Saturday , November 17 2018
Home / Sosial & Politika / HASATIL Kontra Programa Food Aid Hosi EUA, Mariano: La Ajuda Ekonomia no Produsaun Rai Laran
Membru HASATIL sira halo konferensia imprensa hodi komemora loron mundia ai-han. [Foto: Zevonia Vieira | 15.10.2018]

HASATIL Kontra Programa Food Aid Hosi EUA, Mariano: La Ajuda Ekonomia no Produsaun Rai Laran

“Ita iha iniasitivu barak tebes ba iha produsaun ai-han nian, liu-liu ita halo intervensaun ho eskola sira, koko atu implementa toos escolar iha eskola. Iha istoria susesu barak ne’ebe mak produs ona hosi kada eskola”. Erminia

Relasiona ho loron ai-han mundial ne’ebe monu iha loron 16 Outubro, Hametin Agrikultura Sustentavel Timor-Leste [HASATIL] hamutuk ho parseiru sira hodi komera loron imporante ne’e. liu hosi konferensia imprensa HASATIL rejeita tebes ho programa Food Aid ne’ebe sei implementa hosi agensia internasional balun iha Timor-Leste.

Liu hosi tema ne’ebe HASATIL hili katak Promove Ai-han Lokal Nutritivu Hodi Hakotu Hamlaha no Malnutrisaun iha Timor-Leste, Portavoz HASATIL, Mariano Fereira deklara katak, HASATIL preokupa tebes ho programa ajuda ai-han [McGovern Dole Food Aid for Education Program. Red] Estadu Unidus Amerika [EUA] nian, ne’ebe sei haforsa sira nian influensia iha Timor-Leste no iha tempu hanesan fo impkatu ba merkadorias produtu loka iha rai laran.

Mariano informa katak kriteria prinsipal hosi programa ne’e mak hanesan ai-han ne;ebe atu ajuda ba nasaun tarjetu sira maioria tenke hola iha Estadu Unidus, tenke transporta iha ró ho bandeira Estadu Unidus nian.

Tuir HASATIL katak maske program ne’e ho objetivu katak ajuda ai-han ba komunidade, liu-liu ba eskola sira, kriteriu ne’ebe aplika, sei fo benefisiu boot liu ba programa ne’e nian ka ba Estadu Unidus Amerika no bele fo impaktu negative boot liu ba nasaun ne’ebe simu ajuda ai-han.

Hatan ba TAFARA.TL liga ho Food Aid ne’ebe sei implementa, Mariano hatan katak Timor-Leste laos iha situasuan emergensia ne’ebe mak ita tenke hetan ai-han urgente hosi Estadu Unidus.

“Ita hatene katak governu Timor-Leste halo programa lubuk ida hanesan programa merendar no seluktan, maske programa ne’e sedauk lao diak tuir standar ka saida mak ita hakarak, maibe importante mak ita tenke promove ita nia produtu iha rai laran, atu nune bele fo duni hahan diak ba ita nia oan no labarik sira. Tanbasa mak ita kontra programa ida ne’e, tanba seolah-olah produsaun ai-han iha Amerika ne’eba sira hanoin atu soe ai-han ba fatin seluk, entaun sira falun hahan ne’e ba programa food aid, entaun ita hare katak ida ne’e la nesesariu ba Timor-Leste agora. Osan ne’ebe sira tau ba program ne’e, sei sosa hahan hotu hosi Estadu Unidos. Ida ne’e ita sente katak la ajuda ekonomia rai laran no la ajuda produsaun iha rai laran”, hateten Mariano.

Hare ba preokupasaun ida ne’e HASATIL nafatin fo hanoin ba governu atu promove ai-han rai laran no agrikultura sustentavel no kontra food aid ne’ebe ajensia internasional sira implementa

Lian hanesan mai hosi Koordenador PERMATIL, Erminia hatan ba TAFARA.TL katak liga ho Food Aid parte hosi PERMATIL ne’ebe implementa programa tranzisaun agro ekolojia rejeita tebes programa ne’e.

“Ita iha iniasitivu barak tebes ba iha produsaun ai-han nian, liu-liu ita halo intervensaun ho eskola sira, koko atu implementa toos escolar iha eskola. Iha istoria susesu barak ne’ebe mak produs ona hosi kada eskola, ezemplu eskola iha Atauro-Bikeli, sira bele ona oferese hahan merendar escolar hosi produsaun eskola ne’e rasik. Lolos governu bele uza istoria ida ne’e, depois bele mos haberan iha eskola sira seluk, atu bele halo atividade hanesan. Maibe ate agora ladun iha intensaun diak hosi parte governu, atu bele hare saida mak sosiadade sivil sira halo ona”, tenik Erminia

Liu hosi konferensia imprensa portavos HASATIL informa mos katak informasaun preliminaria hosi departementu agrikultura Estadu Unidus nian hatudu katak Care Internasional mak sei implementa programa Food Aid ne’e iha Timor-Leste ho total valor osan tokon $26.

“Ami hakfodak katak Care sei sai implementador ba programa Food Aid Estadu Unidus nian. Ami hanoin katak pratika ne’e klaramente la tuir Care nian Food Aid Policy rasik, ne’ebe rekonnese katak programa sira hanesan ne’e fo impaktu la diak ba nasun ne’ebe simu. Ami husu ba organizasaun internasional sira, atu labele sai implementador ba programa ida ne’e, bainhira laiha estudu ne’ebe provoka katak sie laiha impaktu ba agrikultura no seguransa ai-han iha rai laran”, hateten Mariano. * [ Zevonia Vieira | TAFARA.TL | 16.10.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *