Wednesday , June 19 2019
Home / Sosial & Politika / Hanoin Hikas Balibo 5, AJTL halo asaun solidaridade ba Avo Lucia
kondisaun uma fatin avo lucia nian iha Postu Balibo Suku Fatuk Laran. [Foto: Merry Gracias].

Hanoin Hikas Balibo 5, AJTL halo asaun solidaridade ba Avo Lucia

Asosiasaun Jornalista Timor Leste (AJTL) halo reflesaun hodi hanoin hikas jornalista estranzeiru nain lima mate iha Balibo no halo mos asaun solidaridade hodi ajuda Avo Lucia iha Aldeia fatuk laran Balibo. Avo Lucia hatete ba jornalista sira katak nia foin kontente dadaun loron ida rua ne’e, se lae nia tanis bebeik.

AJTL relembra fila fali akontesementu iha tinan 40 resin liu ba ne’ebe rezulta akontesementu Balibo Five, jornalista estrazeiru nain lima husi Australia hetan sunu iha Balibo  fatin atual museum Balibo Five nian.

Iha tempu ne’ebe hanesan jornalista hotu ne’ebe hamahan a’an iha AJTL nia okos hala’o viajem ba iha Balibo iha loron 21/10, iha ne’eba mos identifika ona Avo Lucia hanesan ema ida ne’ebe presija hela tulun husi ema seluk, tanba ne’e, alem de jornalista sira halo reflesaun ba jornalista ne’ebe mak mate, Jornalista sira mos hakatak ba iha Aldeia Fatuk Laran Balibo hodi haree direitamentu problema ne’ebe mak Avo Lucia enfrenta iha ne’eba.

Ho nune’e iha Avo Lucia nia uma, Presidente AJTL, David Hugo hatete, alem de atividade ne’ebe halo iha Balibo, AJTL mos hakarak fo ajuda uituan ba Avo Lucia, tanba haree katak Avo Lucia mak ema ne’ebe presija hetan ajuda, maske apoiu ne’ebe AJTL fo la barak maibe tuir kapasidade AJTL nian.

Ohin ami iha atividade iha Balibo, no ami mos hanoin hela atu mai ajuda ema vulneravel sira iha ne’e.  Ne’e mak ami identifika katak Avo Lucia dos Reis mak ema ne’ebe presija atu hetan ajuda, tanba ne’e maka ami grupu ida ne’e mai lori hela ajuda balun mai atu entrega hela ba Avo. Apoiu ne’ebe ami entrega la barak ida, entrega hela ba avo atu avo bele uza ba avo nia nesesidade loron loron nian. Iha fos, mina, supermi balun iha ne’e ami mai entrega hela ba avo, ami laos iha buat barak maibe tuir kapasidade ne’ebe ami iha, ami hakarak mai apoiu hela ba Avo de’it”,  dehan Hugo.

Iha fatin hanesan, marka mos prezensa husi Amilcar Tavares, hanesan Xefe Departamentu Asuntu Sosiais Ekonomia Municipal Bobonaro ba SECOMS no Jornalista sira hatete katak oinsa mak sira bele ajuda Avo Lucia. Xefe Departamentu ne’e mos informa ba Presidente Autoridade kona ba Avo Lucia, no Avo ne’e mos hetan ona apoiu uma ki’ik nian husi Minsteiro Solidaredade social Municipiu nian.

Ami mai halimar iha ne’e Xefe Aldeia dehan ba Xefe Departamentu se bele ajuda lai ema ida ne’e nia labele los ona, tanba ne’e hau telephone Presidente Autoridade ami mai haree iha ne’e, no ami fo ona ajudus uma ki’ik ba nia no fo mos fos, supermi, terpal, bikan sanan kanuru, ba Avo Lucia,hatete Amlicar.

Xefe Departamentu ne’e mos salenta liu tan katak mobilizasaun suporta mai mos hosi fatin seluk inklui hosi F-FDTL no PNTL.

Membru Autoridade Lokal ne’e mos dehan sira mos halo ona proposta ba iha nasional. Sira hili dalan liu husi kolega sira, tanba prosesu ne’e naruk la halimar tanba ne’e sira hakarak Dezembru nia laran ne’e Avo Lucia bele hela ona iha uma ne’ebe mak ho kondisaun sufisente.

Ami halo ona proposta ba iha Nasional, hau la dun hatene tanba prosesu ne’e naruk la halimar maibe ami liu husi dalan ida liu husi kolega sira maibe grasas adeus tanba AJTL mos bele ajuda fo apoiu ami. Ita hanesan aktivista ita halo oinsa para Dezembru ne’e nia bele hela ona iha mahon ida ne’e mak diak,’” katak Xefe Departementu.

Iha fatin hanesan jornalista sira mos hakbesik ba Alin husi Avo Lucia mak  Marcelino dos Santos ba jornalista sira nia hateten tuir nia observasaun durante ne’e foin hetan ajuda iha fulan ida liu ba, nia mos agrdese tanba Timor oan sei haree malu hanesan ne’e

Foin daudaun iha fulan ida nia laran ne’e maka ministeiro solidaredade nian mak mai iha ne’e fo apoiu, hanesan familia ami agradese hanesan Timor oan ita haree malu hanesan ne’e ami agradese boot tebtebes nudar alin hau iha tempu udan nia laran ne’e hau sei esforsu a’an atu ajuda ekipa ne’ebe mak mai atu ajuda,” dehan Marcelino.

Ba jornalista Alin husi Avo Lucia ne’e mos konta tuir katak nia bolu Avo Lucia ba hela ho nia maibe Avo ne’e lakohi. Maibe bainhira Avo ne’e moras nia alin mai haree. Durante ne’e ema ida la besik Avo ne’e so ninia alin Marcelino deit. Marcelino mos mak sosa hahan lori mai haree nia bin no tau matan bebeik ba nia bin nia situasaun.

Iha fati ne’ebe hanesan Lucia dos Reis (Avo Lucia) wainhira hatan ba perguntas balun ne’e jornalista sira husu ba nia, nia hatete nia la hatene atu koalia buat ida no nia foin mak kontente loron ida rua ne’e la e nia tanis bebeik tanba haree ba nia uma nia kondisaun, nia mos tauk karik uma ne’ebe nia toba ka hela ba bele hanehan nia.

Hau la hatene atu koalia saida, hau foin kontente daudaun iha loron ida rua ne’e, lae hau tanis bebeik, tanba uma ne’e atu latan hau ne’e mak hau tanis bebeik, tanba uma ne’e atu latan hau se mak atu halo fodik,” dehan Avo Lucia.

Avo Lucia konta ba jornalista sira katak familia barak mak hela besik nia. Maibe nia mak la toman duni hela ho familia. Bainhira familia sira vizita nia mos fo han no sira husu buat ruma avo ne’e fo.

Ba jornalista sira nia dehan “hau hela mesak kleur ona no uma ne’e a’at kala tinan lima ne’e hanesan ne’e ona, uma ne’e uluk hau nia alin ikun mak halo momentu ne’e sira mai ajuda deit ba atu selu sira hau osan iha ne’ebe. Hau atu husu tan saida husu deit mak hahan, ropa oan osan itoan sabaun nian maka ne’e deit.

Avo ne’e mos dehan loron ida nia han dala ida se diak entaun nia han dala rua. Kalan mos nia toba a dukur tanba tauk no listrik mos la tama nia uja deit mak minarai hodu sunu, osan ne’ebe nia uja durante ne’e hetan husi estadu. Maski moris iha kondisaun kiak maibe Avo Lucia sei kontinua halo to’os.

Observasaun Tafara.tl nian vizita ne’e hetan partisiasaun husi SECOMS, no Jornalista hotu ne’ebe mak hamahan a’an iha AJTL.* [Bebiana Soares | TAFARA.TL | Editor: Ato ‘Lekinawa’ Costa | 22.10.2017].

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *