA! iha ninia introdusan kona ba rekomendasaun ba dezenvolvimentu seguransa hatete katak Timor-Leste presija harii modelu foun servisu seguransa nian, la halo tuir modelu forsa seguransa Indonesia nian, no halo forsa seguransa tama iha kontrola sivil no komunidade.

Atu ajuda publiku komprende didiak Relatoriu CHEGA!, partikularmente relasiona ho dezenvolvimentu polisial, CAVR rekomenda katak:

  • Parlamentu Nasionál hala’o funsaun ativu hanesan mekanizmu supervizaun sivíl ikus-liu kona ba Polísia nia Servisu, no simu relatóriu regular husi Ministériu do Interior nudár responsavel ba polísia, no hatán ba Parlamentu.
  • Membru husi Servisu Polísia sira maka iha responsabilidade ba sira nia hahalok ne’ebé la tuir lei no bainhira polísia involve iha kazu abuzu hasoru direitus umanus, tenke lori ba iha tribunal, no la’ós taka fali husi polísia ka prosedimentu interna.
  • Prosedimentu no mekanizmu atu hato’o keixa kona ba polísia nia lala’ok, tenke harii ho kolaborasaun ho Provedoria nia eskritóriu, atu nune’e muda hotu kedas pratika tempu uluk nian ne’ebé seguransa sira goza impunidade no públiku nia rekursus ba justisa ki’ik hela.
  • Mudansa husi konseitu kultura polísia nian, hodi troka fali mentalidade “forsa polísia” uluk ne’e hodi hala’o fali polítika ne’ebé makas liu kona ba polísia atu hala’o ninia knaar besik liu ho komunidade
  • La’ós de’it fó treinu tékniku ba polísia hot-hotu, inklui ofisiál senior sira, maibé fó treinu nafatin mos kona ba teoria no pratika kona ba direitus umanus nudár parte ida husi sira nia dezenvolvimentu profisionál hanesan protector sira ba direitus umanus.
  • Polísia nia ema hot–hotu, inklui ofisiál senior sira, simu treinu hot-hotu kona ba krime relasionadu ho gender (jéneru), no direitus ba vítima ne’ebé hasoru krime hirak ne’e.
  • Halo espesializasaun no treina nafatin kona ba oinsá bele tau hamutuk evidénsia, halo pratika kona ba forenzik nian no métodu loloos atu halo inkéritu hodi nune’e hamenus risku katak membru polísia sira nian buka evidénsia, liu husi fó presaun ba vítima atu halo konfisaun.
  • Polísia respeita organizasaun sosiedade sivíl nia direitu atu nune’e haree sira nia servisu, hodi nune’e protégé direitus umanus no, kolabora ho organizasaun hirak hanesan ne’e, dezenvolve prosedimentu hodi nune’e bele garante asesu.
  • Fo aten barani ba Membrus polísia Timor-Leste nian hodi nune’e sira bele servisu hamutuk operasaun Internasionál ba dame tuir Nasoins Unidas nia mandatu, hodi nune’e sira bele hasa’e tan sira nia esperiénsia kona ba pratika di’ak ne’ebé internasionál.

Fiar katak ema hotu sei loke hikas pagina Relatoriu CAVR nian, partikularmente instituisaun relevante mak halo servisu ba seguransa nian, hodi tau iha pratika saida sai tiha politika estadu nian.

***Hakerek nain ativista RENETIL, no artikel ne’e opiniaun pesoal, la reprezenta instituisaun mak hakerek nain hakna’ar an ba. [ Ato ‘Lekinawa’ Costa | TAFARA.TL | 09.11.2018]

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Teknokrata Servisu Fo Tulun Internasional: Hatan ba Maun Helder da Costa g7+

Hakarak atu hatan ba maun Helder da Costa ninia publikasaun artikel foin lalais ne’e ho …

Leave a Reply

Your email address will not be published. Required fields are marked *