Tuesday , March 26 2019
Home / Ekonomia & Bisnis / HUCO Youth: Negosiu Resiklazen, Oportunidade Hanorin Foinsa’e Timoroan Sai Sidadaun Ne’ebe Responsavel.
Membru Huco Youth Group Lorenco Crispin de Jesus Araujo esplika konaba resiklazen ne'ebe halo hosi lixu botir plastiku. [Foto: Zevonia Vieira | 06.12.2018]

HUCO Youth: Negosiu Resiklazen, Oportunidade Hanorin Foinsa’e Timoroan Sai Sidadaun Ne’ebe Responsavel.

Lixu nudar problema boot ida ne’ebe bele fo ameasa ba ema no animal, no risku ba boot ba ambiente, liu-liu lixu plastiku.

Hanoin ba impaktu negative ida-nee, Grupu Komundade Foinsae Hudi Laran ho neebe hanaran an ‘HUCO Youth Group’, oferese solusaun innovative ba problema hirak ne’e. Harii iha 2017, HUCO Youth foti inisiativu hodi sai exemplar ba moris saudavel no hanorin joven sira konaba oinsa atu halo resiklazen. Sira ho voluntariumente kolekta lixu plastiku ne’ebe soe arbiru iha bee lihun no iha estrada ninin. Bainhira grupu ne’e harii, HUCO Youth laiha hanoin hodi halo osan, maibe sira-nia objetivu principal mak atu redus lixu plastiku iha sira nia bairo.

Koordinador HUCO Youth, Olga Teresa Corbafo hahu’u konta nia istoria tanba sa iha inisiativa hodi harii grupu ne’e.

Hau hela iha bairo Hudi Laran, entaun hau tenke iha relasaun diak ho vizinhu sira, liu-liu joven sira. Hau sente tauk oituan bainhira laiha relasaun diak ho vizinhu sira. Hau mos gosta halo servisu iha parte saniamentu no higenis, nunee hau hare kestaun lixu ne’e boot tebes, e hau mesak labele resolve. Entaun hau hahu’u ona hanoin oinsa halibur joven sira, atu bele promove paz no dame tanba dala barak ema rona katak bairo Hudi Laran ne’e tama kategoria fatin problema”, tenik Olga

Ho razaun atu promove paz no dame no hamenus lixu plastiku, Olga Corbafo kria grupu HUCO Youth, hodi involve joven sira, atu bele halo mudansa ruma ba sira nia moris. “Ami halo atividade resiklazen hosi plastiku no ita bele uza fila-fali. Fofoun hau bolu joven nain rua, hodi koalia no koko fo hanoin ba sira konaba saida mak hau sente katak hanesan joven tenke gasta tempu hodi halo buat ruma ne’ebe diak ba imi nia moris, ne’e mak ami hahu halo oinsa mak bele produs buat ruma hosi lixu”, hateten Olga, kaben nain ho oan nain haat.

Maske la espera, maibe maioria iha mudansa barak bainhira HUCO Youth hahu nia ligasaun ho UNDP Knua Juventude Fila-Liman (KJFL), sentru integradu ba empreendedorismu foinsa’e, emregabilidade no lian foinsa’e. Ba Olga, UNDP-KJFL sei muda hahalok foin’sae sira-nian sai joven ne’ebe responsavel, liuhosi negosiu resiklazen.

 “Hau kontente tanba hau bele halibur sira duni no lori sira ba Knua Juventude Fila-Liman, bainhira fila hosi Knua Juventude Fila-Liman hau hare ksolok iha sira-nia matan, hau sente sira hatudu sira nian kontente. Sira hateten mai hau katak Knua Juventude Fila-Liman nee fatin uniku tanba sira valariza liutan ita-nia aktividade. Durante ne’e ita hili lixu, ema bolu ita dehan geng sampah maibe bainhira ita ba Knua Juventude Fila-Liman, sira fo parabens ba ita. Sira mos dehan durante ne’e ema nunka fo parabens mai ami, maibe ohin ami hasoru ema mesak oin-oin ne’ebe inspirativu tebes”, hateten Olga.

Desde iha ligasaun, UNDP-KJFL konvide reprezentantes foinsae husi HUCO Youth no partisipa iha Treinamentun Negosiu Sosial durante loron 3, hamutuk ho partisipantes husi grupu resiklajen sira seluk. Grupu refere continue hamosu idea inovativus no hahu ona halo lixu-plastiku sai fali kadeira, meja no fatin soe foer.

Rezultadu hosi produsaun ne’ebe halo hanesan meja no kadera, depois ami faan no ema balun sosa ho presu $50.00, ami esfrosu an hodi servisu makaas liutan, hodi promove iha merkadoria, atu nune’e ema bele konnese ami nia produtu” Olga hateten.

Joven sira iha Grupu HUCO Youth hetan benefisu barak hosi aktividade kapasitasaun foinsa’e iha UNDP Knua Juventude Fila-Liman, inklui formasaun Koalia iha Publiku, oinsa halo aprezentasaun (pitching) no Treinamentu Lideransa. Kordenador Grupu hateten katak joven sira ne’ebe involve iha HUCO Youth no partisipa iha eventu UNDP Knua Juventude Fila-Liman, sira aprende buat foun barak iha sira nia moris.

Durante iha ami nia moris, ami nunka hetan oportunidade hodi koalia iha publiku nia oin, maibe bainhira hamtuk ho HUCO Youth no aprende iha UNDP-KJFL, ami komesa iha ona esperiensia oituan no aprende buat foun iha sira nia moris”, hateten Olga

Lorenco Crispin de Jesus Araujo moris iha Baucau loron 6 Agustu 1991, iha hanoin neebe hanesan. Nia hateten, “hau involve an iha grupu ne’e tanba ami nia area iha Hudi Laran sempre akontese konflitu no violensia ente joven. Ami agredese ba mana Olga tanba bolu ami atu serbisu hamutuk, atu redus violensia no konflitu”, Lorenco konfesa katak antes HUCO Youth harii, nia sempre soe tempu hodi tur iha estarada ninin no konsume tua barak liu hamutuk ho nia kolega sira.

Hau sente atividade ida ne’e sei fo impkatu diak ba ami. Ami komesa redus hemu tua no ativu halo atividade limpeza. Ami sente kalma liu bainhira konflitu mos komesa menus. Joven balun komesa arepende no komesa halo buat diak”, Lorenco hateten ho orgulhu

Nia ho kolega sira, uza kreatividade hodi halo kadera, meja, ai-funan do sinelus hosi lixu botir plastiku ne’ebe sira akumula no hili iha be lihun. Mane joven ne’e sente arepende ho tempu uluk ne’ebe nia soe barak, no nia iha esperansa boot ba futuru ne’ebe naroman liu no apela ba joven sira seluk hodi hamrik no hatudu sira nia kreatividade

Olivia Rodrigues (18) konta ninia istoria ne’ebe hanesan, hosi prespektiva ne’ebe diferente. Nia konfesa katak HUCO Youth hanorin nia hodi hadomi ambiente no oinsa moris iha dame nia laran. Nia aprende atu sai joven ne’ebe kreativu no inovativu hosi UNDP-KJFL. Tuir Olivia, KJFL nudar fatin ba joven sira hodi hetan esperiensia foun no bele aumenta kapasidade iha mundu negosiu sosial.

Ami aprende konaba oinsa kria servisu ba an rasik, ezemplu ida mak HUCO Youth. Ami servisu ho voluntariumente no osan ba ami laos prioridade, maibe liuhosi servisu voluntariu, ami bele hetan esperiensia foun no bele muda ami nia moris iha futuru. Hau sei joven no kontente aprende e hetan esperiensia foun iha Knua Juventude Fila-Liman”, hateten Olivia

UNDP Knua Juventude Fila-Liman inspira ona Lorenco no Olivia, laos atu sai joven ne’ebe iha responsabilidade deit maibe sai kontribuidor ativu ba solusaun problema sosial iha Timor-Leste hodi redus dezempregu, minimiza konflitu no redusaun ba lixu plastiku. Grupu HUCO Youth nudar ezemplu ida hosi grupu sira seluk ne’ebe hetan benefisiu diak. Ba Lorenco no Olivia, UNDP Knua Juventude Fila-Liman hakbiit ona sira, hodi kria negosiu hamutuk ho kolega sira iha HUCO Group. Sira fiar katak maske negosiu ne’e foin hahu, maibe neneik sira fiar katak sei susesu.

UNDP Timor-Leste kontinua eksplora oportunidade no rekursu produtivus hodi habelar nia serbisu ba to’o iha municipio sira seluk no sei ajuda joven sira iha area rural. * [ Ekipa KJFL | TAFARA.TL | 06.12.2018 ]

About Other Source

Check Also

UNDP-KJFL Realiza Kompetisaun Negosio Resiklazen, Negosio Sosial Importante Hodi Resolve Problema Sosial

Iha realidade ita iha dalan rua deit: primeiru, ita sai patraun ba ita an rasik, …

Leave a Reply

Your email address will not be published. Required fields are marked *