Saturday , April 20 2019
Home / Sosial & Politika / Hugo: Governu TL no Indonesia Tenke Sai Pioneru Estabelesimentu Fundu Solidaridade Ba Funu Tinan 24
Centro Nasional Chega! halo workshop konaba esbosu fundus solidaridade. [Foto: Dokumentu CNC | 27.02.2018]

Hugo: Governu TL no Indonesia Tenke Sai Pioneru Estabelesimentu Fundu Solidaridade Ba Funu Tinan 24

“Estabelesimentu fundu solidaredade internasional no rekomendasaun ne’e hatoo ba governu Timor-Leste no Indonezia, tanba paiz rua ne’e mak involve iha konflitu tinan 24 nia laran”. Hugo Fernandes

Centru nasional Chega [CNC] halao workshop hodi koalia konaba esbosu fundu solidaridade, ho objetivu atu dignifika ema sira ne’ebe fo sira nia moris no hetan sofrementu iha tempu pasadu. Kria memoria no esperensia ba moris ligadu ho akontesimentu signifikativu sira akontese durante funu nia laran, haburas edukasaun, valores direitu humanaus no valores luta ukun konaba vitima sira ne’ebe vulneravel, hodi nune bele tulun servisu asistensia fundu solidaredade nian.

Director Ezekutitvu CNC, Hugo Fernandes, iha salaun CNC, 27/02 ba partisipante sira katak asumtu konaba sofrementu iha tempu pasadu, parte hosi rekomendasaun relatoriu Chega! ne’ebe mak involve direita no indireitamente iha konflitu naruk iha Timor-Leste.

Hugo Fernandes informa katak Iha rekomendasaun refere, relasiona ho servisu governu nian ba Ministeriu Solidariedade Sosial no Ministeriu Saude hamutuk 48 rekomendasaun.

“Rekomendasaun konaba estabelesimentu fundu solidaredade internasional no rekomendasaun ne’e hatoo ba governu Timor-Leste no Indonezia, tanba paiz rua ne’e mak involve iha konflitu tinan 24 nia laran, tenki sai nudar pioneru iha estabelesimentu fundu ida ne’e, tanba paiz rua ne’e hakarak ka lakohi direita ou indireitamente involve iha trosidade durante 24 anos, hahu iha 1974-1999”, dehan Hugo Fernandes.

Hugo Fernandes mos hateten katak Chega! iha moral ba ema sira ne’ebe mak hola parte iha tempu funu nia laran, tanba ne’e mak iha responsabilidade atu fo tulun ba ema hirak ne’ebe mak ultrapasa ona tempu defisil ne’e, bele formaliza sira nia situasaun, hodi nune’e sira bele moris nudar ema ne’ebe ho dignu. Rekomendasaun Chega! nian hahu husi 2005 to 2016, seidauk deskute ida por ida.

Iha fatin hanesan, Ministra Solidaridade Sosial, Florentina Smith, hateten governu tau nafatin atensaun liu husi planu estrategiku nasional, hodi dezenvolve planu asaun, hodi bele fornese apoiu ba instituisaun sira no fo atensaun ba promosaun no hakbiit feto vitima sira, husi pasadu no feto sira iha vulnerabilidade

Florentina informa liutan, Ministeriu ne’ebe maka responsavel ba knaar importante ba protesaun social, tuir konstituisaun RDTL artigu 56 no Lei kontra violensia domestika, mos fo hela knaar boot ida, atu MSS bele asegura rede protesaun social ba ema vulneravel sira.

“Rekomendasaun hirak ne’e atu implementa, MSS halo ona politika, programa orsamentu atu rezolve ba rekomnedasaun ne’ebe mak fo sai. Komisaun amizade unidade, edukasaun no treinamentu, realiza ho sobrevivente ne’ebe vulneravel liu husi violasaun direitus humanus iha pasadu no divulgasaun komunidade internasional no parte interesadu sira inklui Indonezia”, deklara Florentina Smith

Florentina mos hateten asaun iha area hirak ne’e sei kontribui ba Timor-Leste nia planu estrategiku nasional no objetivu ba dezenvolvimentu sustentavel, sei halao kolaborasaun ho governu, sosiedade sivil no parte interesadu seluk iha munisipiu hotu.

Liu hosi workshop refere halo aprezentasaun esbosu fundu solidaridade, no halo diskusaun ba esbosu refere, ba funsionariu CNC, estudante no membru governu sira. *[ Bebiana Soares | Editor: Zevonia Vieira | TAFARA.TL | 27.02.2018]

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *