Saturday , November 17 2018
Home / Sosial & Politika / Heroi Foun Ba TL Liu Hosi Desportu, Teofilho & Pasquela: Orgulho Bainhira Hasae Bandeira RDTL no Kanta Hino Nasional
atleta Comite Paralimpic Nasional Timor-Leste [CNPNTL] Teofilho Freitas no Pasquela dos Santos Pereira. [Foto: Helder Perreira| 14.10.2018]

Heroi Foun Ba TL Liu Hosi Desportu, Teofilho & Pasquela: Orgulho Bainhira Hasae Bandeira RDTL no Kanta Hino Nasional

Bandeira Timor-Leste dada sae akompanna ho hino nasional Patria-Patria, hodi akompanna atleta Teofilho Freitas ne’ebe sai manan nain ba halai ho distansia 400 metru, iha Asian Para Games Jakarta Indonesia 2018.

Bainhira akompanna iha video ne’ebe habelar liu iha sosial media, atleta Comite Paralympic Nasional Timor-Leste [CNPNTL] , Teofilho hamonu nia matan wen, laos tanba triste maibe kontente tanba nia konsege hamorin ona Timor-Leste nia naran ho medalha osan mean ne’ebe nia oferese ba rai doben ida ne’e.

Iha loron 14/10, Teofilho Freitas no Pascuela dos Santos Perreira to’o iha Timor ho aviaun Sri Wijaya. Komunidade Dili inklui maluk difisiensia sira antusiasmu makaas, hodi simu atleta nain rua ho ekipa tomak, tanba orgulho lori ona Timor nia naran iha eventu internasional.

Liu hosi konferensia imprensa ne’ebe halo iha edifisiu Sekretaria Estadu Juventude e Desportu [SEJD] Teofilho espresa ninia sentimentu kontente bainhira hetan primeiru lugar ba eventu Asian para games Jakarta 2018.

“Orgulhu bo’ot no kontente tebes bainhira rona no hare’e ita nia kantiku Hino Nasional Patria-Patria no Bandeira Timor Leste bele dada no kanta iha Indonesia, entre nasaun 43 Timor mos la lakon oportunidade husi sira no saida mak ami halo, ami hetan hodi lori Timor nia naran, hodi lori Povu Timor no ba dignidade Timor”, tenik Teofilho iha SEJD

Teofilho la haluha agredese ba Maromak tanba ho Nia grasa, akompanna atividade sira nian, ba SEJD ne’ebe nafatin suporta, maske ho situasaun politika ne’ebe mosu, maibe nafatin buka meius hodi apoiu atleta sira, hodi hetan oportunidade ba kompete hodi lori Timor nia naran.

Iha fatin hanesan atleta Pasquela dos Santos Perreira, ne’ebe hetan terseiru lugar ho  medalha osan mutin, sentimentu orgulhu, kontente maibe kahur ho tanis, tanba bele mos hetan medalha iha eventu internasional

“Laiha liafuan atu hateten maibe ho aman Maromak nia tulun no grasa ami atleta defisiente mos bele kompete iha eventu hanesan ne’e no bele halo mos Timor orgulhu”, hateten Pasquela ho orgulhu.

Teofilho hetan medalha osan mean, husi klase mane T37 iha loron 10/10 no iha loron 12/10 atleta Teofilho kontinua oferese tan medalha osan mean ida ba povu Timor-Leste, iha klase mane T37/38 halai ho distansia 1500 Metru.

Liu hosi konferensia imprensa iha salaun VIP aero portu Prezidente Nicolau Lobato, Ministra Edukasaun no Desportu, Dulce de Jesus Soares hateten, ohin loron Timor-Leste olgulho bo’ot tanba simu ita nia atleta husi Asian Para Games ne’ebe hatudu ninia prestasaun no dedikasaun, sira nia determinasaun talenta no mos sira nia disiplina, hodi ohin loron sira hetan duni sira nia mehi. Ne’e sai ezemplu di’ak ida ba ema hotu iha Timor, liu-liu sira ne’ebe hili dalan nu’udar atleta iha area Desportu nian.

Ministra Dulce mos salienta katak governu Timor-Lste iha komitmentu boot atu kontinua fo apoiu ba atleta sira, atu nune’e siha future bele hetan prestasaun ne’ebe diak liutan

“Ha’u husu ba atleta sira, ne’e faze ida ne’ebe inicial teb-tebes, ita-boot sira fila fali mai, kontinua treinu makaas liu tan, atu nune iha futuru ita bele ba tuir tan kompetisaun Sea Games”, dehan Dulce

Dulce mos informa katak sei haforsa parte tekniku nian, hodi hanorin atleta sira, liu hosi treinador sira no governu Timor-Leste kontinua apoiu ba treinador sira. * [ Zelia Ximenes | Editor: Zevonia Vieira | TAFARA.TL | 14.10.2018]

 

About Zelia Ximenes

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *