Saturday , April 20 2019
Home / Eleisaun Parlamentar / Horta: Sira Nebe Manan, Hatudu Sentidu Estadu, Hakoak Sira Seluk.
Eiz Prezidente Republika RDTL, Dr.José Ramos Horta exerse nia direitu votu iha sentru votasaun suco Metiaut.[Foto: Martinho Moniz | TAFARA.TL | 22.07.2017].

Horta: Sira Nebe Manan, Hatudu Sentidu Estadu, Hakoak Sira Seluk.

“Kuandu rezultadu mai, sira nebe manan barak tenki hatudu sentidu ema matenek, sentidu estadu para hakoak sira ne’ebe la hetan primeiru lugar. Hau la temi lakon tamba ita hotu-hotu manan.”

Lia ne’e hateten husi Eiz Prezidente Republika RDTL, Dr.José Ramos Horta iha nia intervista ho Midia sira, hafoin vota iha Sentru Votasaun Metiaut, Dili. Laureadu Nobel da Paz ne’e afirma lia tan katak tinan lima liu tiha, tuir konstituisaun ita nia institusaun demokratika, instituisaun estadu funsiona duni no ohin ita hili Parlamentu foun, husi Parlamentu atu sai Governu Foun, Primeiru Ministru Foun, ba tinan lima mai ne’e.

Eis Prezidente ne’e hateten, hahu kedas husi prosesu eleitoral, resenseamentu depois kampanna, debate la’o diak teb-tebes no laiha violensia. Bele dehan transparansia ho integridade. Agora ita vota, orsida kalan ita komesa rona ona rezultadu ruma. Diplomata ne’e husu ba Liders Partidus Politikus sira, ba sira ne’ebe hetan votus barak liu atu hakoak sira seluk ne’ebe la hetan votus barak liu.

Ramos Horta husu ba Lider Partidus politiku no povu tomak atu simu rezultadu mak iha, garante estabilidade hodi hametin nafatin demokrasia iha Timor-Leste.

“Agora ita vota daudaun ona, hau husu ba povu tomak, simu rezultadu ho kalma, selebra dala ida tan ita nia demokrasia. Sira nebe la hetan primeiru lugar lalika komesa akuza kedas, tenki hakmatek hatudu lideransa, hatudu ulun malirin, ran malirin, se lae ita hotu mak lakon, ita nia demokrasia mak lakon, ita nia povu mak lakon, liu-liu apelu ba Joven sira, militantes partidus sira hotu-hotu, favor rona rezultadu hatudu orgullu, hatudu sentidu demokrasia, simu deit”, tenik Horta.

Iha sorin seluk Membru RENETIL Domingos dos Ramos ba TAFARA.TL afirma, komesa husi prosesu kampann to’o agora la’o kapas, iha kontribuisaun husi komunidade tomak, ne’ebe husi tekniku nian, STAE mos komesa aprende buat barak, esperensia husi eleisaun ne’ebe liu ona, komesa hadia ona buat balun ne’ebe agora kapas, liu liu eleisaun ba parlamentar ne’e observador lubuk ida, husi internasional no nasional.

Domingos dos Ramos husu ba parte relevante atu hare ba votante sira ne’ebe la konsege ezerse nia diretu ba hili tamba kestaun hela Fatin dook.

“Hau hanoin ba oin ita presija hadia mak, dala ruma votante balun la konsege to’o iha fatin sira atu vota ba ne’e, tamba balun laiha osan atu ba, hau hanoin ida ne’e ba oin ita presija hadia,” tenik Domongos dos Ramos ba Jornalista TAFARA.TL iha Edifisiu Haburas, Farol, Dili.

Membru komunidade Suku Motael, Franscisco Menezes ba TAFARA.TL hateten, se deit mak manan hodi ukun presija halo dezenvolvimentu, tau matan ba Povu sira ne’ebe iha area remotas no hakoak ema hotu-hotu.

“Se deit mak manan bele dezenvolve Rai Timor ne’e halo diak, ba hare kamada sosial hotu kedas, atu kamada iha leten, iha klaran ka iha okos, ne’e tenke dezenvolve halo didiak liu-liu ba ita nia maluk sira iha knua ne’eba be araska los, ezize Estrada, ahi mos seidauk to’o, be mos laiha, ida ne’e mak inportante liu.”

Membru Komunidade ne’e la tau interese ba se deit mak manan, tamba mesak Timor-Oan deit, labele halo diskriminasaun, se deit mak atu sai Primeiru Ministru, Ministru, Sekretariu Estadu ka atu Diretor, sira tenki hare ba Ema hotu, tenki iha espiritu nasionalismu, patriotismu ne’ebe as hodi haree ba Ema hotu kedas, povu tenki komprende no klabora hodi dezenvolve Timor.* [Martinho Moniz | TAFARA.TL | Editor Zevonia Vieira | 22.07.2017].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *